Yehowa nyi Efile a binyibinyi abadi batemune mu Bible, Mupangi a bintu byooso. (Kibafumbwilwe 4:11) Batemuki Abrahame na Moyise abaadi bamulangwile, mpa na Yesu badi mumulangwile. (Kibangilo 24:27; Efilu 15:1, 2; Yowano 20:17) Nyi Efile Mukulu, shi penda a mwilo kampanda, kadi a “nsenga ishima.”​—Misambo 47:2.

 Yehowa nyi eshina penda dimune dy’Efile Mukulu dyabadi baleshe mu Bible. (Efilu 3:15; Misambo 83:18) Adifiki mu kishima kya kina Ebelu akilesha “kwikala,” na bantu bebungi abalongaa myanda ya Bible abamba shi dino eshina adilesha shi “ayikashaa.” Kino kipatulwilo nkipushene na mudimo wa Yehowa wa bu Mupangi na bu Akumbashaa kikyebe ky’eshimba dyaaye. (Yeeshaya 55:10, 11) Bible etukwasha dingi bwa kuuka Yawa sha dino eshina, bikishekishe eyikashi dyaaye dikata dya kifulo.​—Efilu 34:5-7; Luuka 6:35; 1 Yowano 4:8.

 Eshina Yehowa nyi ngalulwilo a mu Kisongye a eshina dy’Efile Mukulu di mu kina Ebelu​—maleta ananka יהוה (YHWH), abetanyinaa bu Tetragramme. Mushindo ubaadi eshina dy’Efile Mukulu adibadikibwa mu kina Ebelu kya kala taukibwa dingi nya. Kadi, eshina “Yehowa” adiukibwa kalolo kubanga kala mu ludimi lwa Anglais, mwanda ubaadi ufundjibwe musango wa kumpala mu Bible a William Tyndale a mu 1530. a

Bwakinyi mushindo ubaadi aubadikibwa eshina dy’Efile Mukulu mu kina Ebelu kya kala taukibwa lelo uno?

 Kina Ebelu kya kala takibaadi akifundjibwa na maleta ashikukye nya, nkapenda maleta ashikale. Muntu auku kubadika kina Ebelu, baadi mulombeene kukumbasha maleta ashikukye bwa kubadika kalolo. Kadi, kunyima kwa’bo kupudisha kufunda Bifundwe bya mu kina Ebelu (“Kilombeeno kya Kala), beena Yunda ababangile kulonda kipikwa kya madimi kya’shi tabibuwa kutemuna eshina dy’Efile Mukulu. Nsaa yababadika Bifundwe n’eyi di bukopo mbalo yabadi bafunde eshina dy’Efile Mukulu, abaadi abedikasha na kutemuna myasu bu “Mwanana” sunga “Efile Mukulu.” Bipwa nkama kunyima, kino kipikwa kibi kibapalakane na bantu abalubile mushindo ubaadi aubadikibwa eshina dy’Efile Mukulu. b

 Bangi abamba’shi eshina d’Efile Mukulu dibaadi adibadikwa bu “Yahweh,” na bangi abapwandikisha ingi mishindo. Mufungofungo wa mu Kalunga Kafwe mwi kipindji kya mukanda wa Efilu mu kina Greke mwabadi bafunde eshina adifiki mu kina Ebelu shi Iao. Bafundji ba kina Greke kya kala abamba shi dibaadi adibadikibwa bu Iae, I·a·beʹ, sunga bu I·a·ou·eʹ, kadi takwi kintu su nkimune akishinkamisha shi ku ino yooso kwi sunga mushindo umune wipushene na mbadikilo a mu kina Ebelu. c

Madimi pabitale eshina dy’Efile Mukulu mu Bible

 Madimi: Tabitungu kufunda eshina dy’Efile Mukulu mu Bible nya mwanda tadiukibwa mushindo ubadidi adibadikibwa mu kina Ebelu kya kala.

 Eyendo: Kunangushena uno mushindo akukyebe kwamba shi Efile Mukulu atekye bantu ba mu ndjimi ilekene bwa kwitanyina eshina dyaaye mushindo umune. Kadi, Bible alesha shi balangwidi b’Efile Mukulu ba kala abaadi abakula ndjimi ilekene abaadi abetanyina mashina a bantu mu ndjimi ilekene.

 Twate kileshesho kya Yooshwa, nsushi umune mwina Isaleleele. Beena Kidishitu ba kumpala babaadi abakula kina Ebelu abaadi balombeene kumwitanyina bu Yehoh·shuʹaʽ, na baaba babaadi abakula kina Greke abaadi balombeene kumwitanyina bu I·e·sousʹ. Bu byabidi shi mu Bible mbaluule eshina dya Yooshwa mu kina Greke, abimweneka kalolo shi beena Kidishitu abalondele kyubishi kya kwaluula mashina a bantu mu ndjimi ya bantu na bantu.​—Bikitshino 7:45; Bena-Ebelu 4:8.

 Twi kukita nka byabya na kwaluula eshina dy’Efile Mukulu. Kintu kya muulo ukata kukila mpa na kuuka kwa bibaadi abibadikwa eshina dy’Efile Mukulu kala nyi nkwidipa mbalo yadio bu ya muloo mu Bible.