TELPOCHMEJ UAN ICHPOCHMEJ TLAJTLANIJ
¿Nimotlakentia ken moneki?
¿Tleka miak ipati xikita ken timotlakentia? Porque totlaken kiteititia miak tlamantli. ¿Tlen kiteititia motlaken?
Eyi tlamantli tlen onka uan tlen techpaleuis amo ijkon matikchiuakan
Se tlamantli: Timotlakentis ken kijtouaj ijkuak tlanemakaj.
Se ichpochtli tlen itoka Theresa, okijto: “Ualeua tikitaj miak tlamantli kanin mota tlen kinemakaj uan ijkuak okachi tikitaj okachi techpaktia. Ijkuak akinmej ompa motaj motlakentiaj ken tejuan, okachi tiknekij tikchiuaskej ken yejuan”.
Pero amo san ichpochmej kichiuaj tlen kitaj kanin kiteititiaj tlen kinemakaj. Amochtli The Everything Guide to Raising Adolescent Boys (Una guía completa para criar chicos adolescentes) kijtoua: “Telpochmej noijki kinekij kikouaskej tlen kinemakaj. Ijkuak ok tsikitsitsintin kinpaktia kitaskej tlen kinemakaj”.
Se tlamantli kuali tlen mitspaleuis: Biblia kijtoua: “Akin amo ixtlamatki kineltoka nochi tlen kiluiaj pero akin ixtlamatki mokuayejyekoua itech sejse tlamantli tlen kichiua” (Proverbios 14:15). Ximokuayejyeko tlen kinekij xikchiua akinmej kiteititiaj tlen kinemakaj. Ijkuak tikitas kinemakaj tlakemitl tepontik noso tlen kiteititis monakayo ximotlajtlani:
“¿Ikaj kipaleuis tla ijkon nimotlakentis?”
“¿Tlen mokuayejyekoskej nikchiua tla ijkon nimotlakentis?”
“¿Kiteititis tlen nikchiua uan tlen nikneltoka?”
Tlen mitspaleuis: Se semana xikita tlen tlakemitl kinemakaj. ¿Ken kinekij xikpia monemilis ika tlen kinemakaj? ¿Tikita kinekij ximokuayejyeko moneki timotlakentis ken miakej motlakentiaj? Se ichpochtli tlen itoka Keren, okijto: “Ualeua tiknekij kuali matechitakan, tiknekij timoyektlakentiskej uan tiknekij kualtsin matimotakan ijkon ken oksekimej kichiuaj. Akinmej kiteititiaj tlen kinemakaj kimatokej telpochmej uan ichpochmej okachi tlakouaj”.
Ome tlamantli: Tikneki timotlakentis ken oksekimej motlakentiaj para inmiuan timouikas.
Se telpochtli tlen itoka Manuel, okijto: “Miakej motlakentiaj ijkon ken oksekimej motlakentiaj porque tlamo kinteneuaj”. Se ichpochtli tlen itoka Anna, okijto: “Tiknekij toyolikniuan touan mamouikakan uan amo san timotlakentiskej ken yejuan”.
Se tlamantli kuali tlen mitspaleuis: Biblia kijtoua: “Ayakmó xinemikah kemi nemih n tlaltikpaktlakah” (Romanos 12:2). Xikita motlaken tlen tikpia uan ximotlajtlani:
“¿Tlen nimokuayejyekoua ijkuak nikpejpena notlaken?”
“¿Nikneki notlaken mayeto sapanoua patio?”
“¿Nikneki oksekimej makitakan nimoyektlakentia?”
Tlen mitspaleuis: Ximokuayejyeko ken timotlakentis uan amo san xikita ken motlakentiaj oksekimej para ijkon tikchiuas uan mouan mamouikakan. Noijki amo ximokuayejyeko timotlakentis ken youejka omotlakentiayaj para amikaj mouan mamouika. Amo mitstekipachos tlen mokuayejyekoskej oksekimej tla mitspaktia ken timotlakentia uan amo san tikchiua tlen oksekimej kichiuaj.
Eyi tlamantli: Timokuayejyekoua okachi kuali mamota monakayo ijkuak timotlakentia.
Se ichpochtli tlen itoka Jennifer, okijto: “Ualeua nikneki nimotlakentis tilinki, tepontik noso niktlalis notlaken tlen kiteititia nonakayo”.
Se tlamantli kuali tlen mitspaleuis: Biblia kijtoua: “Amo san ximochijchiwakah ik pánixko [...]. Yej xiyetokah tlakualtsi ik tlaijtik, itech nomoyolo” (1 Pedro 3:3, 4). Ximokuayejyeko tlen kijtoua nin texto uan xikita tlen okachi ipati. ¿Okachi ipati ken timotlakentia noso okachi ipati tikchiuas tlen kuali?
Tlen mitspaleuis: Okachi kualtsin timotas tla timotlakentis amo sapanoua patio. Axkan miakej amo ijkon motlakentiaj pero ximokuayejyeko:
Xamo se tonal yotimotlapoui ikaj iuan tlen san nochipa kijtoua tlen ye kichiua. Pero ijkuak ikaj ijkon kichiua oksekimej ayakmo kinekij iuan mouikaskej.
Ken timotlakentiaj ijkon ken timotlapouiaj, ijkuak san tikneki mamitsitakan uelis oksekimej amo kinpaktis
Xamo noijki ayakmo kinekiskej mouan mouikaskej tla amo kualtsin timotlakentis. Ijkuak motlaken kiteititia tikneki mamitsitakan, oksekimej uelis mokuayejyekoskej timoueyineki noso amo tikmati tlen tikchijtok. Noijki uelis tikchiuas oksekimej mamokuayejyekokan tlen amo kuali.
Xiyeto tiyolyamanki uan amo xikchiua oksekimej mamokuayejyekokan tlen amo melauak tikneki tikchiuas. Se ichpochtli tlen itoka Monica okijto: “Tla timotlakentis amo sapanoua patio amo kijtosneki moneki timotlakentis ken motlakentia mositsin. Kijtosneki tikneki mamitstlakaitakan uan tikintlakaita oksekimej”.
