বাইবেলত লিখা আছে যে যিহোৱা সত্য ঈশ্বৰ হয় আৰু তেওঁ সকলো বস্তু সৃষ্টি কৰিছে। (প্ৰকাশিত বাক্য ৪:১১) ভৱিষ্যতবক্তা অব্ৰাহাম, মোচি আৰু যীচুৱে যিহোৱাৰ উপাসনা কৰিছিল। (আদিপুস্তক ২৪:২৭; যাত্ৰাপুস্তক ১৫:১, ২; যোহন ২০:১৭) যিহোৱা কেৱল এখন ৰাষ্ট্ৰৰ ঈশ্বৰ নহয়, তেওঁ “গোটেই পৃথিবীৰ ওপৰত মহান ৰজা।”—গীতমালা ৪৭:২.

 বাইবেলত উল্লেখ আছে যে ঈশ্বৰৰ এটা নাম আছে আৰু সেয়া হৈছে, যিহোৱা। (যাত্ৰাপুস্তক ৩:১৫; গীতমালা ৮৩:১৮) হীব্ৰু ভাষাৰ এটা ক্ৰিয়াপদৰপৰা যিহোৱা নামটো ওলাইছে, যাৰ অৰ্থ হৈছে “হোৱা।” বহুতো বিদ্বানে বিশ্বাস কৰে যে ঈশ্বৰৰ নামৰ অৰ্থ হৈছে, “তেওঁ যি বিচাৰে, সেয়েই হʼব পাৰে।” যিহোৱাৰ ক্ষেত্ৰত এই নামটো একেবাৰে সঠিক। কিয়নো তেওঁ সকলো বস্তুৰ সৃষ্টিকৰ্তা আৰু নিজৰ উদ্দেশ্য পূৰ কৰোঁতা ঈশ্বৰ হয়। (যিচয়া ৫৫:১০, ১১) বাইবেলত উল্লেখ আছে যে তেওঁ কেনেধৰণৰ ঈশ্বৰ আৰু তেওঁৰ কি কি গুণ আছে। ইয়াত এয়াও উল্লেখ আছে যে তেওঁৰ প্ৰধান গুণ হৈছে প্ৰেম।—যাত্ৰাপুস্তক ৩৪:৫-৭; লূক ৬:৩৫; ১ যোহন ৪:৮.

 হীব্ৰু ভাষাত ঈশ্বৰৰ নাম এই চাৰিটা আখৰত লিখা হয় יהוה (YHWH)। প্ৰাচীন সময়ত হীব্ৰু ভাষাত ঈশ্বৰৰ নামটো কেনেকৈ উচ্চাৰণ কৰা হৈছিল, তাৰ বিষয়ে আজি আমি নাজানোঁ। কিন্তু অসমীয়া ভাষাত ঈশ্বৰৰ নামৰ উচ্চাৰণ হৈছে, “যিহোৱা” আৰু অসমীয়া ভাষাৰ এই নামটো বহুবছৰৰপৰা ব্যৱহাৰ কৰি অহা হৈছে। ইংৰাজী ভাষাত ঈশ্বৰৰ নাম হৈছে, “জেহʼৱা।” ইংৰাজীত প্ৰথমবাৰ ঈশ্বৰৰ নাম উইলিয়াম টিডেলৰ বাইবেলত পোৱা গৈছিল, যি ১৫৩০ চনত ছপা কৰা হৈছিল। a

প্ৰাচীন সময়ত হীব্ৰু ভাষাত ঈশ্বৰৰ নাম কেনেকৈ উচ্চাৰণ কৰা হৈছিল, তাৰ বিষয়ে আজি আমি কিয় নাজানোঁ?

 প্ৰাচীন হীব্ৰু ভাষা লিখাৰ সময়ত কেৱল ব্যঞ্জনবৰ্ণ লিখা হৈছিল, তাত স্বৰবৰ্ণ যোগ কৰা নহৈছিল। কিন্তু পঢ়াৰ সময়ত কোনটো শব্দৰ লগত কি স্বৰবৰ্ণ যোগ দিব লাগে, তাৰ বিষয়ে লোকসকলে জানিছিল। হীব্ৰু শাস্ত্ৰ অৰ্থাৎ “পুৰণি নিয়ম” লিখাৰ পাছত যিহূদীসকলে অন্ধবিশ্বাস কৰিছিল যে ঈশ্বৰৰ নাম ব্যৱহাৰ কৰাটো ভুল হয়। সেইবাবে, ঈশ্বৰৰ নাম থকা কোনো পদ পঢ়াৰ সময়ত তেওঁলোকে সেই নামৰ সলনি “ঈশ্বৰ” বা “প্ৰভু” বুলি কৈছিল। সময় অতিবাহিত হোৱাৰ লগে লগে অন্ধবিশ্বাস চাৰিওফালে বিয়পি পৰিল আৰু এনে এক সময় আহিল, যেতিয়া লোকসকলে ঈশ্বৰৰ নামৰ সঠিক উচ্চাৰণ পাহৰি গʼল। b

 কিছুমান বিদ্বানে ভাবে যে ঈশ্বৰৰ নামৰ সঠিক উচ্চাৰণ “ইয়াহৱে” হয়, কিন্তু আন কিছুমানে বেলেগ ধৰণে উচ্চাৰণ কৰে। মৃত সাগৰৰ ওচৰত লেবীয়া পুস্তকৰ এটা অংশ পোৱা গৈছিল, যি গ্ৰীক ভাষাত লিখা হৈছিল। তাত ঈশ্বৰৰ নাম য়াও বুলি লিখা হৈছিল। প্ৰাচীন সময়ৰ কিছুমান গ্ৰীক লেখকৰ মতে ঈশ্বৰৰ নামৰ উচ্চাৰণ য়ায়ে, য়াবে বা য়াওবে বুলিও কৰা হৈছিল। কিন্তু আমি দাঠি কʼব নোৱাৰোঁ যে প্ৰাচীন সময়ত হীব্ৰু ভাষাত ঈশ্বৰৰ নাম কিদৰে উচ্চাৰণ কৰা হৈছিল। c

ঈশ্বৰৰ নামৰ বিষয়ে কিছুমান ভুল ধাৰণা

 ভুল ধাৰণা: হীব্ৰু ভাষাত ঈশ্বৰৰ নাম কেনেকৈ উচ্চাৰণ কৰা হৈছিল, সেয়া আমি নাজানোঁ। সেইবাবে, আমি তেওঁৰ নাম ব্যৱহাৰ কৰা উচিত নহয়।

 সত্যতা: কিছুমান লোকে ভাবে যে আমি যিয়েই ভাষা নকওঁ কিয়, আমি সকলোৱে ঈশ্বৰৰ নাম একেধৰণে ব্যৱহাৰ কৰাটো ঈশ্বৰে বিচাৰে। বাইবেলৰপৰা আমি বুজিব পাৰোঁ যে প্ৰাচীন সময়ত ঈশ্বৰৰ সেৱকসকলে বেলেগে বেলেগ ভাষাত লোকসকলৰ নাম বেলেগ বেলেগ ধৰণে উচ্চাৰণ কৰিছিল।

 উদাহৰণস্বৰূপে, ইস্ৰায়েলীসকলৰ বিচাৰকৰ্তা যিহোচূৱাৰ বিষয়ে কʼব পাৰি। হীব্ৰু ভাষা কোৱা আৰম্ভণিৰ খ্ৰীষ্টানসকলে তেওঁক য়েচুৱা বুলি কৈছিল। কিন্তু গ্ৰীক ভাষা কোৱা লোকসকলে তেওঁক ইচুওচ বুলি কৈছিল। বাইবেলত যিহোচূৱাৰ হীব্ৰু নামটো গ্ৰীক ভাষাটো লিখা হৈছিল। ইয়াৰপৰা বুজিব পাৰি যে সেইসময়ৰ খ্ৰীষ্টানসকলে তেওঁলোকৰ ভাষাত লোকসকলৰ নাম যিদৰে লোৱা হৈছিল, ঠিক সেইদৰেই লৈছিল।—পাঁচনিৰ কৰ্ম্ম ৭:৪৫; ইব্ৰী ৪:৮.

 ঈশ্বৰৰ নামৰ উচ্চাৰণৰ ক্ষেত্ৰতো আমি এই কথা মনত ৰাখিব পাৰোঁ। ঈশ্বৰৰ নামৰ সঠিক উচ্চাৰণতকৈ তেওঁৰ নামটো বাইবেলত যʼত উল্লেখ থাকিব লাগে, তাত উল্লেখ থকাটো অতি গুৰুত্বপূৰ্ণ।