TANYA ARI BALA NEMBIAK

Baka Ni Gamal Aku?

TEBAH

Baka Ni Gamal Aku?

Nama kebuah nuan patut peduli pasal gari ke dikena? Laban gari ke dikena nunjukka sapa nuan ti bendar. Nengah gari ke dipilih nuan, nunjukka pasal nama?

Tiga iti penyalah ti besai sereta chara nyeliahka nya

Penyalah kesatu: Kelalu nitihka chara media sosial ngatur chara nuan begari.

“Kekadang, aku pan ka nunda chara begari baka ke dipandangka ba iklan, laban nya suah amat diayanka,” ku seiku nembiak ke benama Theresa. “Enti untak kitai dikelingi orang ke ngena gari ti tebilang, tusah amat ga enda nitih.”

Ukai semina nembiak indu aja kelalu nunda utai ke diayanka ba iklan. “Nembiak lelaki mega nyadi mansa media sosial,” ku bup The Everything Guide to Raising Adolescent Boys. “Orang ke bedagang endang ngena sida nyadika utai kena ngelakuka utai ti dijual sida, indah maya sida agi mit.”

Perundingka: Bup Kudus madah, “Orang ke beli deka arapka sebarang utai, tang orang ke pintar deka nyingkang enggau bejimat.” (Jaku Dalam 14:15) Nitihka lalau ari ayat nya, kitai enda senang nitihka utai ti diayanka ba iklan. Chunto, lebuh nuan meda iklan pasal gari ke dikumbai orang “lawa” tauka “seksi”, uji pikirka:

‘Enti aku nitihka iklan nya, sapa bulih untung?’
‘Nama runding orang bukai pasal aku?’
‘Kati aku endang orang ke baka nya, tauka kati nya ngam enggau pengarap aku?’

Chara: Dalam seminggu, uji peratika iklan sereta media sosial ke bukai, kelebih agi ke mandangka pasal fashion kemayaharitu. Chara pengidup ke baka ni ke deka sida titih nuan? Kati bisi kebuah ti ulih ngasuh nuan patut nitihka fashion nya? “Kitai endang deka begari enggau manah, milih baju ke manah, lalu ngayanka tubuh ti ‘lawa’, ku seiku nembiak indu ke benama Karen. “Mayuh ari orang ke bedagang nemu pasal tu, nya kebuah senang agi sida ngasuh nuan rinduka utai ti dijual sida.”

Penyalah kedua: Pilih fashion ke dikena mayuh orang.

Munyi ku seiku nembiak ke benama Manuel, “Enti bisi fashion ke benung laku, semua orang deka nitihka fashion nya, enti enda, nuan dikumbai enda nitihka gaya kemayaharitu.” Seiku nembiak ke benama Anna mega setuju. “Tu ukai semina pasal fashion, tang tu mega kati kitai ulih diterima bala kaban kitai tauka enda.”

Perundingka: Bup Kudus madah, “Anang nitihka chara dunya.” (Rome 12:2) Nitihka lalau nya, uji buka almari gari nuan lalu perundingka:

‘Nama utai ke diperundingka aku maya aku meli gari?’
‘Kati aku kelalu beberatka brand tauka jenama?’
‘Kati gari aku ulih ngasuh orang bukai berasai enda nyamai ati?’

Chara: Anang ngumbai semina bisi dua iti pilih aja. Iya nya, dikumbai bisi stail tauka fashion kelia. Nuan agi ulih milih chara ketiga, iya nya berasai nyamai sereta berasai andalka kediri empu ketegal gari ke dipilih nuan. Enti nuan berasai andalka kediri empu, nuan enda kelalu irau sekalika bala kaban nuan nerima tauka enda.

Penyalah ketiga: ‘Seksi nya lawa.’

“Terus terang aku madah, kekadang ka ga aku nguji baju ke seksi. Chunto iya, ngena skirt ke pandak, pit, tauka ngayanka mimit sekeda endur tubuh aku,” ku seiku nembiak indu ke benama Jennifer.

Perundingka: Bup Kudus madah, “Pemajik kitai ukai datai ari utai ti ulih dipeda, . . . tang awakka pemajik kita datai ari ati kita ti bendar.” (1 Peter 3:3, 4) Sejalai enggau lalau nya, perundingka, ni bagi patut dikemeratka kitai, pemajik ari luar tauka pemajik ari dalam?

Chara: Gari ti pemadu manah ke nuan iya nya, gari ti manah dipeda mata, enda seksi. Amat, gari ke baka tu selalu dikumbai enda nitihka stail kemayaharitu. Tang uji perundingka tu:

Kala nuan berandau enggau seiku orang ke semina bejaku pasal diri empu aja? Lalu iya ke ngemediska ati, orang nya nadai kala ngira pasal ati sereta runding nuan!

Baka jaku, gari ke dipilih kitai tau ngasuh orang bukai enda rinduka kitai, sereta baka ke madahka diri pama agi ari orang bukai

Enti gari ke dipilih nuan seksi, nuan sebaka enggau orang nya. Gari ke dipilih nuan baka ke madah, ‘peda meh aku.’ Lalu, tu mega engka ngasuh orang bukai bisi runding, nuan milih gari ke seksi engka laban nuan ngumbai diri enda lawa, nya kebuah enti nuan milih gari ke seksi, nuan tampak lawa. Tauka, sida engka ngumbai nuan ngumbai diri pama agi ari orang bukai, tauka kedua-dua iti runding tu. Nya baka ke nunjukka nuan, deka dipeda orang bukai, indah dipeda enggau chara ti enda manah.

Enti nuan enggai dikumbai baka nya, pilih meh gari ti manah dipeda mata, enda seksi. “Milih gari ke manah dipeda mata, ukai reti iya nuan baka orang tuai,” ku seiku nembiak indu ke benama Monica. “Nya reti iya, nuan sayauka diri empu sereta orang ke ngelingi nuan.”