Pathian zong nih a duh i kan ca zongah a ṭhahnem hngami biakhiahnak tuah khawh awkah Baibal ah aa telmi phunglam le nawlbia hna nih a kan bawmh tiah Jehovah Tehte Hna nih an zumh. (Isaiah 48:17, 18) Mah phunglam le nawlbia hna kha kanmah nih kan chuahmi a si lo. Asinain Baibal phunglam ningin kan nung. Nungak tlangval i chingnak kong he aa tlaimi Baibal phunglam hna kha zoh hna u sih. a

• Ṭhitumnak cu zungzal a fekmi ṭemtu hri pakhat a si. (Matthai 19:6) Jehovah Tehte Hna nih nungak tlangval i chingnak kha biapi tuk ah an chiah. Zeicahtiah nungak tlangval i chingnak cu ṭhitumnak caah kehlan hramthawk a si caah a si.

• Ṭhitum dingin kum a tling cangmi hna lawng nih an i ching awk a si. Annih cu ‘duhnak a ṭhawn bik caan zong a luan cang,’ phun dangin cun nupa si duhnak a ṭhawn bik caan a luan cangmi an si.​—1 Korin 7:​36, NW.

• Aa chingmi hna cu ṭhitum awkah a luatmi an si lai. Cheukhat cu phungning tein aa ṭhenmi an si hmanhah Pathian mithmuh ah nupi, va ngeih ṭhan awkah a luatmi an si lo. Zeicahtiah i ṭhen khawhnak a ruang pakhat lawng a um. Mah cu zuanzamnak a si tiah Baibal nih a ti.​—Matthai 19:9.

• Nupi, va ngeih a duhmi Khrihfa hna cu zumtu khat lawng kha an i thim awk a si tiah Baibal nih a ti. (1 Korin 7:​39) Mah nawlpeknak ah aa telmi Khrihfa ṭhitumnak timi cu kan zumhnak hna a upattu kha a chim duhmi si loin zumhmi le cohlanmi aa khatmi tipil a ing cangmi Jehovah Tehte pakhat kha a chim duhmi a si. (2 Korin 6:​14) Zumhnak aa khatmi lawng ṭhitvat awkah a salle kha Pathian nih a zungzal in a chimh hna. (Genesis 24:3; Malakhi 2:​11) Mah nawlpeknak cu aa tlakmi a si ti kha tuchan i mifim pawl zong nih an cohlan. b

• Fale nih nulepa bia an ngaih awk a si. (Phungthlukbia 1:8; Kolose 3:​20) Mah nawlpeknak ah nulepa kuttang ah a ummi fale hna cu nungak tlangval i chingnak kong he aa tlaiin nulepa i an duhnak zulh zong aa tel. Fale pakhatkhat cu kum zeizat lawngah i ching ding, zeibantuk dah tuah a ngah tibantuk zong aa tel.

• Jehovah Tehte Hna nih i ching awk a si le si lo, aho he dah i ching ding timi kha Baibal lamhruainak cungah i hngat in anmah tein biakhiahnak an tuah. Mah cu mah Baibal phunglam he zong aa tlak: “Kanmah le kan thil cio cu kanmah te nih kan i phorh awk a si.” (Galati 6:5) Asinain nungak tlangval i chingnak kong he aa pehtlaih ahcun Jehovah Tehte Hna cu an caah ṭhatnak a duhpiaktu nutling patling a simi Khrihfa hna sinah ruahnak an hal hna.​—Phungthlukbia 1:5.

• Nungak tlangval an i ching tikah an tuah tawnmi tuahsernak hna cu sualnak ngan an si. Tahchunhnak ah, nupa sualnak kha hrial dingin Baibal nih nawl a kan pek. Mah nawlpeknak ah aa ṭhium lomi pahnih nih nupa sualnak an tuahmi lawng si loin midang i an chiaṭha kha nupa sual duhnak he tawnghthamnak, kaa le tol in nupa sualnak tuahnak tibantuk a thiang lomi tuahsernak hna aa tel. (1 Korin 6:​9-​11) Nupa sualnak tiang a phan lo nain i ṭhitum hlanah nupa sual duhnak lungthin a thawhtermi tuahsernak hna zong Pathian nih a fihmi “a thurhnawmmi” tuahsernak an si. (Galati 5:​19-​21) Nupa sualnak kong aa tlak loin i ruahceihnak zong “holh thurhnawm” a si i mah kha Baibal nih sual a phawt.​—Kolose 3:8.

• Minung lungthin cu hlen a hmang. (Jeremiah 17:9) Mi pakhat cu a palh tiah a theih komi thil hmanh kha a lung duhnak zul in a tuah sual khawh. Aa chingmi hna nih a ṭhalomi thil an tuah sual nakhnga lo an pahnih lawng a dang tein um tibantuk leemsoinak a chuahter khomi thil sining hna kha an hrial awk a si. Aa chingmi hna cu mi hmuhnak ah zapi he i hawikomhnak, aa tlakmi hawi pakhat i sawmnak thawngin a cang lo dingmi thil a can sual nakhnga lo a hlankan in i kilven khawh a si. (Phungthlukbia 28:26) Innchung hawi aa kawlmi nupi, va a ngei lomi Khrihfa hna zong nih internet in i ching ṭih a nunzia kha hngalh a herh. A hleiin internet in mising pakhat he i duh sual tikah ṭih a nung khun.​—Salm 26:4.