PERGUNTA HUSI JOVEN SIRA

Haʼu-nia roupa hatudu saida kona-ba haʼu?

LOKE

Tanbasá tenke hanoin kona-ba saida mak Ita hatais? Tanba roupa neʼebé Ita hatais hatudu sai Ita mak ema hanesan saida. Ita-nia roupa hatudu saida kona-ba Ita?

Sala tolu neʼebé ema halo kona-ba hatais no oinsá atu hasees an husi buat sira-neʼe

Sala #1: Husik média mak kontrola Ita-nia dalan hatais.

Joven ida naran Teresa hatete: “Dala ruma haʼu halo tuir modelu ruma tanba haʼu haree beibeik ida-neʼe iha iklan sira. Se Ita-nia kakutak mak nakonu ho dezeñu kona-ba oinsá ema hatais roupa modelu ida, susar tebes atu la kopia tuir sira.”

Laʼós joven feto deʼit mak hetan influénsia husi iklan sira kona-ba roupa. Livru The Everything Guide to Raising Adolescent Boys hatete: “Joven mane sira mós preokupa demais ho hatais roupa neʼebé jeitu. Husi kiʼik kedas joven mane sira hetan influénsia boot husi iklan sira.”

Hanoin toʼok: Bíblia hatete: “Ema neʼebé la iha esperiénsia tau fiar ba liafuan hotu, maibé ema neʼebé matenek hanoin didiʼak kona-ba ninia hakat ida-idak.” (Provérbios 14:15) Tuir matadalan neʼe, keta lalais atu monu ba iklan nia lasu sira. Porezemplu, bainhira haree iklan kona-ba roupa sira neʼebé mak “jeitu”, “badak” ka “seksi”, husu ba Ita-nia an:

‘Se haʼu hatais roupa neʼe, sé mak hetan benefísiu?’
‘Ema sei hanoin saida kona-ba haʼu?’
‘Haʼu-nia dalan hatais hatudu saida kona-ba haʼu-nia moris no fiar?’

Sujestaun: Durante semana ida, haree didiʼak iklan no média sira neʼebé koʼalia liuliu kona-ba roupa sira. Sira hakarak Ita atu halo tuir dalan moris hanesan saida? Iha mensajen neʼebé sira hatoʼo subasubar atu halo Ita hanoin katak Ita tenke halo tuir ida-neʼe ka lae? Joven feto ida naran Karen hatete: “Iha presaun makaʼas atu haree perfeitu, hatais roupa diʼak, no hatudu ita-nia isin neʼebé ‘perfeitu’. Ema sira neʼebé halo iklan hatene kona-ba neʼe, tan neʼe fasil ba sira atu dada joven sira-nia atensaun.”

Sala #2: Halo tuir modelu neʼebé famozu atu haree hanesan deʼit ho ema seluk.

Joven ida naran Manuel hatete: “Se roupa ho modelu ruma mak famozu hela, ema barak sei uza roupa neʼe. Se Ita la hatais buat neʼebé hanesan, ema sei tesi lia kedas.” Joven ida naran Ana konkorda no hatete: “Neʼe laʼós kona-ba halo tuir modelu roupa neʼebé famozu, maibé kona-ba Ita-nia kolega sira sei gosta Ita ka lae.”

Hanoin toʼok: Bíblia dehan: “Keta halo tuir mundu ohin neʼe.” (Roma 12:2) Tuir matadalan neʼe, loke toʼok Ita-nia armáriu no husu ba Ita-nia an:

‘Saida mak fó influénsia ba haʼu bainhira hili roupa?’
‘Roupa husi kompañia famozu mak importante tebes mai haʼu ka lae?’
‘Haʼu koko atu halo ema gosta haʼu ho haʼu-nia dalan hatais ka lae?’

Sujestaun: Keta hanoin katak iha deʼit opsaun rua, roupa ho modelu neʼebé famozu ka roupa ho modelu neʼebé la jeitu ona. Iha mós opsaun terseiru, neʼe mak roupa neʼebé halo Ita sente kmaan no fiar an. Se Ita fiar an, Ita sei ladún preokupa kona-ba Ita-nia kolega sira sei gosta Ita ka lae.

Sala #3: Hanoin katak “seksi liután, ema barak sei gosta liután”.

Joven ida naran Jennifer hatete: “Loloos, dala ruma haʼu mós hakarak atu uza roupa neʼebé seksi, hanesan roupa neʼebé badak demais, aperta demais ka nakloke demais.”

Hanoin toʼok: Bíblia hatete: “Keta hafurak imi-nia an iha liʼur deʼit, . . . maibé imi tenke hafurak imi-nia laran.” (1 Pedro 3:3, 4) Tuir matadalan neʼe, hanoin toʼok saida mak diʼak liu, bonita iha liʼur ka iha laran.

Sujestaun: Buat neʼebé importante mak hatais ho respeitu. Dala barak, ema hanoin katak hatais ho respeitu mak antigu. Maibé, hanoin toʼok:

Ita konversa ona ho ema neʼebé koʼalia barak loos no koʼalia deʼit kona-ba ninia an ka lae? Aat liután mak ema neʼe la nota katak ninia hahalok halo Ita sente baruk ho nia.

Hanesan ho konversa, roupa neʼebé Ita hatais bele halo ema baruk no dada an husi Ita

Kuandu Ita hatais iha dalan neʼebé la respeitu, Ita atu hanesan ho ema neʼe. Neʼe hanesan Ita-nia roupa hatete, ‘hateke mai haʼu’. Neʼe bele book ema atu hanoin katak Ita hatais hanesan neʼe tanba la fiar an ka sente Ita mak importante liu hotu—ka rua-rua. Ema mós sei haree Ita nuʼudar ema neʼebé kaan buka atensaun, liuliu iha dalan neʼebé sala.

Se Ita lakohi ema atu hanoin sala kona-ba Ita, diʼak liu hatais ho respeitu. Joven ida naran Monica hatete: “Hatais ho respeitu laʼós katak hatais hanesan Ita-nia avó-feto. Maibé neʼe katak Ita respeitu Ita-nia an rasik no ema seluk neʼebé haleʼu Ita.”