In tzaj tqʼamaʼn Xjan Uʼj qa a Jehová aju Dios axix tok ex a Bʼinchal tkyaqil (Apocalipsis 4:11). Kʼulin profeta Abrahán, Moisés ex Jesús twitz (Génesis 24:27; Éxodo 15:1, 2; Juan 20:17). Ex a Dios tibʼaj tkyaqil twitz Txʼotxʼ ex nya oʼkx toj jun tnam (Salmo 47:2).

 In tzaj tqʼamaʼn Xjan Uʼj qa at jun tbʼi Dios tekuxix, aju Jehová (Éxodo 3:15; Salmo 83:18). Atz tzajni bʼibʼaj lu tiʼj jun verbo toj yol hebreo ex a t-xilen «AQINE AJU AX QINE». Ateʼ junjun aj xnaqʼtzal in tzaj kyqʼamaʼn qa aju bʼibʼaj lu a t-xilen «A in Nok te Tkyaqil». Toj tumel aj txi qʼamaʼn jlu tiʼj Jehová, tuʼnju a kubʼ bʼinchante tkyaqil ex in japun twi t-ximbʼetz (Isaías 55:10, 11). Ax ikx in nonin Xjan Uʼj qiʼj tuʼn tok qojtzqiʼn qe tbʼanel tmod, mas aju tkʼujlabʼil (Éxodo 34:5-7; Lucas 6:35; 1 Juan 4:8).

 Atz tzajni tbʼi Dios tiʼj yol hebreo ex toj español in kubʼ traducirit ik tzeʼn Jehová. In kubʼtoq tzʼibʼin bʼibʼaj lu kyukʼil kyaje letra te Tetragrámaton (יהוה) ex at toklen kyukʼil letra YHWH. Maske mintiʼxix ojtzqiʼn quʼn tzeʼn in xi qʼamet bʼibʼaj lu toj ojtxe yol hebreo, ya ma tzikʼ nim ambʼil in najbʼen bʼibʼaj Jehová toj yol español. Aju tnejel traducción tiʼj Tyol Dios toj yol lu jatumel tkuʼx tbʼi Dios, aʼyeju Salmos de Juan de Valdés, tojlo abʼqʼi 1537. a

¿Tiquʼn mintiʼ ojtzqiʼn quʼn tzeʼn in xi qʼamet tbʼi Dios toj ojtxe yol hebreo?

 Mintiʼtoq in che ajbʼen vocal toj ojtxe yol hebreo aj tkubʼ tzʼibʼit, sino in noktoq kyqʼoʼn xjal aj tjaw kyuʼjin. Noqtzun tuʼnj, tej otoqxi kubʼaj plaj Tyol Dios toj yol hebreo moqa Ojtxe Tuʼjil, ateʼ junjun xjal judiy mintiʼtoq in najbʼen tbʼi Dios kyuʼn. ¿Tiquʼn? Tuʼnju in kyqʼamaʼntoq qa nya bʼaʼn tuʼn tajbʼen tbʼi Dios. Tuʼntzunju, tej tjaw kyuʼjin jun taqikʼ Tyol Dios jatumel tkuʼx tbʼi Dios ajbʼen «Qajaw» moqa «Dios» kyuʼn te t-xel. Tej tbʼet ambʼil, kukx bʼant jlu kyuʼn xjal ex ikʼ tnaʼl kyuʼn tzeʼn in xi qʼamet tbʼi Dios. b

 Ateʼ junjun in tzaj kyqʼamaʼn qa in xitoq qʼamet tbʼi Dios ik tzeʼn «Yahweh» moqa «Yahvé», atzun junjuntl in tzaj kyqʼamaʼn junjuntl tumel. Kyoj uʼj e kanet toj mar Muerto at jun piẍ tiʼj uʼj te Levítico toj yol griego atz jatumel tkuʼx tbʼi Dios ex kubʼ qʼoʼn ik tzeʼn «Iao». In tzaj kyqʼamaʼn junjuntl aj tzʼibʼil toj yol griego te ambʼil ojtxe, qa jaku txi qʼamet tbʼi Dios ik tzeʼn jlu: «Iaé», «Iabé» moqa «Iaoué». Noqtzun tuʼnj, mlay qqʼama qa ikxix in xi qʼamet tbʼi Dios toj ojtxe yol hebreo. c

Junjun nya ax tok xnaqʼtzbʼil in tzaj qʼamaʼn tiʼj tbʼi Dios

 Aju in tzaj kyqʼamaʼn junjun xjal: Mintiʼ tuʼn tkux qʼet tbʼi Dios toj Xjan Uʼj tuʼnju nya ojtzqiʼn quʼn tzeʼn in xi qʼamet toj ojtxe yol hebreo.

 Aju axix tok: Tukʼil ximbʼetz lu kyaj xjal tuʼn ttzaj kyqʼamaʼn qa ax tumel tuʼn t-xi qʼamet tbʼi Dios toj alkyexku yol. Noqtzun tuʼnj, in tzaj tqʼamaʼn Xjan Uʼj qa e ajbʼen bʼibʼaj toj ambʼil ojtxe kyuʼn tmajen Jehová ik tzeʼn xi qʼamet toj kyyol.

 Qo xnaqʼtzan tiʼj tbʼi Josué, jun jwes te tnam Israel te ambʼil ojtxe. Aqeju okslal te tnejel syent abʼqʼi in che yolin toj yol hebreo, bʼalo xi kyqʼamaʼn bʼibʼaj lu ik tzeʼn «Yeshúa», atzun qe okslal in che yolin toj yol griego, bʼalo xi kyqʼamaʼn «Iesous». Atz tzajni bʼibʼaj lu tiʼj yol hebreo pero kubʼ traducirin toj yol griego toj Tyol Dios. In tzaj tyekʼin jlu qa xi kyqʼamaʼn okslal qe bʼibʼaj ik tzeʼn xi qʼamet toj kyex kyyol (Hechos 7:45; Hebreos 4:8).

 Ax jlu jaku bʼaj aj tkubʼ traducirin tbʼi Dios. Nya mas nim toklen tzeʼn in xi qʼamet tbʼi Dios, sino aju tuʼn tkux qʼet jatumel tkuʼxtoq toj Xjan Uʼj.