O TERNE PUĆENA
Savo tano mo urajbe?
Sose tano važno sar uraveja tut? Odolese so to urajbe vaćeri diso tutar. So toklo urajbe mothovi tutar?
Trin zamke hem sar šaj te izbegnine len
Prvo zamka: Te mukha o manuša ki televizija hem ko internet te utičinen ko amaro urajbe
I tinejdžerka koja vićini pe Tereza phenela: „Podijekh puti disave šeja kola tane ki moda but sviđinena pe maje sose dikhljum len ko but reklame. Ked tani ti godi pherdi slikencar ando manuša kola akharena odola šeja, pharo tano hem tu te na mange isto odova.“
O reklame na utičinena samo ko ćhaja. I knjiga The Everything Guide to Raising Adolescent Boys phenela: „Hem o ćhave vodinena računi andi moda. Đi tane pana tikne ćerena pe o reklame kola ka utičinen upro olende.“
Soj tano pošukar: I Biblija phenela: „O neiskusno manuš verujini ko sa, ama o gođalo manuš šukar razmislini ando sa so ćerela“ (Poslovice 14:15). Sar so phenela akava savet, sikljov te razmisline ando odova so dikheja ko reklame, a na te verujine ko sa so dikheja. Na primer, ako tano o cilj andi disavi reklama te mothovi so ka izgledine izazovno ako ađahar uraveja tut, puć tut:
„Ko ćaće zaradini ako pratinava odija moda?“
„Ako ađahar ka uravav man, kasa o manuša ka povezinen man?“
„Da li asavko urajbe ćaće ka mothovi ko hijum me hem savo hijum?“
Savet andi moda: Kurko dive dikh kola šeja reklamirinena pe hem razmislin savi poruka asavko urajbe bićhali. Da li tani garavdi poruka andi odija reklama so valjani te pratine odija moda? I tinejdžerka koja vićini pe Karen, phenela: „But tano baro pritisak te izgledine savršeno, te urave tut savršeno hem te mothove kobor hijan zgodno. Okola so ćerena o reklame, đanena so o terne tane but lokhi meta“.
Dujto zamka: Pratineja i moda te šaj te ove sar sa avera.
O tinejdžer kova vićini pe Manuel phenela: „Ako tano disavo šej ki moda, sare ađahar ka uraven pe. Ama ako hem tu na akhareja isto odova, o manuša ka osudinen tut“. I tinejdžerka koja vićini pe Ana složini pe odoleja hem phenela: „Nane odobor važno da li tano diso moderno, kobor tano važno te ove sar sa avera“.
Soj tano pošukar: I Biblija phenela: „Ma mukhen hem ponodri te oblikujini tumen akava sveto“ (Rimljanima 12:2). Premalo akava savet, šukar tano te phrave to ormari, te dikhe o šeja kola isi tut hem te puće tut:
„So utičini ko moklo urajbe?“
„Kobor tano maje važno te oven man markirime šeja?“
„Da li mangava o manuša te divinen pe maje ked dikhena sar uravava man?“
Savet andi moda: Umesto te misline so isi samo duj opcije – te ove moderno hem avera te prihvatinen tut ja te na ove moderno hem avera te odbacine tut, razmislin hem andi trito opcija – te ove sigurno ano tute. Ked hijan zadovoljno kokri tuvaja, tegani na ka ovel tuće važno da li ka ove sar sa avera.
Trito zamka: So pobuter to urajbe tano poizazovno, odova tano pošukar.
I ćhaj koja vićini pe Dženifer, phenela: „Podijekh puti mangava te uravav diso soj tano izazovno, tesno, phravdo, kratko“.
Soj tano pošukar: I Biblija phenela: „Ma mukhen tumaro šužipe te ovel samo avrijal. . . nego nek šužjaćeri tumen okova soj tano garavdo ko vilo“ (1. Petrova 3:3, 4). Sar so phenela akava savet, soj tano pošukar, te ove šužo samo avrijal, ja te ove šužo andral?
Savet andi moda: I skromnost tani najšužo „modno detalji“. Ćaće, odova lafi avdije nane popularno. Ama, razmislin akalestar ko akava način:
Da li nekad vaćerđan nekasa ko but vaćeri hem samo vaćeri pestar? Odija osoba na đanela so ađahar samo cidela tut pestar.
Ked neko stalno vaćeri kokri pestar, ov cidela e manušen pestar. Isto ađahar, o urajbe kova bićhali poruka „dikh man“ cidela e manušen tutar.
Ako to urajbe nane skromno, tu hijan sar odija osoba. To urajbe bićhali poruka „dikh man“, hem sebepi odova ili ka ove nesigurno ili ka ove ponosno – ja o solduj. Isto ađahar, odova šaj te ćhivel tut te rode pažnja čak ando pogrešna manuša.
Umesto te reklamirine diso so na bikneja, ov skromno. I tinejdžerka koja vićini pe Monika, phenela: „Odova so hijan skromno na značini so valjani te urave tut sar ti baba. Odova značini so poštujineja kokri tut hem averen“.
