WAUT JUNGE MENSCHEN WEETEN WELLEN
Waut wiest daut äwa die, woo du die kjleetst?
Woosoo sust du doa waut om romjäwen, woo du die kjleetst? Daut es, wäajens diene Kjleedie väl von die sajcht. Waut denkjen de Menschen von die, wan dee seenen, woo du die auntrakjst?
Dree groote Fäla äwa Kjleedie, un woo eena dee kaun utem Stich gonen
Fäla #1: Die waut auntrakjen, bloos wiels du Aunjebots doavon sitst.
Eene Jugentliche, waut Theresa heet, sajcht: “Eenjemol jleich ekj wesse Kjleedie, wäajens daut niemootsch es un ekj soo väl Aunjebots doavon see”. See sajcht uk, daut wan eena emma sitt, daut aundre jewesse Kjleedie aunhaben, dan well eena sikj uk soo auntrakjen.
Aunjebots von Kjleeda doonen nich bloos aun Mejales waut. Een Buak sajcht, daut uk Junges sikj wellen soo auntrakjen, aus daut Mood es (The Everything Guide to Raising Adolescent Boys). Daut Buak sajcht uk noch, daut dee mau rajcht von sea junk aun aul Aunjebots seenen, waut doatoo sent toom an de Mood enjankren.
Proow dit: De Schreft sajcht: “Een Noa jleeft irjentwaut, oba een vestendja Maun bedenkjt sikj siene Wäaj” (Spricha 14:15, PB). Lia aulsoo, goot doaräwa notodenkjen, to waut de Aunjebots jemoakt sent un waut dee die doamet vekjeepen wellen. Biejlikj wan du Aunjebots sitst von oppreizende Kjleeda, dan denkj äwa dit no:
“Wäa moakt doa daut mieeschte Jelt bie, wan ekj dise niemootsche Kjleeda kjeep?”
“Waut wudden aundre Menschen von mie denkjen, wan ekj mie dise Kjleeda auntrakj?”
“Wiest daut wäa ekj werkjlich sie un waut ekj jleew?”
Rot äwa Kjleedie: Acht mol fa eene Wäakj goot doaropp, waut vonne Kjleedie äwa Tellewizhen, em Internet ooda en Bieekja aunjeboden woat. Waut proowen dee to lieren, äwa waut fa een Läwen eena fieren saul? Proowen dee die entobillen, daut du soone Sort Kjleeda motst brucken? Eene Jugentliche, waut Karen heet, sajcht: “De Druck es sea stoakj, daut eenem saul volkomen loten, daut eena sikj saul sea schmock auntrakjen un daut eenem sien Kjarpa saul volkomen sennen”. See sajcht uk noch: “Dee, waut Kjleedie aunbeeden, weeten daut, daut junge Menschen sikj soo aus dit feelen, un dee nutzen daut ut.”
Fäla #2: Die krakjt soo auntrakjen aus de aundre toom bie dee biepaussen.
Een Jugentlicha, waut Manuel heet, sajcht: “Wan eene jewesse Sort Kjleeda Mood sent, dan woaren aula wellen soone Kjleeda haben. Un wan du die nich soo auntrakjst, dan woaren dee schlajcht äwa die räden.” Eene Jugentliche, waut Anna heet, stemt doa met en un sajcht: “Daut jeit noch dolla doarom, bie de aundre bietopaussen, aus om de Mood”.
Proow dit: De Schreft sajcht: “Stalt junt nich soo han aus dise Welt deit” (Reema 12:2, PB). Toom disen Rot nokomen, see diene Kjleeda mol derch un dan denkj aun dit:
“Wuarom trakj ekj mie soo aun, aus ekj doo?”
“Woo wichtich es daut fa mie, eene besondre Sort Kjleeda to brucken?”
“Sellen aundre von mie wunda denkjen, wäajen dee Kjleeda, waut ekj bruck?”
Rot äwa Kjleedie: Väl junge Menschen jleewen vondoag dän Dach, daut see bloos dan von aundre woaren goot aunjeseenen sennen, wan see sikj soo auntrakjen, aus daut dan jroz Mood es. Oba wan eena von sikj selfst goot denkjt, dan moakt eena sikj nich soo väl Sorjen äwa daut, waut aundre von eenem denkjen.
Fäla #3: Denkjen: “Je oppreizenda je bäta”
Eene Mejal, waut Jennifer heet, sajcht: “Rajcht jesajcht jankat eenem daut eenjemol, sikj waut auntotrakjen, waut een bät too kort, too enj ooda too kol es”.
Proow dit: De Schreft sajcht: “Lot jun Schmuck nich” von buten sennen. “Lot jun Schmuck leewa een stella, leeftolja Jeist em Hoat sennen!” (1. Petrus 3:3-4, PB). No disen Rot no, waut es wichtja: schmock to loten ooda een gooda Mensch to sennen?
Rot äwa Kjleedie: Waut es daut, waut eenen Mensch werkjlich schmock moakt? Daut es, veninftich to sennen, wan daut vondoag dän Dach uk nich sea Mood es. Oba denkj mol äwa dit no:
Hast du mol met wäm vetalt, waut too sea von sikj selfst rät? Dee well haben, daut de Menschen sellen wunda von dän denkjen. Oba dee woat daut veleicht goanich en, daut aundre dän, krakjt wäajens dee soo es, dan nich jleichen.
Krakjt soo aus de Menschen daut nich jleichen, wan doa wäa bloos emma von sikj selfst rät, jleichen dee daut uk nich, wan sikj wäa soo auntrakjt, daut aula bloos sellen no dän kjikjen
Wan du die nich veninftich auntrakjst, kaun die daut krakjt soo gonen. Waut wudden aundre kjennen von die denkjen, wan du die soo auntrakjst, daut aundre Menschen sellen no die kjikjen? Dee wudden kjennen denkjen, daut du die nich secha feelst äwa die selfst ooda daut du bloos aun die selfst denkjst. Un doaderch kjennen aundre uk de orrajchte Iedee kjrieen un denkjen, daut du reed best, aules to doonen toom daut de Menschen no die kjikjen woaren. Un daut kunn mau rajcht de orrajchte Menschen no die trakjen.
Wan du daut nich west, dan trakjt die leewa veninftich aun. Monica, eene Jugentliche, sajcht: “Die veninftich auntrakjen, meent nich, daut du die motst soo aus eene Groosmame auntrakjen”. See sajcht: “Daut meent bloos, daut eena sikj selfst respakjten deit un uk de aundre rom eenem.”
Veleicht jleichst du uk dit
WAUT JUNGE MENSCHEN SAJEN
Wuarom sie ekj soo besorcht, woo mie lat?
Lia, woo du diene Jefeelen kontrollen kaust.
WAUT JUNGE MENSCHEN SAJEN
Waut junge Menschen sajen äwa woo eenem lat
Wuarom kaun daut fa junge Menschen schwoa sennen, nich too sea doaräwa beduat to sennen, woo eenem lat? Waut kaun dee halpen?
