Eyo, mwomwo Kalunga asaka vatu valikungulwilenga hamwe nakumulemesa. Mbimbiliya yahanjika ngwayo: “Tulihakenunga michima navakwetu mangana tulikolezeze tusolole zangi navilinga vyamwenemwene. Kaha kanda natusuvilila kulikungulwila hamweko.”—WavaHepeleu 10:24, 25.

 Yesu ahanjikile ngwenyi tumbaji twenyi navakatunga liuka hakwamba ngwenyi: “Vatu vosena navakatachikiza ngwavo enu mwapwa mutumbaji twami kachi nge namulizanganga mwenumwenu.” (Yowano 13:35) Hakusaka kusolola zangi kana, tumbaji vaKulishitu vatelelele kulikungulwilanga hamwe navakwavo vaka-kwitava. Valingilenga ngocho hakulikungulwilanga lwola lwosena muvikungulwilo nakulemesa Kalunga. (Wavaka-Kolinde 1, 16:19) Kaha vatunga jino liuka limwe mukaye kosena.—WaPetulu 1, 2:17.

Mutu atela kuzata nangolo keshi kupwa kaha muliuka lyakwitavako

 Numba tuhu Mbimbiliya yahanjika ngwayo vatu vatela kulikungululanga nakulemesa Kalunga, oloze kayalumbununa nge mutu nahase kwivwisa Kalunga kuwaha hakupwa kaha muliuka lyakwitavako. Liuka lize mwapwamo mutu lyatela kumulingisa apwenga navilinga vize navilingisa Kalunga amwivwile kuwaha. Chakutalilaho, Mbimbiliya yahanjika ngwayo: “Kwitava chitoma chakuhona kujiluluka kumeso aKalunga Setu shina echi: Kulamanga kanawa vanginga navatuliwe muluyando lwavo, nakulilama chakuzeneka lipenga lyakufuma kukaye.”—WaYakova 1:27, kwinyikila chamwishi.