Cayuni armárcabe caadxi cercha de aceru para ique ca edificiu ra chindézacabe C.

Rihuinni guiiguʼ nuu Sterling Forest (Blue Lake) ladu gueteʼ ra cabí ca edificiu riʼ. Raríʼ huaquiiñecabe dede 13 grúa oraqueca. Frente ca rihuinni caguíxhecabe concretu (hormigón) para ca base stiʼ edificiu ra chindézacabe B.

Maʼ nuu ca columna ne viga de aceru listu para iquiiñeʼ. Cumu caquiiñecabe armazón ra cayúnicabe ca edificiu riʼ rudii ni lugar chuʼ espaciu ne ganda guilúxecabe dxiiñaʼ riʼ biaʼ tiempu maʼ gudíxhecabe.

Ti grupu de binni cayuni armarcaʼ caadxi de ni chigataʼ ique ca edificiu ra chindézacabe C, renda ni panel de guiibaʼ ne lari ni qué ridiʼdiʼ nisa. Atrá de laani cayuni armárcabe sti ndaa de ique edificiu ca.

Cutiidicabe ti gubaʼyaʼ huiiniʼ ti hombre ni caguu drenaje para bañu.

Caguucabe caadxi viga de aceru ca squina nuu ladu suroeste stiʼ ca edificiu que. Ladu riʼ ziuu guzina, comedor, lavandería ne xcaadxi departamentu ni zacané laacabe.

Pader riʼ gúcani para gúnicabe ti prueba de ca tono ni chiguiquiiñecabe lu mezcla ne para gúʼyacabe ximodo chigucaacabe ladríu luni. Laaca biquiiñecabe ni para gusiidicabe ca albañil ni nacubi yendá. Lu foto riʼ rihuinni ti hombre candaa pader riʼ purtiʼ maʼ cadi caquiiñecabe ni.

Candisaʼ ti grúa galaa estructura stiʼ ique edificiu riʼ. Ca squina stiʼ ca edificiu riʼ bíʼnicabe ique ni de dos aguas para guihuinni cani jma galán dede zitu.

Caguucabe ti tanque gas de 95,000 litru (25,000 galón). Zaquiiñecabe gas riʼ para ca caldera.

Modo rihuinni edificiu riʼ ladu gueteʼ. Squina ladu derechu ca rihuinni ti lago. Pur guiráʼ color ne tipu ladi cani, zahuinni ca edificiu riʼ jma galán.

Rihuinni ti guendaxheelaʼ, guirópacaʼ plomeru (fontaneru), cayuni instalarcaʼ caadxi tubu para cheʼ nisa ante quíxhecabe concretu (hormigón) stiʼ pisu.

Caadxi binni cusiacaʼ ique yoo ra nuu nieve.

Cayuuyaʼ ti guendaxheelaʼ ca dxiiñaʼ ni naquiiñeʼ gaca de plomería.

Neca cayaba nieve, qué rusaana de guindaacabe guiráʼ ra caquiiñeʼ chuʼ ca estructura stiʼ ca edificiu que ne guni colárcabe ni né concretu (hormigón). Squina riaana ladu bigaʼ stiʼ foto riʼ, rihuinni modo nuchii ti lona de plásticu lu tobi de ca edificiu ca. Rúnicabe ni, purtiʼ zacá zándaruʼ gaca dxiiñaʼ para quíxhecabe concretu ne rúnicabe dxiiñaʼ né ti material ni riquiiñeʼ para cadi chaquiʼ raqué, ca dxiiñaʼ riʼ naquiiñeʼ gaca cani ti lugar ra cadi tan nandáʼ o nananda.

Cayuni instalar caadxi hombre ti lámina nalaseʼ de vapor lu caadxi columna de concretu (hormigón) ne lu ca repisa ante gucaacabe ca panel que cueʼ ni.

Sicaríʼ rihuinni cani dede luguiáʼ ladu oeste. Zanda gúʼyaluʼ lu foto riʼ modo rihuinni ca edificiu ra chindézacabe. Yoo naquichiʼ rihuinni galahuiʼ ca nga ca oficina ne ra runi tendércabe familia Betel. Jma de ti 100 hectárea nga napa guidubi layú ca, ne 20% de lu layú stini nga cabí ca edificiu riʼ. Guiráʼ ca yaga nuu luni, zanda guininu caʼruʼ lica cánacabe ni.

Sicaríʼ rihuinni cani dede luguiáʼ ladu rindani gubidxa. Zanda gúʼyaluʼ lu foto riʼ modo rihuinni ca edificiu ra chindézacabe C ne D. Lu edificiu ra chindézacabe C rihuinni caadxi binni cayuni dxiiñaʼ, cayuni instalarcaʼ caadxi panel de guiibaʼ para guiluxe íqueni ni rábicabe de dos aguas.

Cayuni instalar ti carpinteru ti pisu de yaga ndaaniʼ ti cuartu. Nuu tapa modelu ni zándaca iquiiñecabe para ca cuartu riʼ. Ca modelu riʼ maca nécani xi color pintura chiné ni, alfombra stini (moqueta), pisu, azuleju ne mexaʼ stini.

Rundúxecabe ca pisu de concretu que lu nácabe para gandagaa ni ti ganda guxooñeʼ nisa ni.

Cayuni instalar ti técnicu de 77 iza ti cable de fibra óptima. Zaquiiñecabe jma de 30 kilómetru de clase cable riʼ dede ora guiluxe dxiiñaʼ riʼ.