Eee, pali vuto. Takamba tetyo cifukwa Mulungu ofuna kuti ŵanthu akomulambila monga gulu. Niye cifukwa cake Baibo yulaŵila kuti: “Tiyeni tiganizilane kuti tilimbikishane pa cikondi na nchito zabwino. Tisaleke kusonkhana pamozi.”​—Aheberi 10:24, 25.

 Peenze pacalo, Yesu eonesha kuti ophunzila ŵake enzofunika kulambila Mulungu monga gulu. Eŵauzhya kuti: “Onse akaziŵe kuti nimwe ophunzila ŵangu ngati mukondana.” (Yohane 13:35) Ophunzila a Yesu sembe aliyokwanishe kuoneshana cikondi ngati kuti aliyense enzongocita zinthu payeka. Tetyo, nthawi zonse enzofunika kusonkhana m’mipingo yosiyanasiyana kuti alambile Mulungu. (1 Akorinto 16:19) Ndipo mipingo yonse yenzonkhala monga ni gulu imozi ya pacalo conse.​—1 Petulo 2:17.

Kungonkhala tyala m’cipembezo ciyakine pakweka n’kosakwanila

 Monga ni mwataonela, Mulungu ofuna kuti tikomulambila monga gulu. Koma izi zutanthauza lini kuti tingankhale pa ushamwali na Mulungu ngati tingankhale tyala m’cipembezo ciyakine. Ngati tufuna kunkhala pa ushamwali na Mulungu, tufunika kucita zinthu mokatizhyana na zatuphunzila. Mwacisanzo, Baibo yulaŵila kuti: “Kupembeza kutuŵa koma soti kosaipishiwa kwa Mulungu koma soti Ausuwasu ni uku: Kusamalila ŵana amasiye na anakazi amasiye m’mavuto ŵao, nonkhala uliye ciŵanga ca calo.”​—Yakobo 1:27.