جاستاردىڭ ساۋالدارى
تاتۋيروۆكا جاساتقانىم دۇرىس پا؟
نەگە بىرەۋلەر تاتۋعا قىزىعادى؟
«مەنىڭشە، كەيبىر تاتۋيروۆكالار ناعىز ونەر تۋىندىلارى»،— دەيدى رايان ەسىمدى جىگىت.
تاتۋيروۆكاعا دەگەن كوزقاراسىمىزعا باسقالاردىڭ مىسالى اسەر ەتۋى مۇمكىن. دجيليان ەسىمدى بويجەتكەن بىلاي دەيدى: «مەنىمەن مەكتەپتە بىرگە وقىعان ٴبىر قىزدىڭ كىشكەنتاي كەزىندە اناسى قايتىس بولعان. ٴسۇيتىپ ول جاسوسپىرىم شاعىندا، موينىنىڭ ارتىنا اناسىنىڭ اتىن جازدىردى. مەنىڭ ويىمشا، مۇنداي تاتۋيروۆكا وتە تارتىمدى كورىنەدى».
ٴبىراق نيەتىڭ جاقسى بولسا دا، ومىرلىك تاڭبا جاساتپاس بۇرىن كوپ ويلانعانىڭ ٴجون. تاتۋيروۆكا جاساتۋ تۋرالى ويلانىپ جۇرسەڭ، نەنى ەسكەرۋىڭ كەرەك؟ جازبالاردا بۇعان قاتىستى قانداي پرينسيپتەر بار؟
نەنى ەسكەرۋىڭ كەرەك؟
بۇل دەنساۋلىققا قالاي اسەر ەتەدى؟ مەيو كلينيكاسىنىڭ تور بەكەتىندە بىلاي دەلىنگەن: «تاتۋيروۆكا سالدىرعاندا تەرى تەسىلەتىندىكتەن، ادام تەرى اۋرۋىن جۇقتىرىپ الۋى نە باسقا دا اسقىنۋلار بولۋى مۇمكىن. كەيدە تەسىلگەن تەرىنىڭ اينالاسىندا گرانۋلەما دەپ اتالاتىن بورتپە تۇيىنشەكتەر پايدا بولۋى مۇمكىن. سونداي-اق تەرىنىڭ تىرتىق جەرى وسپە ىسپەتتى ٸسىپ كەتۋى (كەلويد) ابدەن مۇمكىن». بۇل تور بەكەتتە تاعى بىلاي دەلىنگەن: «ەگەر تاتۋ جاسايتىن قۇرال دۇرىس تازارتىلماسا، قان ارقىلى بەرىلەتىن اۋرۋلاردى جۇقتىرىپ الۋ وپ-وڭاي».
وزگەلەر ساعان قالاي قاراۋى مۇمكىن؟ قالاساڭ دا، قالاماساڭ دا، ادامدار تۇرىڭە قاراپ تون پىشەدى. ولار سەنى ەسى كىرگەن، سەنىم ارتۋعا بولاتىن ادام دەپ قاراستىرۋى نە سەن تۋرالى «ول ٵلى بالا، بالانىڭ ٸسى شالا» دەۋى مۇمكىن. سامانتا ەسىمدى قىز بىلاي دەيدى: «تاتۋيروۆكاسى بار ادامدى كورسەم، بىردەن ونى كۇندە ماس بولىپ، قىزىق قۋاتىن ادام دەپ ويلايمىن».
ال 18 جاسار مەلاني بىلاي دەيدى: «مەنىڭشە، تاتۋيروۆكا ادامنىڭ شىن كەلبەتى مەن ىشكى سۇلۋلىعىن جاسىرادى. كەيبىرەۋلەر تاتۋيروۆكانى وزدەرىنىڭ شىنايى بولمىسىن كورسەتكىسى كەلمەگەندىكتەن جاساتاتىن سياقتى».
كەيىن وكىنىپ قالمايسىڭ با؟ ۋاقىت وتە كەلە سالماق قوسۋدىڭ نە قارتايۋدىڭ سالدارىنان تەرىسى سوزىلىپ، ادامنىڭ تاتۋيروۆكاسىنىڭ دا ٴتۇرى وزگەرەدى. «ٴبىراز جىلدان كەيىن تاتۋيروۆكالارى جامان بولىپ كەتكەن ادامداردى كورگەم»،— دەيدى دجوزەف ەسىمدى جىگىت.
«تاتۋيروۆكالار ەسكىرەدى،— دەيدى 21 جاسار اللەن.— ادامعا ٴبىر كەزدەرى ماڭىزدى بولىپ كورىنگەن نارسەلەر بىرنەشە جىلدان كەيىن ماڭىزىن جوعالتىپ جاتادى».
اللەننىڭ ٴسوزىنىڭ جانى بار. جاسى كەلگەن سايىن، ادامنىڭ كوزقاراسى، تالعامى وزگەرەدى، ٴبىراق تاڭباداي باسىلعان تاتۋيروۆكالارى سول كۇيى قالادى. تەرەزا ەسىمدى جاس ايەل بىلاي دەيدى: «كەيىن، جىلدار وتە كەلە، وكىنىپ جۇرەتىن اقىماق ىستەرىمنىڭ تىزىمىنە تاتۋيروۆكانى قوسقىم كەلمەس ەدى».
جازبالاردا بۇعان قاتىستى قانداي پرينسيپتەر بار؟
پاراساتتى ادام ماڭىزدى شەشىم قابىلداردا تارازى باسىن تەڭەستىرىپ، جاقسىلاپ ويلانىپ الادى (ناقىل سوزدەر 21:5؛ ەۆرەيلەرگە 5:14). ەندەشە تاقىرىبىمىزعا قاتىستى جازبالارداعى كەلەسى پرينسيپتەردى قاراستىرايىق.
قولوستىقتارعا 3:20: «بالالار، ٵردايىم اتا-انالارىڭا مويىنسۇنىڭدار، ويتكەنى بۇل يەمىزگە ۇنايدى».
اتا-اناڭمەن ٴبىر ۇيدە تۇرىپ، ٴبىراق ولاردىڭ ايتقانىنا قۇلاق اسپاساڭ، بۇنىڭ سالدارى قانداي بولۋى مۇمكىن؟
پەتىردىڭ 1-حاتى 3:3، 4: «سەندەردىڭ كورىكتەرىڭ شاش ٶرۋ، التىن بۇيىمدار نە قىمبات كيىمدەر سياقتى سىرتقى اشەكەيلەر ەمەس، قايتا، جان-دۇنيەلەرىڭدەگى ٴسانى كەتپەس اشەكەيلەر، ياعني قۇدايدىڭ كوز الدىندا اسا باعالى سانالاتىن بيازى دا جۇمساق مىنەزدەرىڭ بولسىن!»
قالاي ويلايسىڭ، نەگە كيەلى كىتاپتا ادامنىڭ كەلبەتىنە ەمەس، «جان دۇنيەسىنە» كوپ كوڭىل بولىنەدى؟
تىموتەگە 1-حات 2:9: «ال ايەلدەر ارلەنىپ-ساندەنگەندە،.. قاراپايىم دا ەستى بولسىن».
بۇل جەردەگى «قاراپايىم» ٴسوزى نەنى بىلدىرەدى؟ نەگە ادامدى تاتۋيروۆكا ەمەس، قاراپايىمدىلىق تارتىمدى ەتەدى؟
ريمدىكتەرگە 12:1: «دەنەلەرىڭدى ٴتىرى، قاسيەتتى، قۇدايعا ۇنامدى قۇرباندىق رەتىندە ۇسىنىڭدار. وسىلاي ەتكەندەرىڭ اقىل-ويلارىڭدى ىسكە قوسىپ اتقارعان قاسيەتتى قىزمەتتەرىڭ بولماق».
ٶز دەنەڭمەن نە ىستەيتىنىڭ نەلىكتەن قۇداي ٷشىن ٴبارىبىر ەمەس؟
وسى جايتتاردى قاراستىرا كەلە، كوپ جاستار تاتۋ جاساتپاۋدى شەشتى. ولار ماڭىزدى ٴبىر نارسەنى ٴتۇسىندى. جوعارىداعى تەرەزا بىلاي دەيدى: «ەگەر سۇيىكتى سوزدەرىڭ نە جاقسى كورەتىن ادامىڭ بولسا، ەڭ دۇرىسى، سول سوزدەرگە ساي ٶمىر ٴسۇرۋ، ال سۇيىكتى ادامىڭا ونى قانشالىقتى جاقسى كورەتىنىڭدى ايتۋ. تاتۋ جاساتقانشا، سەنگەن نارسەڭە ساي ٶمىر ٴسۇر».