Jeova i Deus di bardadi ku faladu del na Biblia, i el ku kumpu tudu kusa. (Apokalipsi 4:11) I el ku profetas Abraon ku Moisés ta adoraba, i el tambi ku Jesus ta adora. (Kumsada 24:27; Saida 15:1, 2; Jon 20:17) I ka Deus so di un povu, ma di “tudu mundu”. — Salmu 47:2.

Suma ki mostradu na Biblia, Jeova i nomi ku Deus tene so pa el. (Saida 3:15; Salmu 83:18; jubi paẑina iii na Biblia ku TNM) I bin di un verbu ebraiku ku signifika “pa i sedu”, i manga di piskisaduris fala di kuma ki nomi signifika “i ta fasi pa i sedu”. Es difinison da ben ku papel di Jeova suma Kriadur i kil ku ta kumpri si intenson. (Isaias 55:10, 11) Biblia tambi judanu kunsi algin ku tene es nomi Jeova, prinsipalmenti si kualidadi mas garandi, ku sedu amor. — Saida 34:5-7; Lukas 6:35; 1 Jon 4:8.

Nomi Jeova na kriol i traduson di nomi di Deus na ebraiku i skirbidu ku kuatru letras יהוה (YHWH), ku kunsidu suma Tetragrama. Purnunsia izatu di nomi di Deus na ebraiku antigu ka kunsidu. *

Ke ku manda purnunsia di nomi di Deus na ebraiku antigu ka kunsidu?

Ebraiku antigu ta skirbiduba sin vogal, e ta usa so konsuantis. Algin ku ta papia ebraiku, ora ki na lei, i pudi ku fasilidadi sibi kal vogal ki na pui. Ma, dipus ki Skrituras ebraiku (“Antigu Testamentu”) kaba skirbidu, alguns judeus tene ideia eradu di kuma, i mal coma nomi di Deus. Ora ke na lei na vos altu na skritura parti ku tene nomi di Deus, e ta muda ki spreson pa “Siñor” o “Deus.” Ku tempu, es ideia eradu kontinua. Kuma ku nomi di Deus ta purnunsiaduba pasa ka kunsidu. *

Alguns pensa di kuma nomi di Deus ta purnunsiadu “Yahweh,” i utrus tene utrus ideia. Un Rolu di Mar Mortu ku tene un parti di livru di Sirmonia na gregu traduzi nomi di Deus pa Iao. Tambi skirbiduris di gregu antigu da suẑestons des purnunsias: Iae, I·a·beʹ, ku I·a·ou·eʹ. Ma i ka ten nin un prova ku ta mostra di kuma es purnunsia ta usaduba na ebraiku antigu. *

Ideias eradu aserka di nomi di Deus na Biblia

Ideia eradu: Nomi di Deus ka dibi di usadu na Biblia pabia i ka sibidu izatamenti kuma ki ta purnunsiadu na ebraiku.

Es ki bardadi: Es manera di pensa ta da ku ntindi kuma Deus misti pa jintis di diferentis lingua, purnunsia si nomi di mesmu manera. Ma, Biblia mostra di kuma kilis ku ta adora Deus na pasadu, ta papia linguas diferenti, i e ta purnunsia nomi di jintis di manera diferenti.

No jubi isemplu di un juis israelita comadu Josué. Kristons di purmeru sekulu ku ta papia ebraiku talves ta purnunsia es nomi Yehoh·shuʹaʽ, i kilis ku ta papia gregu talves ta purnunsial I·e·sousʹ. Biblia usa traduson gregu di nomi ebraiku di Josué, es ta mostra di kuma kristons ta sigi kusa ku mas ta tene sintidu, ku sedu, usa nomi di algin di un manera ku mas kunsidu na se lingua. — Atus 7:45; Ebreus 4:8.

Es mesmu prinsipiu pudi aplikadu pa traduson di nomi di Deus. Mas importanti di ki sibi purnunsia izatu di nomi di Deus, i pa pui si nomi na lugar ki dibi di sta na Biblia.