Jehova Em i Husat?

PLEI

Jehova Em i Husat?

Bekim bilong Baibel

Jehova em God tru bilong Baibel, em Krieta bilong olgeta samting. (Revelesen 4:11) Ol profet, Abraham na Moses i lotuim em, na Jisas tu. (Stat 24:27; Kisim Bek 15:1, 2; Jon 20:17) Em i God bilong ol manmeri bilong “olgeta hap bilong graun,” na i no bilong wanpela lain tasol.—Buk Song 47:2.

Jehova em nem bilong God wanpela tasol olsem i stap long Baibel. (Kisim Bek 3:15; Buk Song 83:18) Em i kam long wanpela tok Hibru mining bilong en “i kamap,” na sampela saveman i ting mining bilong dispela nem em, “Em i Mekim i Kamap.” Dispela mining i stret tru long wok bilong Jehova olsem Krieta na Man Bilong Inapim ol samting em i tingting pinis long mekim. (Aisaia 55:10, 11) Baibel i helpim yumi tu long kliagut long Man i holim dispela nem Jehova, moa yet nambawan pasin bilong em, pasin laikim.—Kisim Bek 34:5-7; Luk 6:35; 1 Jon 4:8.

Nem Jehova em nem bilong God ol i bin tanim long tok Hibru i go long tok Inglis—4-pela leta יהוה (YHWH), ol i kolim olsem Tetragramaton. Yumi no save gut long hau ol i kolim stret long tok Hibru bilong bipo. Tasol, kirap long bipo yet ol i bin tanim long tok Inglis olsem “Jehova,” fes taim ol i bin trensletim long Baibel bilong William Tyndale long 1530. a

Wai na yumi no save long wei bilong kolim nem bilong God long tok Hibru bilong bipo?

Long rait Hibru bilong bipo i no gat ol vaul, ol yusim tasol konsinan. Taim man i mekim tokples Hibru em yet bai putim ol vaul i stret long wed em i kolim. Tasol bihain long ol i pinis long raitim Ol Skripsa Hibru (“Olpela Testamen”), sampela Juda i kisim wanpela bilip tumbuna olsem em rong long kolim nem bilong God. Taim ol i ritim strong wanpela skripsa i gat nem tru bilong God, ol bai senisim na putim wanpela tok olsem “Bikpela” o “God.” Inap sampela handret yia i lus, na dispela bilip giaman i spred na isi isi wei bilong kolim dispela nem long bipo em i lus olgeta. b

SSampela i ting olsem wei bilong kolim nem bilong God em “Yahweh,” na sampela i tok i gat narapela wei. Wanpela Detsi Skrol i gat liklik hap bilong Buk Wok Pris long tokples Grik em ol i tanim dispela nem olsem Iao. Ol man Grik bilong raitim buk samting long bipo i tok olsem ol i ken kolim tu olsem Iae, I·a·beʹ, na I·a·ou·eʹ, tasol ol i no inap pruvim olsem wanpela bilong ol dispela nem em wei ol i bin kolim long tokples Hibru bilong bipo. c

Tingting kranki ol man i gat long nem bilong God long Baibel

Tingting kranki: Ol trenslesen we i yusim “Jehova” em ol i bin edim dispela nem.

Tok tru: Nem bilong God long tok Hibru i stap long rait Tetragramaton em i stap klostu 7,000 taim long Baibel. d Planti trenslesen i rausim nating nem tru bilong God na senisim long biknem olsem “Bikpela.”

Tingting kranki: God i Gat Olgeta Strong i no nidim wanpela spesel nem.

Tok tru: God yet i givim tingting long ol man bilong raitim Baibel long yusim nem bilong em planti tausen taim, na em i stiaim ol man i lotuim em long yusim nem bilong em. (Aisaia 42:8; Joel 2:32; Malakai 3:16; Rom 10:13) Tru tumas, God i no orait long ol profet giaman em ol i laik mekim ol manmeri i lusim tingting long nem bilong God.—Jeremaia 23:27.

Tingting kranki: Ol i bihainim bilip tumbuna bilong ol Juda, na rausim nem bilong God long Baibel.

Tok tru: Em tru olsem sampela saveman bilong lo bilong lain Juda i no laik kolim nem tru bilong God. Tasol ol i no rausim long ol kopi long Baibel bilong ol. Maski wanem as na ol i mekim olsem, God i no laik bai yumi bihainim ol lo bilong ol tumbuna we i kalapim ol lo bilong em.—Matyu 15:1-3.

Tingting kranki: No ken yusim nem tru bilong God long Baibel bikos ol man i no save long wei stret bilong kolim long tokples Hibru.

Tok tru: Dispela tingting i kamapim olsem God i ekspektim ol manmeri husat i mekim ol narapela tokples long kolim nem bilong em long wankain wei. Tasol Baibel i kamapim olsem lain i lotuim God long bipo em ol i mekim narapela tokples i kolim stret ol nem long wei bilong ol yet.

Eksampel, tingim jas Josua bilong Israel. Long taim bilong ol aposel, ol Kristen i mekim tokples Hibru bai kolim nem bilong em olsem Yehoh·shuʹaʽ, tasol lain i mekim tokples Grik bai tok I·e·sousʹ. Ol stori bilong Baibel long nem Hibru bilong Josua long trenslesen bilong Grik, i soim olsem ol Kristen i bihainim gutpela wei long kolim stret ol nem long tokples bilong ol em planti man i save long en.—Aposel 7:45; Hibru 4:8.

Em wankain pasin ol i bihainim taim ol i trensletim nem tru bilong God. Bikpela samting tru i winim wei bilong kolim em ol i putim bek nem bilong God long ol ples stret bilong en long Baibel.

a Tyndale i bin yusim nem olsem “Iehouah” long trenslesen bilong em long 5-pela fes buk bilong Baibel. Bihain, tok Inglis i senis, na i gat nupela speling bilong nem bilong God. Eksampel, long 1612, Henry Ainsworth i yusim nem olsem “Iehovah” long trenslesen olgeta bilong em long Buk Song. Taim em i mekim rivisen bilong dispela trenslesen long 1639, em i yusim nem olsem “Jehovah.” Olsem tasol, ol trensleta bilong Baibel American Standard Version, ol i wokim long 1901, i yusim nem “Jehova” long ol hap we nem bilong God i stap long rait Hibru.

b Buk New Catholic Encyclopedia, Second Edition, Volume 14, pes 883-884, i tok: “Sampela taim bihain long ol i lusim pinis kalabus, ol i stat long tingim dispela nem Yahweh i holi tru, na ol i kirap senisim dispela nem na kolim ADONAI o ELOHIM.”

c Bilong kisim sampela save moa, lukim apendiks A4, “Nem Bilong God Long Ol Skripsa Hibru,” long Nupela Taim Trenslesen Bilong Ol Skripsa Holi.

d Lukim Theological Lexicon of the Old Testament, Volume 2, pes 523-524.