Saá íyoña, chi Ndióxi̱ kúni̱ra ña̱ ná ndakutáʼan na̱ yiví ña̱ ndasakáʼnunara. Biblia káchiña: “Ná kundi̱ʼi̱ní-iniyó xa̱ʼa̱ táʼanyó ña̱ va̱ʼa na̱ʼa̱yó ña̱ kúʼvi̱-iniyó xíniyó inkana ta ná keʼéyó ña̱ va̱ʼa, ta ná kǒo sandákooyó ña̱ ndatakayó” (Hebreos 10:24, 25).

 Ta̱ Jesús ni̱ka̱ʼa̱nra ña̱ na̱ ndíku̱n miíra viíní kitáʼanna ta viíní keʼéna ndiʼi ña̱ʼa, ta ka̱chira: “Tasaá kúú ña̱ kunda̱a̱-ini ndiʼina ña̱ kúúndó discípuloi̱: tá kúʼvi̱-inindó xínitáʼanndó” (Juan 13:35). Ta ña̱ va̱ʼa na̱ʼa̱ na̱ ndíku̱n ta̱ Cristo ña̱ kúʼvi̱-inina xínitáʼanna xíniñúʼu ndakutáʼanna xíʼin inka na̱ ndíku̱nra. Ta ña̱ va̱ʼa keʼéna ña̱yóʼo xíniñúʼu vií ndakutáʼanna ti̱xin congregación ta kǒo sándakoona ña̱ ndasakáʼnuna Ndióxi̱ (1 Corintios 16:19). Ta ndiʼi na̱yóʼo inkáchi xa̱a̱na kitáʼanna ndasakáʼnuna Ndióxi̱ (1 Pedro 2:17).

Xíniñúʼu keʼéna inka ña̱ʼa su̱ví ndakutáʼan kuitína xíʼin religión

 Biblia káʼa̱nña ña̱ na̱ yiví xíniñúʼu ndatakana ña̱ ndasakáʼnuna Ndióxi̱. Soo va̱ása káʼa̱nña ña̱ sákusi̱ína-ini Ndióxi̱ tá ndákutáʼan kuitína xíʼin iin religión. Chi xíniñúʼu chindeétáʼanña xíʼinna. Ta kúú Biblia káchiña: “Ña̱ va̱ʼa viíní koo ña̱ ndasakáʼnuyó yiváyó Ndióxi̱ ta va̱ása kuumiíña ña̱ yaku̱a̱, ña̱yóʼo kúú ña̱ xíniñúʼu keʼéyó ña̱ va̱ʼa kindo̱o-inira xíʼinña: ná kiʼinyó kuenta xíʼin na̱ ni̱xi̱ʼi̱ yivá ta saátu ná ñaʼá ná ni̱xi̱ʼi̱ yií tá yáʼana nu̱ú tu̱ndóʼo, ta ná kǒo taxiyó ña̱ ixayaku̱a̱ nda̱a̱ ni iin ña̱ʼa ña̱ íyo ñuyǐví yóʼo miíyó” (Santiago 1:27).