Reʼ Jehová i korik Dios iruqor i Santo Laj Huuj. Reʼ reh xtzʼuhkrisanik reh chuʼnchel i wilik (Apocalipsis 4:11). Re’ profeta Abrahán, Moisés jeʼ woʼ i Jesús xkiyew ruloqʼil i Jehová (Génesis 24:27; Éxodo 15:1, 2; Juan 20:17). Reʼ reh i Dios «sut i wach akʼal». Maʼ reʼ ta Dios reh xa jenaj tinamit (Salmo 47:2).

 Reʼ Santo Laj Huuj iruqʼor chi reʼ i Dios wilik jenaj rubʼihnaal, reʼ rubʼihnaal Jehová (Éxodo 3:15; Salmo 83:18). Xa reʼ woʼ reh i nehchanik reh i bʼihnaal wilih. Inchalik pan qʼorbʼal hebreo eh iraaj ruqʼorom «irubʼan chi neʼ inkʼularik». Reʼ inkitzʼir riij i qʼorbʼal hebreo inkiqʼor chi reʼ i bʼihnaal wilih iraaj ruqʼorom «reʼ reh irubʼan chi neʼ inkʼularik». Reʼ wilih irukʼam riibʼ chi reʼ Jehová xutzʼuhkrisaj chuʼnchel i wilik eh irubʼan chuʼnchel iraaj rubʼanam (Isaías 55:10, 11). Reʼ Santo Laj Huuj qojrutoobʼeej runabʼjiik chi riij i runaʼojbʼal, jeʼ rukabʼ i kʼaxooj (Éxodo 34:5-7; Lucas 6:35; 1 Juan 4:8).

 Reʼ rubʼihnaal i Dios pan hebreo iraaj ruqʼorom Jehová pan kaxlan qʼorik. Reʼ wilih intzʼihbʼjik naq ruukʼ i kijibʼ chi letra reh i Tetragrámaton (יהוה) jeʼ rukabʼ YHWH. Atoobʼ ta maʼ qehtʼal ta nikʼwach inqʼorarik i bʼihnaal wilih pan najtir hebreo, reʼ bʼihnaal Jehová pan kaxlan qʼorik najtir chik kitoqʼaam rukojariik. Reʼ peet traducción reh i Santo Laj Huuj reh i qʼorbʼal wilih ahaʼ wiiʼ inkan wiiʼ i rubʼihnaal i Dios reʼ i Salmos reh i Juan de Valdés, reh i haabʼ 1537. a

¿Chaaj woʼ reet maʼ ehtʼalimaj taj nikʼwach inqʼorarik i rubʼihnaal i Dios pan najtir hebreo?

 Reʼ najtir qʼorbʼal hebreo maʼ rukoj ta naq taqeh vocal, reʼ ajwach inilwik naq reh irukoj naq taqeh vocal. Eh noq xkuxik rutzʼihbʼjiik taqeh Escrituras Hebreas (Najtir Kʼuhbʼaal) juʼjun taqeh i judío kikoj wach chi reʼ ruqʼorariik i rubʼihnaal i Dios maʼ atoobʼ ta naq. Eh noq inkil naq wach jenoʼ texto ahaʼ wiiʼ inkan i rubʼihnaal i Dios maʼ inkiqʼor ta naq, chi jilow inkiqʼor naq «Jaaw» oon «Dios». Noq xikʼik taqeh haabʼ reʼ kapebʼal wilih xuheeʼ riibʼ eh sahchik wach nikʼwach ruqʼorariik i rubʼihnaal i Dios. b

 Wilik inkikapaaj chi inqʼorarik naq reh i Dios «Yahweh» («Yahvé») eh wilik inkikapaaj chi tokoom naq inqʼorarik reh. Pan Rollo reh i Mar Muerto wilik jenaj ruqohx i huuj Levítico pan qʼorbʼal griego ahaʼ wiiʼ inkan i rubʼihnaal i Dios chi jeʼ wilih: «Iao». Tokoom chik ajtzʼihbʼaneel reh i qʼorbʼal griego chupaam taqeh qʼiij reʼreʼ, inkiqʼor woʼ chi mareh jeʼ wilih inqʼorarik «Iae», «Iabé» oon «Iaoué», xa reʼ laʼ maʼ ne ta inqʼorarik chi jeʼ ta naq reʼ inqʼorarik reh. c

Reʼ maʼ korik taj chi riij i rubʼihnaal i Dios pan Santo Laj Huuj

 Reʼ inkikapaaj i juʼjun: Maʼ ko ruman ta rukojariik i rubʼihnaal i Dios pan Santo Laj Huuj ruum chi maʼ ehtʼalimaj ta naq chi korik nikʼwach inqʼorarik reh pan hebreo.

 Reʼ korik: Jeʼ rukabʼ inanabʼeej wilih, reʼ Dios iraaj chi chuʼnchel taqeh kʼachareel atoobʼ ta reh reh wach i kiqʼorbʼal ne inkiqʼor i rubʼihnaal i Jehová. Xa reʼ laʼ, reʼ Santo Laj Huuj iruqʼor chi reʼ taqeh rajkamanoom i Dios reh najtir qʼiij inkiqʼor naq i bʼihnaal jeʼ rukabʼ naq inqʼorarik pan kiqʼorbʼal.

 Jeʼ rukabʼ i rubʼihnaal i ajqʼatal qʼorik Israelita Josué. Reʼ taqeh ajnimaneel reh i peet siglo reʼ kiqʼorik naq hebreo mareh inkiqʼor naq «Yeshúa» eh reʼ naq taqeh i kiqʼorik griego, «Iesous». Pan Santo Laj Huuj inkan pan qʼorbʼal griego i bʼihnaal hebreo reʼreʼ. Reʼ wilih irukʼuhtaaj chi reʼ taqeh ajnimaneel inkiqʼor naq taqeh i bʼihnaal reʼ inqʼorarik pan kiqʼorbʼal (Hechos 7:45; Hebreos 4:8).

 Jeʼ woʼ reʼ ne inqaqʼor chi riij i rubʼihnaal i Dios. Reʼ xti aajwaal wach maʼ reʼ ta nikʼwach naq inqʼorarik, reʼ laʼ mi ne inkan ahaʼ naruwihʼiik pan Santo Laj Huuj.