ANDŨ ETHĨ MORAGIA

Hihi Nguo Ĩno nĩ Ĩnjagĩrĩire?

THAAKA

Nĩkĩ nĩ wagĩrĩirũo kũrora ũrĩa ũrehumba? Tondũ nguo nĩ iguũragia ũhoro mũingĩ wa mũndũ. Hihi ciaku iguũragia ũhoro ũrĩkũ ũkwĩgiĩ?

Mahĩtia matatũ andũ mekaga mĩhumbĩre-inĩ na ũrĩa tũngĩmethema

Ihĩtia rĩa #1: Kwĩhumba nguo tondũ nĩ wonaga ikĩgaathĩrĩrio.

Tinĩnja ũmwe wĩtagwo Theresa aaugire: “Rĩmwe nĩ ngucagĩrĩrio nĩ nguo cia mũthemba mũna tondũ nĩ nyonaga ikĩgaathĩrĩrio maita maingĩ.” Rĩrĩa kaingĩ wona andũ mehumbĩte nguo cia mũthemba mũna, o nawe nĩ wendaga gwĩkĩra o tao.”

Airĩtu to o tu magucagĩrĩrio nĩ indo iria iragaathĩrĩrio. Ibuku rĩa The Everything Guide to Raising Adolescent Boys riugaga atĩ, “o na anake nĩ magucagĩrĩrio nĩ mĩhumbĩre ĩrĩa yoimĩra. Marutagia kuona nguo iragaathĩrĩrio cia kũmagucĩrĩria kuuma marĩ anini.”

Geria gwĩka ũũ arĩ guo: Bibilia yugaga ũũ: “Mũndũ ũrĩa ũtarĩ na ũũgĩ etĩkagia kiugo o gĩothe, no ũrĩa mũũgĩ nĩ ecũranagia ikinya o rĩothe.” (Thimo 14:15) O ta ũrĩa ũtaaro ũcio ũronania, wĩrute gwĩciria na kinyi kĩrĩa kĩragaathĩrĩrio. Kwa ngerekano, ũngĩona nguo iragaathĩrĩrio ikerũo atĩ, “nĩ njerũ,” “nĩ cia kĩĩrĩu,” kana atĩ “no itũme andũ magucĩrĩrio nĩwe,” wĩyũrie ũũ:

‘Nũũ ũgunĩkaga makĩria rĩrĩa ndarũmĩrĩra mwĩhumbĩre ũcio uumĩte?’
‘Mwĩhumbĩre ũcio ũngĩtũma nyoneke ndĩ mũndũ wa mũthemba ũrĩkũ?’
‘Hihi ingĩenda andũ mecirie ndĩ mũndũ wa mũthemba ũcio?’

Ũtaaro wĩgiĩ kwĩhumba: Kwa ihinda rĩa kiumia kĩmwe, rĩrĩa rĩothe ũkuona kĩmenyithia gĩa kũgaathĩrĩria nguo, wĩyũrie ciũria ici: Nĩ ithimi irĩkũ mararutana? Hihi marageria gũkũiguithia atĩ no mũhaka wĩkĩre nguo ya mũthemba ũcio? Tinĩnja ũmwe wĩtagwo Karen aaugire: “Nĩ gũkoragwo na hatĩka nene ya kuoneka ũrĩ mũthaka mũno, gwĩkĩra nguo ĩrĩa thaka biũ, na kuonania ‘mwĩrĩ waku ũrĩa wĩ mũthaka.’ Andũ arĩa magaathagĩrĩria nguo nĩ moĩ ũndũ ũcio, kwoguo makaũhũthĩra ũũru nĩguo magucĩrĩrie andũ ethĩ.”

Ihĩtia rĩa #2: Kwĩhumba na njĩra ĩrehumbwo nĩ andũ arĩa aingĩ nĩguo ũhaanane nao.

Tinĩnja ũmwe wĩtagwo Manuel aaugire atĩ “angĩkorũo nguo ya mũthemba mũna nĩyo ĩrehumbwo nĩ andũ aingĩ, o mũndũ endaga kwĩhumba na njĩra ĩyo. Ũngĩaga kũrũmĩrĩra mwĩhumbĩre ũcio, andũ mekwambĩrĩria gũgũtuĩra.” Tinĩnja ũngĩ wĩtagwo Anna o nake aaiguaga o ũguo. Aaugire ũũ: “Ũndũ ũrĩa wonekaga ũrĩ wa bata mũno nĩ gwĩtĩkĩrĩka nĩ arĩa angĩ.”

Geria gwĩka ũũ arĩ guo: Bibilia yugaga: “Mũtige kwĩgerekanagia na mũtabarĩre ũyũ wa maũndũ.” (Aroma 12:2) Ũkĩhũthĩra ũtaaro ũcio, rora nguo ciaku na wĩyũrie ũũ:

‘Nĩ kĩĩ gĩtũmaga thuure kwĩhumba ũrĩa ndĩhumbaga?’
‘Hihi no mũhaka njĩkĩre nguo itumĩtwo nĩ makambuni ma nguo marĩa marĩ igweta?’
‘Hihi nyendaga gũkenia andũ kũgerera mwĩhumbĩre wakwa?’

Ũtaaro wĩgiĩ kwĩhumba: Matinĩnja aingĩ moigaga maũndũ nĩ merĩ—wĩkĩre nguo cia kĩĩrĩu wĩtĩkĩrĩke, kana wage gwĩkĩra nguo cia kĩĩrĩu wage gwĩtĩkĩrĩka. No ũngĩkorũo na ma atĩ nĩ wĩhumbĩte wega, ndũgũtangĩka nĩ ũrĩa andũ arĩa angĩ marakuona.

Ihĩtia rĩa #3: Gwĩciria atĩ ‘mwĩhumbĩre ũronania mwĩrĩ nĩguo mwega.’

Mũirĩtu ũmwe wĩtagwo Jennifer aaugire: “Rĩmwe mũndũ nĩ agucagĩrĩrio gwĩkĩra nguo nguhĩ mũno kana ĩramũnyita mũno.”

Geria gwĩka ũũ arĩ guo: Bibilia yugaga ũũ: “Mũtikareke kwĩgemia kwanyu gũkoragwo kũrĩ kwa na igũrũ . . . no gemagiai mũndũ wa hitho ũrĩa wa ngoro thĩinĩ.” (1 Petero 3:3, 4) Ũkĩhũthĩra ũtaaro ũcio, wĩcirie nĩ kĩĩ gĩa bata—nĩ kuoneka ũrĩ na nguo thaka-ĩ, kana nĩ gũkorũo ũrĩ mũndũ mwega.

Ũtaaro wĩgiĩ kwĩhumba: Kĩrĩa gĩtũmaga mũndũ oneke arĩ ‘mũthaka mũno’ nĩ gũkorũo na gĩtĩo. Nĩ ma, ũmũthĩ ti andũ aingĩ makoragwo na gĩtĩo. No ta wĩcirie ngerekano ĩno:

Hihi nĩ ũrĩ wakorũo na ndeereti na mũndũ waragia mũno o maũndũ ma kwĩgaathĩrĩria? Ũndũ wa kĩeha nĩ atĩ, mũndũ ũcio ndamenyaga atĩ mĩtugo yake nĩ ĩtũmaga andũ matikamwende!

O ta ndeereti-inĩ, andũ matikenagio nĩ mũndũ ũrehumba na mwĩyonanio

Rĩrĩa wehumba na njĩra ĩtarĩ ya gĩtĩo, ũhaanaga ta mũndũ ũcio. Nguo ciaku cionanagia ũrenda andũ makũrore, na no itũme andũ mecirie nĩ wĩyagĩire kĩene, kana ũrĩ na mwĩyendo. Ningĩ no itũme andũ mecirie atĩ no wĩke ũndũ o wothe nĩguo ũgucĩrĩrie andũ—o na akorũo ũkũgucĩrĩria andũ matarĩ ega.

Angĩkorũo ndũkwenda andũ makuone na njĩra ta ĩyo, wĩhumbage na gĩtĩo. Tinĩnja ũmwe wĩtagwo Monica aaugire ũũ: “Kwĩhumba na njĩra ya gĩtĩo, ti kuuga atĩ no mũhaka wĩhumbe ta cũcũ mũkũrũ. Nĩ kuuga atĩ wĩhumbĩte na njĩra ĩronia arĩa angĩ atĩ nĩ ũmaheete gĩtĩo, na atĩ nĩ ũrenda makũhe gĩtĩo.”