Jehoava da di chroo Gaad weh di Baibl taak bowt, di wan weh mek evriting. (Revilayshan 4:​11) Aybraham ahn Moaziz mi wership hihn, ahn Jeezas mi wership ahn tu. (Genesis 24:27; Exodus 15:1, 2; Jan 20:17) Hihn da noh di chroo Gaad tu jos sertn peepl, bot hihn da di chroo Gaad oava “di hoal ert.”​—Psalm 47:2.

 Jehoava da Gaad speshal naym, ahn fi hihn naym deh eena di Baibl. (Exodus 3:​15; Psalm 83:18) Di naym kohn fahn wahn Heebroo verb weh meen “fi bee,” ahn wahn lata peepl weh stodi Baibl hischri bileev dat di naym meen “Hihn Wahn Mek Ih Bee er Hapm.” Ahn di meenin a fi hihn naym soot hihn, bikaaz da hihn mek evriting an ih mek ih perpos dehn kohn chroo. (Isaiah 55:10, 11) Di Baibl aalso help wi fi noa bowt di Persn weh ga da naym, ahn bowt fi hihn moas impoatant kwaliti—lov.—Exodus 34:5-7; Look 6:35; 1 Jan 4:8.

 Di naym Jehoava da di Kriol chranslayshan a di Heebroo naym fi Gaad​—di foa leta יהוה (YHWH), weh wi kaal di Tetragrammaton. Nobadi noa egzakli how fi prononks da naym eena aynshent Heebroo. Bot di naym “Jehoava” ga wahn lang hischri eena di Inglish langwij. Ahn di fers Baibl chranslayshan weh da naym mi deh eena da William Tyndale Baibl chranslayshan fahn 1530. a

Wai nobadi noa how fi prononks Gaad naym eena aynshent Heebroo?

 Eena aynshent Heebroo, dehn mi onli yooz konsonant ahn no vowel. Enibadi weh mi noa how fi taak Heebroo mi wahn noa wich vowel dehn mi need fi put een weneva dehn mi-di reed. Bot afta di Heebroo Skripchaz (“Di Oal Testiment”) mi finish, som a di Jooz mi kom op wid di bileef dat ih rang fi seh Gaad persnal naym. Soh weneva dehn mi reed wahn skripcha owt lowd, insteda seh Gaad persnal naym, dehn mi jos seh “Laad” er “Gaad.” Ahn honjridz a yaaz dong di road, ada peepl mi bileev da saym ting, soh dehn neva noa how fi prononks da naym agen. b

 Tudeh, som peepl feel laik dehn mi prononks Gaad naym az “Yaaweh” bak den. Bot ada peepl feel laik dehn mi ga difrent wayz fi prononks Gaad naym. Wahn Ded See Skroal weh gat een paat a Leviticus eena Greek ga di naym rait dong az Iao. Ahn som a di Greek raitaz fahn way bak mi yooz Iae, I·a·beʹ, ahn I·a·ou·eʹ az difrent wayz fi prononks di naym. Bot nobadi ku proov dat di way how dehn mi prononks di naym da di prapa way fi prononks it eena aynshent Heebroo. c

Sohn rang bileef bowt Gaad naym:

 Rang bileef: Gaad naym shudn deh eena di Baibl, bikaaz nobadi noa egzakli how fi prononks ih naym eena Heebroo.

 Chek di faks: Da way a tinkin gi di aidyaa dat Gaad ekspek peepl weh taak difrent langwij fi prononks fi hihn naym di saym way. Bot di Baibl shoa wi dat di peepl weh mi wership Gaad eena di paas ahn weh mi taak difrent langwij neva prononks aal di naym dehn di saym way.

 Fi egzampl, tink bowt di Izrelait joj Jashwa. Bak eena di dayz a di apasl dehn, Kristyanz weh mi taak Heebroo mi wahn prononks Jashwa az Yehoh·shuʹaʽ, bot di wan dehn weh mi taak Greek mi wahn seh I·e·sousʹ. Di Baibl gat een di Greek chranslayshan a di Heebroo naym fi Jashwa. Dis shoa wi dat Kristyanz prononks difrent naym di way how ih mi kaman eena fi dehn langwij.​—Aks 7:​45; Heebrooz 4:8.

 Wi ku yooz da saym prinsipl fi di chranslayshan a Gaad naym. Eevn doa ih impoatant fi noa how fi prononks Gaad naym, di moas impoatant ting da fi mek shoar dat di naym deh eena di Baibl. Dat da weh ih bilangz!