Kena, pampa toTeotsij kineki maseualmej ma monechikokaj kema kiueyichiuaj. Biblia kiijtoua: “Ma tijtemokaj kejatsa timosemakasej se ika seyok para más timoiknelisej uan tijchiuasej tlen kuali. Ximomokuitlauikaj para axinkikauasej inmosentilisej ininuaya sekinok tlaneltokanij” (Hebreos 10:24, 25).

 Jesús kiijtok itokilijkauaj itstoskiaj ipan se tlanechikoli kampa mosentikapaleuiskiaj kema kiniljuik: “Nochi tlakamej kimachilisej para nelia innomomachtijkauaj intla nelia inmoiknelisej” (Juan 13:35). Cristo itokilijkauaj kinextiskiaj moikneliaj kema monechikoskiaj. Yeka, monekiskia itstosej ipan se tlanechikoli uan kiueyichiuasej toTeotsij sansejko (1 Corintios 16:19). Kiampa mosentikapaleuiskiaj ipan nochi Tlaltipaktli (1 Pedro 2:17).

¿Tijyolpakiltiaj toTeotsij san pampa tiitstokej ipan se religión?

 Maske Biblia kinextia maseualmej moneki monechikosej uan kiampa kiueyichiuasej toTeotsij, amo kiijtoua se akajya uelis kiyolpakiltis toTeotsij san pampa itstok ipan se religión. Moneki nopa religión ma kipaleui ipan inemilis. Biblia kiijtoua: “Inijuantij katli nelia kitlepanitaj toTeko Dios uan kipiaj inintlaneltokilis katli senkistok kuali iixpa, kichiuaj ya ni: kinpaleuiaj iknotsitsij uan kaualtoauiuaj katli tlaijiyouiaj, uan momokuitlauiaj ika katli fiero ipan ni Tlaltipaktli para amo kinyoltilanas ma tlajtlakolchiuakaj” (Santiago 1:27, Icamanal Toteco).