Jeowatrʉ Daizeze wãrĩnuara iya nejõma parãsi baera (Apocalipsis 4:11). Iyira kãgapanasi propetara Abrahánba akʉza Moisésba, adewara Jesubida (Génesis 24:27; Éxodo 15:1, 2; Juan 20:17). Iyira mawũã pʉwʉrʉ abaʉ Daizeze ẽ awuarabʉrʉ naʉ̃ drʉa jõmaʉ̃ Daizeze (Salmo 47:2).

 Daizeze Bedʼeabara jarabʉ Daizezera trʉ̃ barabʉta, iyi trʉ̃ra: Jeowa (Éxodo 3:15; Salmo 83:18). Jeowa trʉ̃ra zebʉ bedʼea ebreodeba, naʉ̃ba jarakĩrãbʉ «aripe obʉta». Ẽbẽra estudiapanʉraba jarapanʉ Daizeze trʉ̃bara jarakĩrãbʉta «Iya Jarabʉra jõma Aripe Obʉta». Naʉ̃ bedʼeara bigabʉ Jeowaitara iya nekʼãrẽ jõma obʉ baera. (Isaías 55:10, 11). Adewara Daizeze Bedʼeabara kʼarebabʉ Jeowaba nebia erbʉ ũdukʼawuaita, maʉ̃ne iyi kãga ũdukʼawuaita (Éxodo 34:5-7; Lucas 6:35; 1 Juan 4:8).

 Daizeze trʉ̃ ebreodebʉra españoldera Jehová. Naʉ̃ trʉ̃ra ebreoderabʉsida letra kimareba (יהוה) naʉ̃ta trʉ̃panʉ Tetragrámaton, naʉ̃ letrara españoldera naʉ̃ YHWH. Bia kʼawuada ẽ mina Daizeze trʉ̃ sãwũã jarabasita ebreode kikibari baera, españolbara dããraba bedʼea Jehová zokʼabʉta. Juan de Valdésba nããra Salmos españoldebʉside zokʼasi Daizeze trʉ̃ta poaga 1537 kʼawa. a

¿Kʼãrẽa bia kʼawuada ẽ Daizeze trʉ̃ sãwũã jarabʉta ebreo bedʼea kikibaridera?

 Ebreo bedʼeadera zokʼa e basi bocal A, E, I,O, U, mamina ãya karta lebʉrʉdera ãyi krĩchade kʼawuabasi sama zokʼaibarata. Escrituras Hebreas (Antiguo Testamento) jõma bʉsidadera, ʉ̃kʉrʉ judioraba krĩchapanasi Daizeze trʉ̃ jaraira kayiruata. Ãya testo nemi jĩgʉa lebʉrʉde ũdupanasibʉrʉ Daizeze trʉ̃ta awuara jarapanasi, zokʼabasi bedʼea «Señor» mawũã e bʉrʉ «Dios». Poaga bio berabarida tẽã ẽbẽra mejãchaʉba abarika krĩchapanasi, maʉ̃ kʼarea kĩrãduasida Daizeze trʉ̃ wãrĩnu sãwũã jarabadara. b

 Ʉ̃kʉrʉba jarapanʉ Daizeze trʉ̃ra jarabasita «Yahweh» («Yahvé») mamina ʉ̃kʉrʉba awuara krĩchapanasi. Rollos del mar Muertode wiña ũdusida Levíticodebemata griego bedʼeade, mama Daizeze trʉ̃ta kʼãwũã bʉchuasi «Iao». Ʉ̃kʉrʉ griegoraba jarabasi kʼãwũã jaraseabʉta «Iaé», «Iabé» mawũã ẽ bʉrʉ «Iaoué» mamina mia kʼaiba aripe kʼawua ẽ sãwũã jarabasita Daizeze trʉ̃ra ebreo bedʼea kikibaridera. c

¿Sãwũã krĩchapanʉ ẽbẽrabara Daizeze Bedʼeade Daizeze trʉ̃chu ʉ̃rʉra?

 Ʉ̃kʉrʉba krĩchabʉta: Daizeze trʉ̃ra Daizeze Bedʼeade bʉbe ẽ kʼawua ẽ baera ebreode sãwũã aripe jarabʉta.

 Wãrĩnuta: Maʉ̃ta ĩjãpanʉbʉrʉ dayirãbara krĩchadayi Daizezebara. kãgabasita jõmaʉ̃ba jaradamarẽã iyi trʉ̃ra ebreodebʉrʉ awuru bedʼeade bedʼeabʉmina. Daizeze Bedʼeabara jarabʉ nããbema ẽbẽrabara ẽbẽra trʉ̃ta akʉza Daizeze trʉ̃ra ãyi bedʼeade jarabasita.

 Akʉdaya yizata israelita Josué trʉ̃ ʉ̃rʉ. Nããbema kristianora ebreode bedʼeapanʉrabara trʉ̃gabasi «Yeshúa» mamina yi griegode bedeʼeapanʉrabara trʉ̃gabasi «Iesous». Naʉ̃ trʉ̃ ebreodeba zesimina tradusisida griegodebida, naʉ̃ba jarakĩrãbʉ nããbema kristianorabara zokʼabasita badʉ trʉ̃ta ãyi bedʼeade (Hechos 7:45; Hebreos 4:8).

 Daizeze trʉ̃sida abarika berabaribʉ tradusibʉdade. Mamina akʉ ẽ baibara Daizeze trʉ̃ sãwũã aripe jarachuta, awuarabʉrʉ audre yibia Daizeze trʉ̃ Daizeze Bedʼeade bʼaita.