Yeehoowa is te woere Kot fon te Piipel, te Kriatoer fon ale tinge. (Apocalipse 4:11) Eyer waar te Kot fon te profeete Aapraham, Mooses un Yeesus. (Gênesis 24:27; Êxodo 15:1, 2; João 20:17) Yeehoowa is net te Kot fon ploos een krup layt, awer tee is te Kot fon ‘te kans eyert’. — Salmo 47:2.

 Kot sayn aychne naame is Yeehoowa, wii in te Piipel xteet, un tee tuut ploos tsu tëm keheere. (Êxodo 3:15; Salmo 83:18) Tas khomt fon een hepreeyx wort woo petayt: “es wërt”. Fiile xtutiirte layt klaape tas te naame Yeehoowa petayt: “Eyer macht tas es wërt”. Tas xtimt wayl eyer ales kemacht hot un macht tas sayn wile sich imer erfiile tuut. (Isaías 55:10, 11) Ti Piipel tuut uns aach helfe te Persoon hinich tëm naame Yeehoowa lërne khëne, haupstseechlich sayn kreest kwaliteet: ti liip. — Êxodo 34:5-7; Lucas 6:35; 1 João 4:8.

 Te naame Yeehoowa is een hunsrikix iwersetsung fon יהוה (YHWH), woo Kot sayn naame in hepreeyx is. Tiise fier hepreeyxe puuchxtaape sin wii te Tetrakram pekhant. Nimant wees kenau wii tas in te alt hepreeyx xprooch aus kexproch waar. Kot sayn naame hot een lang kexicht in te unerxiitliche xprooche. Wole mer tswaay paypxiile kuke.

In portukeesix wërt Kot sayn naame wii “Jeová” aus kexproch un tee hot xon een lang kexicht in te eyerst iwersetsung fon te Piipel in tiise xprooch kehat. a In hochtaytx wërt Kot sayn naame wii “Jehova” aus kexproch. Ti eyerst taytx iwersetsung fon te Piipel woo Kot sayn naame “Jehova” penutst hot, is fom yoer 1537. b

Warom wees nimant wii Kot sayn naame in te alt hepreeyx xprooch aus kexproch sol wëre?

 Ti alt hepreeyx xprooch is oone wokaale kexrip woer, un hon ploos ti konsonante penutst. Wii se ti wërter aus kexprooch hon, yeete persoon woo hepreeyx kexproch hot, wust was fer wokaale penutse. Awer nochter, wii ti Hepreeyxe Xrifte (orer Alte Testamënt) fërtich waare, hon etliche yuute te awerklaape aan kenom tas es ferkheert weyer tee naame penutse. Wën se een tekst in een hart xtim keleest hon woo Kot sayn naame tepay waar, hon se tas wii “Hër” orer “Kot” iwersetst. Mit te tsayt, hot tee awerklaape sich ferprayt un wii tee naame aus kexproch solt sin, is ferloer kang. c

 Etliche tenke tas Kot sayn naame aus kexproch waar wii “Iavé” orer “Javé” (in portukeesixe iwesetsunge); orer wii “Jahwe” (in hochtaytxe iwersetsunge). Xon anere saan tee khënt anerste aus kexproch wëre. Te Rol fom Sals Meer (Tootes Meer) woo een xtik in kreekix fom puuch Lewiitikus hot, transliteriirt te hayliche naame wii Iao. Un noch in anere aate, ti xrayper fon te alt kreekix xprooch saan tas khent aach wii Iae, Iabé un Iaoué aus kexproch wëre. Awer is niks woo saat wii tas in te alt hepreeyx xprooch aus kexprooch waar. d

Falxe kexichte iwer Kot sayn naame in te Piipel

 Falxes: Kot sayn naame solt net in te Piipel penutst wëre, wayl nimant wees wii tee in te alte hepreeyx xprooch aus kexproch waar.

 Woeres: Tas teet petayte tas Kot waart tas ale layt tëm sayn naame in te selwich aat aus xpreche solte, een tuun was fer xprooch se xpreche. Awer, ti Piipel tsaycht tas Kot sayn friirixe tiiner fon unerxiitliche xprooche, perseenliche naame in unerxiitliche aate aus kexprooch hon.

 Kuk tas payxpiil fon Yosuee sayn naame, een richter fon tëm alte Israël. Ti kriste fom eyerste yoer hunert woo hepreeyx kexprooch hon, hon woerxaynlich sayn naame wii Yeoshúa aus kexprooch. Awer tii woo kreekix kexprooch hon, hon sayn naame wii Iesoús aus kexprooch. Ti Piipel penutst ti kreekix iwersetsung fon Yosuee sayn hepreeyxe naame. Tas tsaycht tas ti kriste kemacht hon was mee loxik waar: tii hon ti perseenliche naame in te aat penutst wiis in tëne sayn xprooch keweenlich waar. — Atos 7:45; Hebreus 4:8.

 Tas selwich printsiip kilt aach fer ti iwersetsung fon Kot sayn naame. Mee wichtich wii ti kenau ausxprechung fon Kot sayn naame se wise, is tas te naame uf te richtiche pletse in te Piipel xteet.