ЧИИТТЕРНІҢ СУРЫҒЛАРЫ
Минің тастындағы кӧрімім хайдағ?
Ниме кис чӧрчеткенімні ноға сыныхтирға кирек? Кип-азах синнеңер кӧп ниме чоохтап полар. Синің кип-азааң синнеңер ниме чоохтапча?
Моданаң палғалыстығ ӱс алҷаас. Хайди ол алҷаастарны ит салбасха?
1-ғы алҷаас. Реклама кӧзітчеткен чіли, тонанарға
Саарбах хыс Териза піди чоохтапча: «Амғы туста модадағы ниме рекламироваться полча, аннаңар пірееде анзы минің хайиимні тартча. Стильнай кӧрім удаа харах алнында кӧрінчетсе, ідӧк кӧрінерің паза тонанарың килібісче».
Реклама хоостыра хыстар ла тонанминчалар. Пір киндеде чоохталча: «Ооллар, хыстарох чіли, мода хоостыра тонанарға хынчалар. Рекламалар сыбыра оларға хайдағ кӧрімніг поларға паза хайди тонанарға чоохтапчалар» (The Everything Guide to Raising Adolescent Boys).
Артых чол. Библияда чоохталча: «Киртінҷек кізі полған на сӧске киртінче, ибіре сағынчатхан кізі, тізең, полған на алтымын сынапча» (Притчи 14:15). Рекламировать полчатхан нимелердеңер пу принцип хоостыра чахсы иде сағынып ал. Кӧзідімге, хайдағ-да кип-азахты «прайзы синзер кӧрер», «хайығ тартар» алай «сексуальнай» кип-азах тіп рекламировать полчатсалар, позыңнаң сурыбыс:
«Пу кип-азахты киссем, кемге туза полар?
Ол кип-азахты кис салзам, кемге тӧӧй полам?
Ол кип-азах сынында кем полчатханымны паза чуртаста нимені аарлыға санапчатханымны кӧзідер бе?»
Чӧп. Неделя тооза кип-азахтарның рекламаларын паза мода хайдар парчатханын кӧр кӧр. Олар хайди тудынарға паза хайди чуртирға кӧӧктірчелер? Оларның сылтаанда, позың даа сизінмин, пу модаҷа тудынарға кирек тіп сағын сыххазың ма? Карен чоохтапча: «Мода піди сағындырча: кӧрімің, кип-азааң паза фигураң прай саринаң чахсы поларға кирек. Рекламодательлер пілчелер: чииттернең устирға оой».
2-ҷі алҷаас. Пос кізізі полар ӱчӱн, моданың хоостыра тонанарға
Чиит оол Маньюэл чоохтапча: «Хайдағ-да кип-азах модада полза, прайзы іди тонанарға кӱстенче. Син модаҷа тонанмазаң, сағаа хынмин кӧрчелер». Анна ідӧк сағынча: «Сидіксініс модада ла нимес, полған на кізі кізілер аразында, пасхаҷыл кізі чіли, кӧрінерге хынминча».
Артых чол. Библияда чоохталча: «Пу тилекейнің оңдайынҷа чуртабаңар» (Римдегілерге 12:2). Пу принципті сағыста тудып, кип-азааңны сыныхтабыс, анаң позыңнаң сурыбыс:
«Ноға мин пу алай тігі кип-азахты алчам?
Фирменнай кип-азахтарны алып аларға нинҷе тың кӱстенчем?
Кип-азаамнаң кізілерні хайхадарға хынчам ма?»
Чӧп. Піреелері ікі ле оңдай кӧрчелер: мода хоостыра тонанып, пос кізізі поларға алай, мода хоостыра тонанмин, пос кізізі пол полбасха. Син, тізең, ӱзінҷі оңдайны кӧр кӧр: позыңа истіг полар иде тонан. Позыңның кӧріміңе нинҷе кӧп чӧпсінерзің, анҷох кӧп пасхаларына тӧӧй поларға кӱстенмин сығарзың.
3-ҷі алҷаас. Сексуальнай кӧрімніг полғаны чахсы тіп сағынарға
Пір хыс, Дженифер, тіпче: «Сынында пірееде иртіре хысхаҷах, иртіре чапсыра чатчатхан алай иртіре азых кип-азах кизерің килче».
Артых чол. Библияда чоохталча: «Сірерні тастындағы ниме чазабазын... амыр, нымзах, уурабас кӧңніңер чазазын» (1 Петрның 3:3, 4, НТ). Пу принцип хоостыра сағын кӧр, сағаа ниме аарлығ: модадағы кип-азах алай кізінің чӱреендегі ниме?
Чӧп. Амыр хылых хаҷан даа модадаң сыхпинча. Я, пӱӱн амыр хылыхтығ кізілер модада ниместер. Че сағын кӧр:
Позынаңар ла сағынчатхан паза позынаңар ла чоохтанчатхан кізее пірее хати тоғасхазың ма? Кізілер андағ кізінең тус иртірерге хынминчалар. Ачырғастығ, че ол анзын сизінминче дее!
Тастындағы кӧрімің, синің чооғыңох чіли, позыңа ла хынчатханыңны кӧзідерге айабас. Аның ӱчӱн, тізең, кізілер синнең айғазарға хынмастар
Иртіре азых алай иртіре чапсыра чатчатхан кип-азах киссең, андағох кізілерге тӧӧй поларзың. Андағ кип-азах піди аахтапчатханға тӧӧй: «Минзер кӧр кӧр!» Іди тонанзаң, син позыңда ікінҷілепчеткен алай позыңнаңар ла сағынчатхан кізее тӧӧй поларзың. Пасха кізілерге сағаа кізілернің хайии читпинче тіп пілдірер.
Кізілерде позыңнаңар саба сағыстар тӧрітпе. Ипти-оңдайли тонанарға кӱстен. Чиит хыс, Моника, тіпче: «Ипти-оңдайли тонанғаны, синің ууҷаң чіли, тонанғанын таныхтабинча. Анзы позыңны паза пасхаларын улуғлапчатханыңны кӧзітче».
