Ee, kundi Nyamuhanga anzire abandu ibahindana busana n’eriramya. E Biblia yikabugha yithi: “Thughaniraye ngoku thwang’ibukania oko lhwanzo n’emibiiri yuwene. Sithuleke erihindana lyethu haghuma.”​—Abaebrania 10:24, 25.

 Yesu mwakangania ngoku abigha biwe banga kolire ekithunga ekiri omwa buyithondeke akababwira athi: “Neryo mwamabya n’olhwanzo, omughuma busana n’owundi, abandu bosi basyaminya ko muli bigha baghe.” (Yoane 13:35) Ng’enzira ngulhu ey’erikanganiryamu olhwanzo olhu, abigha ba Kristo bangabere bakahindana haghuma n’abikirirya balikyabo. Banga thondekanibwe mwa bithunga ebikahindana mughulhu wosi busana n’eriramya. (1 Abanya Korinto 16:19) Neryo abosi haghuma, ibabya lhughanda lhw’abalikyethu olhw’ekihugho kyosi.​—1 Petero 2:17.

Sikirighunza erithabya omwa dini ndebe

 Nomwakine indi e Biblia yikabugha yithi abandu batholere ibahindana haghuma eriramya Nyamuhanga, siyiri kangiriraya yithi omundu angana tsemesya Nyamuhanga omw’ithabya mughuma w’okwa bali omwa dini ndebe. Erithoka eriliwa na Nyamuhanga, edini eyo mundu alimu yitholere iyahamba okwa ngebe yiwe yosi. Ng’eky’erileberyako, e Biblia yikabugha yithi: “Ekisomo [edini] kibuya, ekithe n’ebithisirire embere sya Nyamuhanga Thatha ky’eki: eriwathikya esyongubi n’abakwakali omo bulighe bwabo, kandi n’eriyihighulha oko myatsi mibi y’ekihugho.”​—Yakobo 1:27.