Jehová Ngöbö metre jondron jökrä Sribekä mikata gare Bibliabätä (Apocalipsis 4:11). Nitre Jehová kukwei niekä Abrahán, Moisés aune Jesús käkwe mikani täte (Génesis 24:27; Éxodo 15:1, 2; Juan 20:17). Ngöbö metre ye ñaka juta keteiti aibe kräke, ñakare aune juta jökrä kräke (Salmo 47:2).

 Jehová ye abokän Ngöbö kä jeñe mikata gare Bibliakwe, niara aibe kädeka raba kore (Éxodo 3:15; Salmo 83:18). Jehová kä ye kite verbo hebreo yekri, ye abokän “tä mike nemen bare” gärätä. Ye medenbätä, nitre ja tötikaka kukwe nebätä tä niere, Jehová kä ye abokän “Niara Töita ño ye Tä Mike Nemen Bare” ye meden gärätä. Kukwe ye metre, ñobätä ñan aune Jehovakwe jondron jökrä sribebare aune dre käbämikata kwe ye erere tä mike nemen bare (Isaías 55:10, 11). Ngöbö töi ño ye Biblia tä ni dimike mike gare jai. Ñodre, tä ni tarere ye kukwe bäri ütiäte nuainta kwe tä nemen gare nie (Éxodo 34:5-7; Lucas 6:35; 1 Juan 4:8).

 Kukwe hebreorebiti Ngöbö kä ye tika nämäne tärä okwä kobokäbiti YHWH (יהוה). Tärä okwä kobokä ye kädekata Tetragrámaton. Kukwe hebreo kirabiti Ngöbö kä nie nämäne ño metre ye ñaka gare. Suliare Ngöbö kä ye Jehová aune ye erere nie jatani ngäbere arato. Ñodre, Libro de Adoración para el uso de los Indios Valientes yete Salmo ruäre kwitani ngäbere känti Jehová käta tikani gre näre, tärä ye sribebare kä 1933. a

¿Kukwe hebreo kirabiti Ngöbö kä nie nämäne ño ye ñobätä ñaka gare nie?

 Kukwe hebreo kira ye tika nämäne consonante aibebiti, akwa nitre nämäne ñäkebätä ngwane, vocal meden niedre ye nämäne niere ja töibiti. Akwa Escrituras Hebreas (Antiguo Testamento) ye tikani ünä ye bitikäre Ngöbö kä ñan kädekadrete jire nie nämäne, ye erere nitre judío jatani ja töi mike. Texto keteitibätä Jehová kä nämäne tikani yebätä nämänentre ñäke ja kukwe kribiti ngwane, Jehová kä ye täte nämäne “Ngöbö” o “Däkien” niere. Kä kwati krubäte te nuain nämäne ye erere, aisete Ngöbö kä nie nämäne ño kirabe ye nianinte. b

 Nitre ruäre tä nütüre Ngöbö kä nie nämäne “Yahweh” o “Yahvé”, mada abokän tä niere nie nämäne jene. Rollo mar Muerto yete tärä Levítico oto chibätä Ngöbö kä nämäne tikani kukwe griegorebiti “Iao”. Ne madakäre, Ngöbö kä nie nämäne “Iaé”, “Iabé” o “Iaoué” ye nitre griego kira tärä tikaka nämäne niere, akwa Ngöbö kä niedre ño kädrite ye erere nitre hebreo kira nämäne niere mika ñaka raba gare metre ta. c

Ngöbö käta tikani Bibliabätä ye rüere kukwe nieta

 Nitre ruäre tä niere: Ngöbö kä ye ñaka tädre Bibliabätä, ñobätä ñan aune Ngöbö kä nie nämäne ño kukwe hebreorebiti ye ñaka gare metre.

 Kukwe metre: Kukwe yebiti mikata gare nitre kä jökräbiti tibien blite kukwe meden medenbiti, akwa Ngöbö kä nie nämäne ño ye erere rabadre niere ye ie Ngöbö tö nitre tä nütüre. Akwa Biblia tä mike gare, nitre Ngöbö mikaka täte kirabe nämäne nitre mada kä niedre ño kukwe jeñe kwetre yebiti ye erere niere.

 Ani bämike ni kukwe ükatekä israelita Josué yebätä. Nitre kristiano siklo kena blitaka kukwe hebreorebiti nämäne kä niere “Yeshúa” aune nitre blitaka kukwe griegobiti nämäne kä niere “Iesous”. “Yeshúa” kwitani kukwe griegobiti ye tä Bibliabätä. Ye tä mike gare, nitre kristiano rabadre ni mada kä niere kukwe jeñe kwetre yebiti ye erere nämäne niere (Hechos 7:45; Hebreos 4:8).

 Ye erere nie raba arato Ngöbö kä nie nämäne ño yebätä. Ngöbö kä nie nämäne ño kukwe kirabiti ye ñan ai bäri ütiäte, ñakare aune käta tikani medente Bibliabätä ye erere känti tädre ye bäri ütiäte.