Yes, bikos God laekem pipol for meet tugeta for worship. Bible sei: “Iumi mas barava tingim narawan mekem iumi savve encouragem olketa for showimaot love and duim olketa gudfala samting. No misstim wei for hipap tugeta.”​—Hebrew 10:24, 25.

 Samting wea Jesus talem showim olketa follower blo hem bae startim wanfala grup wea organize. Hem sei: “Sapos iufala lovem iufala evriwan, pipol bae savve iufala olketa disaepol bilong mi.” (John 13:35) Main samting wea olketa disaepol blo Christ duim for showim disfala love hem taem olketa hipap tugeta witim olketa narawan wea worshipim God. Olketa organize lo olketa kongregeson for meet tugeta evritaem for worship. (1 Corinth 16:19) Evriwan wan mind for worshipim God evriwea lo world.​—1 Peter 2:​17.

For member lo wanfala religion iumi mas duim samting

 Bible sei pipol shud meet tugeta for worshipim God, bat Bible no talem hao wanfala man savve mekem God hapi taem hem member blo wanfala religion. For God hapi, religion wea man joinim mas showaot lo olketa samting wea hem duim lo evriday laef. Example nao, Bible sei: “Wanfala wei for worship hem stap wea hem klin and stret long tingting bilong God wea hem Dadi bilong iumi. Datwan nao hem for lukaftarem olketa pikinini wea no garem dadi and mami and olketa widow woman wea kasem hard taem, and for stap klia long olketa rabis wei bilong disfala world.”​—James 1:​27.