Ee, nime Osolobrugwẹ ọ guọlọre nẹ ihworho i kwomakugbe ga ye. Baibol na ọrhọ ta: “E jenẹ ọwan i roro harẹn owuowọnwan neneyo a sabu dje ẹguọlọ ọrhẹ iruo esiri phia, a vwa sẹrerhumuji okugbe ọrẹ ọwa-an.”—Hebrews 10:24, 25.

Jesu o djerie phia taghene idibo yi ina ha ukoko owu mwu, ọke rọ ta rẹn aye: “Nyoma ọnana, ihworho ephian ine rhe taghene are idibo mẹ—are i rhe vwo ẹguọlọ kpahen omomare.” (John 13:35) Izede owu kirighwo rẹ idibo i Jesu ine dje ẹguọlọ ọnana phia yẹ ọrẹ aye ine kwomakugbe. Aye ine koko uvuẹn ikoko sansan ga ẹga kugbe ọke ephian. (1 Corinthians 16:19) Aye ephian ni ne rhiẹ imizu akpọ ephian.—1 Peter 2:17.

O te re ne kwomakugbe ẹga owu ọvo-o

Dedevwo Baibol na ọ tare taghene ihworho i kwomakugbe ga Osolobrugwẹ, ọ vwọ haye ta taghene ohworho ọnọ sabu ga Osolobrugwẹ uvuẹn ẹga ephian rọ havwọ-ọ. Nẹ Osolobrugwẹ ọ sabu rhiabọ dede ẹga ọravwọ, ẹga na ọnọ vi hobọte akpenyerẹn ọnẹyen. Jerẹ udje, Baibol na nọ tare: “Aruẹ ogame rọ fonron, ro vwo vwo aghwa obaro Osolobrugwẹ ro rhiẹ Ọsẹ ọwan ọyẹ ọnana: ra na hẹrote emọ ri vwe vwo esẹ ọrhẹ izu kugbe emẹse uku ọke ukpokpogho aye, jeghwai sẹrorẹ oma ọwan nẹ upe ọrẹ akpọ na.”—James 1:27.