“မ်ပကွၢ်လိာ်ပသး တဂၤဒီးတဂၤ, ဒ်သိးပကသဆၣ်ထီၣ်လိာ်ပခံဆူ တၢ်အဲၣ်တၢ်ကွံ, ဒီးတၢ်မၤဂ့ၤတၢ်န့ၣ်တက့ၢ်. ဟးဆှဲးပတၢ်အိၣ်ဖှိၣ်ရိဖှိၣ်, . . . တဂ့ၤ.” (ဧ့ၤဘြံၤ ၁၀:၂၄, ၂၅) အဃိ ပသ့ၣ်ညါဘၣ်လၢ ကစၢ်ယွၤအဲၣ်ဒိးလၢ ပှၤကအိၣ်ဖှိၣ်တပူၤဃီ ဒီးဘူၣ်ထီၣ်ဘါထီၣ်အီၤလီၤ.

 ယ့ၣ်ၡူးတဲဘၣ်​ ပှၤလၢအပိာ်အခံတဖၣ်လၢ “လၢသုအဲၣ်လိာ်ကွံလိာ်သုသးအဃိဒီး, ပှၤခဲလၢာ်ကသ့ၣ်ညါလၢ သုမ့ၢ်ယပျဲၢ်ယဘီၣ်လီၤ.” (ယိၤဟၣ်​ ၁၃:၃၅) ဖဲအတဲဝဲဒ်အံၤအခါ အပာ်ဖျါထီၣ်ဝဲလၢ ပှၤလၢအပိာ်အခံတဖၣ်​ ကကရၢကရိထီၣ်အသး ဒ်ပှၤတဖုအသိး. ဒ်သိး ယ့ၣ်ၡူးအပျဲၢ်အဘီၣ်တဖၣ်​ ပာ်ဖျါထီၣ်​ တၢ်အဲၣ်ကသ့အဂီၢ် အဝဲသ့ၣ်​ ကဘၣ်ရ့လိာ်အသး ဒီးပှၤစူၢ်က့ၤနာ်က့ၤတၢ် ကဒဲကဒဲလီၤ. အဝဲသ့ၣ်​ ကရၢကရိထီၣ်ဝဲ တၢ်အိၣ်ဖှိၣ်တဖၣ်​ ဒ်သိး ကဘူၣ်ထီၣ်ဘါထီၣ်တၢ် ထီဘိအဂီၢ်လီၤ. (၁ ကရံၣ်သူး ၁၆:၁၉) ဒီးဖဲအဝဲသ့ၣ်​ ပာ်ဖှိၣ်ထီၣ်အသးခဲလၢာ်အခါ ကဲထီၣ်ဝဲ ဟီၣ်ခိၣ်ဒီဘ့ၣ် ဒီပုၢ်ဝဲၢ်တၢ်ကရၢကရိ တခါလီၤ.—၁ ပ့းတရူး ၂:၁၇.

ထဲဒၣ်ပအိၣ်လၢ တၢ်ကရၢကရိတခါအပူၤန့ၣ် တလၢပှဲၤဒံးဘၣ်

 လံာ်စီဆှံတဲဝဲလၢ ပှၤကဘၣ်ပာ်ဖှိၣ်ထီၣ်အသး ဒ်သိးကဘူၣ်ထီၣ်ဘါထီၣ်ကစၢ်ယွၤအဂီၢ် ဘၣ်ဆၣ်​ ထဲဒၣ်ပကဲ တၢ်ဘူၣ်တၢ်ဘါတခါ အပှၤကရၢဖိန့ၣ်​ ပတဒိးန့ၢ်ဘၣ်​ ကစၢ်ယွၤ အတၢ်ဘၣ်သးဒံးဘၣ်. ဒ်သိး ကစၢ်ယွၤ ကဘၣ်သူၣ်ဘၣ်သးပှၤအဂီၢ် ပကဘၣ်အိၣ်မူမၤထွဲဒ် တၢ်ဘူၣ်တၢ်ဘါအတၢ်သိၣ်လိ လၢပတၢ်အိၣ်မူအပူၤ ကိးနံၤဒဲးလီၤ. အဒိ, လံာ်စီဆှံတဲဝဲလၢ “တၢ်ဘူၣ်ထီၣ်ဘါထီၣ်အစီအဆှံ, ဒီးတဘၣ်အၢဘၣ်သီဘၣ်တမံၤမ့ၢ်အအံၤ, တၢ်အိၣ်သကိး ပှၤဖိၣ်ဃဲဒီးမုၣ်ကမဲ လၢအဘၣ်တၢ်နးတၢ်ဖှီၣ်အပူၤ, ဒီးတၢ်ပလီၢ်အသးဒ်သိး အသုတဘၣ်တၢ်ဃံၣ်တၢ်ဃူးလၢ ဟီၣ်ခိၣ်တဂ့ၤန့ၣ်လီၤ.”—ယၤကိာ် ၁:၂၇.