И ТЭРНЭ МАНУША ПУШЭН
Сар мэ утидавпэ?
Васо трэбуй тэ диқэс, сар ту утидэспэ? Важ кода кай па тири ӥда авэр моӷут бут со тэ полэн пала кода, саво ту мануш. Ай со пала тутэ полэн мануша, кала диқэн, сар ту утидэспэ?
Трин барэ ошыбки, и сар лэн тэ на стерэс
Ошыбка № 1. Тэ утидэспэ точно кадя, сар сыкавэн андо реклама
Ек тэрни ракли, савя ақарэн Териза, ԥэнэн: «Бывает кадя, кай манди чалёл варисави ӥда кати важ кода, кай ла вся и время рекламируют. Кала вся и время попэрдёлпэ пэ яқа модно ӥда, тожэ камэлпэ кацави ӥда пэсти».
Но тэ утидэнпэ модно камэн най кати щея. Андо ек книжка пистрояспэ: «Шавэ тожэ камэн тэ утидэнпэ модно. Важ лэндэ часто важно, со щяс модно, ай со най» (The Everything Guide to Raising Adolescent Boys).
Сар правильно. Андэ Библия пистромэ: «Мануш, савэс вушэро тэ обдилярэн, патял любонэ алавэсти, ай годявэрно обгиндой, со лэла тэ терэл» (Притчи 14:15). Кадэла алава сыкавэн, кай трэбуй тэ полас, васо кадэя ӥда щяс модно. Например, если пала варисави ӥда ԥэнэн, кай вой важ и смили мануша и драго подчёркивает и тила, тоди пуш пэстар:
«Если мэ лава тэ утидавпэ кадя, касти па чачимастэ кадэлэстар авэла драго?
На погиндона авэр, кай мэ утидавпэ билажаврдэс?
Если мэ лава пэр пэстэ кацави ӥда, авэр правильно полэна, саво мэ мануш и со важ мандэ важно?»
Совето. Вся о курко шув сама пэ кода, со щяс модно и погиндосар: сар жувэн и сар андярэн пэс мануша, савэ кадя утидэнпэ? Кала ту диқэс реклама, кай сыкавэн модно ӥда, на появийпэ тутэ кацаво гиндо, кай тути обязательно трэбуй тэ утидэспэ кадяжэ. Ек тэрни манушни ԥэнэн: «Мода кабута тасавэл пэр тутэ, заставий, кай ту тэ выӷлядиш идиально, тэ утидэспэ идиально и тэ авэл тутэ идиально фигура. Кодэла, ко терэл и реклама, драго полэн, кай тэрнэ мануша вушэро подэнпэ кодэлэсти, со диқэн».
Ошыбка № 2. Тэ утидэспэ модно, кай тэ авэс пэско важ авэр.
Тэрно мануш, савэс ақарэн Маньюэл, ԥэнэн: «Если варисави ӥда щяс модно, тоди всаворэ старыинпэ тэ утидэнпэ кадя. Ай если ту на терэс кадяжэ, тут на полэн». Авэр щей Анна соӷласно кадэлэ алавэнца. Вой ԥэнэн: «Дила най кати андэ када, со модно, ай со най. Просто камэлпэ тэ авэс сар всаворэ и тэ на авэс сар белая ворона».
Сар правильно. Андэ Библия пистромэ: «Будэр на домэкэн, кай о миро тэ парувэл тумаро гиндо» (Римлянам 12:2). Сэр пала кадэла алава и продик вся пэсти ӥда, сави тутэ исин и пуш пэстар:
«Со влияет пэ кода, сави ӥда мэ витидав важ пэстэ?
Пэ скати важ мандэ важно тэ авэн мандэ фирмени, путярдэ кирпэ?
Камав мэ, кай авэр тэ шон сама пэ кода, сар мэ выӷляжу и сави мандэ ӥда?»
Совето. Бывает мануш диқэл кати дуй варианторя важ пэстэ. Или тэ авэл модно, и значит всаворэнди тэ чалёл, или совсем на шол сама, сар во утидо, и значит никасти тэ на чалёл. Но можно тэ терэс и по аврятэ. Ту можэш тэ утидэспэ кадя, кай и тути тэ чалёл и кай ту тэ чуствуеш пэс уверено. Со май уверено ту пэс чуствуеш, со май мало тути камэлапэ тэ утидэспэ сар авэр.
Ошыбка № 3. Тэ утидэспэ най сэжо и кай май бут дицол и тила — када драго
Тэрни ракли, савя ақарэн Дженнифер, росԥэнэн: «Если тэ ԥэнав сар исин, дэкала камэлпэ тэ утидэспэ най сэжо, например, тэ лэс пар пэстэ ӥда, сави фартэ скурто или фартэ обцырдэл или кай фартэ дицол и тила».
Сар правильно. Андэ Библия пистромэ: «Мэк тумэн вурявэл най кода, со дицол... ай кода, со андо ди» (1 Петра 3:3, 4). Кадэва принцыпо сыкавэл, кай кода, саво мануш па чачимастэ май важно, чем кода модно во утидо чи най. Ай со май важно важ тутэ?
Совето. Само модно украшэния — када кала мануш скромно. Канешно, андэ амари время кадя мало ко гиндой. Но погиндосар акэ пала со.
Ӷанэс ту кацавэ манушэн, савэ дэн дума кати пала пэстэ? Кацавэ мануша дажэ и на полэн, кай через када авэр на камэн лэнца тэ дружын.
Па амари ӥда, сар и па амари дума, авэр моӷут тэ полэн, кай амэ любисарас кати корко пэс. И када на чалёл аврэнди
Кала мануш утидэлпэ най сэжо, во и ашэл кацавэ манушэса. Кацавя ӥдаса во кабута ԥэнэн: «Шон сама пэр мандэ!» Кадя мануш терэл, кала во неуверено андэр пэстэ, или кала во гиндой кати пала пэстэ. И кода и кода найдраго. Ригатар можэт тэ здэлпэ, кай манушэсти фартэ трэбуй, кай пэр лэстэ тэ шон сама, мэк дажэ и найдраго шон сама.
На утидэпэ кадя, кай авэр нэ правильно тэ полэн тут. Сэр, кай кала мануш сэжо, када со май лашо нарядо. «Тэ утидэспэ сэжо нэ значит, кай ту трэбуй тэ утидэспэ сар тири баба, — ԥэнэн ек ракли Моника. — Тэ утидэспэ сэжо, када значит тэ стос патив пэр пэстэ и пэ авэр».
