Ae, te inangaro ra te Atua i te tangata kia taokotai no te akamori. Karanga te Pipiria: “E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: auraka e akaruke i to tatou akaputuputu anga.”​—Ebera 10:24, 25.

 Akakite a Iesu e ka akatupu tana au pipi i tetai pupu, te karanga anga aia: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioane 13:35) Te ravenga maata no te akaari i teia aroa, ka kapiti atu ta Karaiti au pipi ki tetai e tetai. Ka akanooia ratou ki roto i te au putuputuanga e ka taokotai putuputu no te akamori i te Atua. (1 Korinetia 16:19) Ka riro mai ratou ei taokotai anga taeake i te ao katoa.​—1 Petero 2:​17.

E maata atu te ka anoanoia i te piri ki tetai akonoanga

 Akakite te Pipiria e kia taokotai te tangata no te akamori i te Atua, kare te reira i apii mai e ka mareka te Atua me piri tetai tangata ki tetai akonoanga. E mareka ai te Atua, ka anoanoia te akonoanga kia akakeu i tona oraanga i te au rā ravarai. Ei akaraanga, karanga te Pipiria: “Ko te akono mou i te Atua e te kino kore i mua i te aroaro o te Atua, o to tatou Metua ra, ko teia ïa: Ko te takinga-meitaki i te matiroeroe e te au vaine takaua i to ratou mate anga e te tiaki iaia uaorai auraka ei viivii i teianei ao.”​—Iakobo 1:​27.