Ikju, tuʼnju taj Dios tuʼn tok qchmon qibʼ tuʼntzun qkʼulin te. In tzaj tqʼamaʼn Tyol Dios jlu: «Qo ximan tiʼj tuʼn qkyuwsante qibʼ qxolx tuʼn qkʼujlante qibʼ ex tuʼn qbʼinchante bʼaʼn. Ex miʼn txi qkolin tuʼn tok qbʼuyin qibʼ» (Hebreos 10:24, 25).

 Tqʼama Jesús qa che teltoq t-xnaqʼtzbʼen toj jun kʼloj xjal tej tqʼama jlu: «Qa ma kykʼujla kyibʼe kyxolxe, tuʼntzun jlu kʼelel kynikʼ kykyaqil xjal kyiʼje qa nxnaqʼtzbʼen qeye» (Juan 13:35). Oʼkx jaku kubʼ kyyekʼin t-xnaqʼtzbʼen Jesús kʼujlabʼil lu qa ma che ten junx. Tuʼn tbʼant jlu, iltoq tiʼj tuʼn kyten toj kʼlojin ex tuʼn tok kychmon kyibʼ tuʼntzun kykʼulin te Dios (1 Corintios 16:19). Kykyaqilx che okel te erman twitz tkyaqil Txʼotxʼ (1 Pedro 2:17).

Il tiʼj tuʼn tbʼant jun tiʼ quʼn ex nya oʼkx tuʼn qten toj jun okslabʼil

 In tzaj tqʼamaʼn Xjan Uʼj qa il tiʼj tuʼn tok kychmon kyibʼ xjal tuʼntzun kykʼulin te Dios. Noqtzun tuʼnj, mintiʼ in tzaj tyekʼin qa jaku tzalaj Dios tiʼj jun xjal oʼkx qa ma ten jun tokslabʼil, sino il tiʼj tuʼn tkubʼ tyekʼin tukʼil tbʼinchbʼen. Jun techel, in tzaj tqʼamaʼn Tyol Dios jlu: «Aju ajbʼebʼl twitz Qman Dios saqxix ex mintiʼ tpaltil, atzun jlu: tuʼn qonin kyiʼj kʼwaʼl mintiʼ kyman ex kyiʼj mebʼa xuʼj tuj yajbʼil kye, ex tuʼn tok qkwentin qibʼ tuʼn miʼn qtzʼilix kyxol xjal» (Santiago 1:27).