Jehová ya riʼ ri Dios ri nutzjoj le Biblia. Yë ryä xbʼanö jontir ri kʼo (Apocalipsis 4:11). Ryä xyaʼöx ruqʼij rma Abrahán, Moisés chqä Jesús (Génesis 24:27; Éxodo 15:1, 2; Juan 20:17). Yë ryä ri Dios ri kʼo «pa ruwiʼ jontir le Ruwachʼulew» y ma xa xuʼ ta pa ruwiʼ jun tinamït (Salmo 47:2).

 Le Biblia nuʼij chë rubʼiʼ Dios ya riʼ Jehová (Éxodo 3:15; Salmo 83:18). Re bʼiʼaj reʼ petenäq rkʼë ri chʼaʼäl hebreo ri ntel chë tzij «xtbʼanatäj». Ye kʼo jojun etamanelaʼ nkiʼij chë re bʼiʼaj reʼ ntel chë tzij «Ryä nbʼanö chë nbʼanatäj». Re tzij reʼ kan ütz nbʼix chrij Jehová, rma yë ryä xbʼanö jontir ri kʼo chqä kan nuʼän ri nrajoʼ (Isaías 55:10, 11). Le Biblia chqä nqrtoʼ rchë nqatamaj ruwäch Jehová chqä rchë nqatamaj ri naʼoj ri más nqʼalajin chrij: ri kowan najowan (Éxodo 34:5-7; Lucas 6:35; 1 Juan 4:8).

 Ri rubʼiʼ Dios pa kaxlän ya riʼ Jehová. Rubʼanon qa, re bʼiʼaj reʼ pa chʼaʼäl hebreo ntzʼibʼäx wä kikʼë ri kajiʼ letras rchë ri Tetragrámaton (יהוה). Re kajiʼ letras reʼ ya riʼ ri consonantes YHWH. Tapeʼ majun ta jun winäq tamayon achkë rubʼanik xskʼïx rubʼiʼ Dios pa chʼaʼäl hebreo ojer, ri bʼiʼaj Jehová kan ojer chik bʼaʼ ksan pä pa kaxlän. Ri naʼäy Biblia ri xel pa kaxlän ri kʼo rubʼiʼ Dios chpan, ya riʼ ri Salmos rchë Juan de Valdés, ri xesäx chunaqaj ri junaʼ 1537. a

¿Achkë rma majun ta jun tamayon achkë rubʼanik xskʼïx rubʼiʼ Dios pa chʼaʼäl hebreo ojer?

 Ri chʼaʼäl hebreo ri xkiksaj ri winäq ojer, ma ntzʼibʼäx ta wä kikʼë vocales. Ri winäq kitaman wä akuchï yekiyaʼ wä äl taq nkiskʼij wä ruwäch xa bʼa achkë wuj. Ye kʼa, taq xkʼis rutzʼibʼaxik ri Escrituras Hebreas (Antiguo Testamento), ye kʼo wä jojun judíos kan xkinmaj ri nkiʼij wä ri winäq pa ki-tiempo chë ma ütz ta nkiksaj rubʼiʼ Dios. Taq nkiskʼij wä ruwäch jun texto ri kʼo rubʼiʼ Dios chpan, ryeʼ nkijäl wä rubʼixik y pa rukʼexel nkiʼij wä «Ajaw» o «Dios». Taq xeqʼax ri junaʼ, kan más na chik winäq xkinmaj chqä ya riʼ, rma riʼ majun ta chik jun tamayon achkë rubʼanik xskʼïx rubʼiʼ Dios ojer. b

 Ye kʼo jojun winäq nkiʼij chë ri rubʼanik xskʼïx rubʼiʼ Dios ojer ya riʼ «Yahweh» («Yahvé»). Ye kʼa ye kʼo chik nkʼaj ma ke riʼ ta nkiʼij. Chkipan ri Rollos ri xelitäj pa mar Muerto, kʼo jun peraj rchë Levítico ri kʼo rubʼiʼ Dios chpan «Iao» ri qʼaxan pa chʼaʼäl griego. Chqä, ye kʼo jojun achiʼaʼ ri yekitzʼibʼaj wä libros pa chʼaʼäl griego ojer nkiyaʼ chik nkʼaj rubʼanik ri ütz nskʼïx rubʼiʼ Dios «Iaé», «Iabé» o «Iaoué». Ye kʼa ma nqkowin ta nqaʼij chë kan ke riʼ rubʼanik xskʼïx ojer pa chʼaʼäl hebreo. c

Ri kinman jojun winäq chrij rubʼiʼ Dios ri kʼo chpan le Biblia

 Ye kʼo jojun winäq nkinmaj reʼ: Ri rubʼiʼ Dios ma kʼo ta chë nksäx chpan le Biblia rma ma qataman ta achkë qäs rubʼanik xskʼïx ojer pa chʼaʼäl hebreo.

 Ri kantzij chrij riʼ: Rkʼë ri nkiʼij ryeʼ, reʼ ntel chë tzij chë Dios nrajoʼ chë jontir ri winäq junan rubʼanik nkiskʼij rubʼiʼ, tapeʼ xa bʼa achkë na kichʼaʼäl. Ye kʼa, le Biblia nuʼij chë rusamajelaʼ Dios ojer nkiʼij wä rubʼiʼ jun winäq kan achiʼel wä nbʼix pa kichʼaʼäl.

 Tqatzʼetaʼ achkë rubʼanik xskʼïx rubʼiʼ Josué, ri ukʼwäy bʼey israelita. Ri cristianos pa naʼäy siglo ri yetzjon wä pa chʼaʼäl hebreo rkʼë jbʼaʼ nkiʼij wä «Yeshúa», y ri yetzjon pa chʼaʼäl griego, «Iesous». Chpan le Biblia, xqʼaxäx re bʼiʼaj reʼ pa chʼaʼäl griego, rma ya riʼ jun bʼiʼaj ri nbʼix wä pa hebreo. Reʼ nukʼüt chë ri cristianos nkiʼij wä kibʼiʼ ri winäq kan achiʼel wä nbʼix pa kichʼaʼäl (Hechos 7:45; Hebreos 4:8).

 Ke riʼ chqä nbʼanatäj rkʼë rubʼiʼ Dios. Ma nkʼatzin ta nqatamaj achkë rubʼanik xbʼix ojer rchë kan ke riʼ chqä nqaʼij röj. Ri kʼo más ruqʼij ya riʼ chë ri bʼiʼaj riʼ njeʼ chpan le Biblia.