“Kinde m’abedongo, gin m’ubino ira tek ninyego i kume ubino nia co wada ubed utelo nen para lee mandha. Abed aparu nia etie lembe moko ma bikadhu akadha, ento parune sendo wiya asu tin eni de.”​—David, oro 23.

 David utie Jakristu m’ubemito enyay mutoro i Mungu. Nyo andha ecopo timo kumeno ma ke etie kud ava mi timo ribiri ku co wagi? Paru pa Mungu utie ang’o iwi timo ribiri co ku co man mon ku mon?

•  Biblia uyero ang’o?

•  Nyo eno nyutho nia . . . ?

•  Ento ka . . . ?

 Paru mi dhanu iwi timo ribiri co ku co man mon ku mon copo koc nimakere ku suru man rundi ma jubekwo i iye. Ento Jukristu giweko ngo paru m’unyai akeca re m’utel wigi kadi ‘giweko ngo bende wang’gi ulal i tok yamu mi ponji ma tung’ tung’.’ (Juefeso 4:14) Tung’ ku maeno, cik ma nwang’ere i Lembe pa Mungu re ma telo wigi pi ning’eyo timo m’ukwayu gibed ko iwi lembe m’uneno gribiri co ku co man mon ku mon, ku kit timo mange bende ma kumeno.

 Cik mi Biblia iwi timo ribiri co ku co man mon ku mon utie terere. Lembe pa Mungu uwacu kumae:

•  ‘Kud ivut ku co calu ma juvuto ko ku mon.’​—Lembe mi Julawi 18:22.

•  “Mungu uweko gipong’ awanya ma rac mir adundegi, . . . [e]wenjogi ni awanya ma rac mi tarwang’ ma nyayu lewic, kum mon migi de giweko timo ribiri i ayi m’atira ku co, ento gibetimo ribiri i ayi m’atira ngo.”​—Jurumi 1:24, 26.

•  “Kud wuwonduru: Kadok ju ma gitimo lembsasa mi tarwang’, kadi ju ma rwo ni ayi gin m’acwiya, kadok weg asara, kadok co ma yiyo co wagi utim kugi ribiri, kadi co ma vuto ku co wagi, kadi jukwo, kadi ju ma ketho cwinygi hai i kum piny, kadi ju ma mer ku kong’o, kadi ju ma yanyu ayany, kadi weg ayeki, gibimondo ki ngo i Ker pa Mungu.”​—1 Jukorintho 6:9, 10.

 I andha, cik pa Mungu utie pi dhanu ceke, kadok nwang’u gitie ku paru mi gamiri co ku co kunoke mon ku mon, kadi gitie ku paru mi gamiri m’atira. Lembe m’ukwayere utie nia ng’atuman ucikere nikwerere gire kinde m’etie kud ava mi timo gin moko ma nyayu ngo mutoro i Mungu.​—Jukolosai 3:5.

 Nyo eno nyutho nia Biblia ubecwaluwa nidagu ju ma gitie ku paru mi ribiri co ku co man mon ku mon?

 Ungo. I andha, Biblia ubecwaluwa ngo nidagu ng’atu moko, dok ebed ng’atu m’utie ku paru mi amiri co ku co kunoke mon ku mon, kadi ju ma gitie ku paru mi gamiri m’atira. Tung’ ku maeno, ebemiyo amora i kumwa nia ‘wayeny nibedo ku kwiyocwiny ku dhanu ceke,’ m’umbe nidieng’ i kum kit kwo migi. (Juebrania 12:14) Pieno, etie lembe ma rac nibeteliri ku kwinyo ku dhanu ma gitie ku paru mi ribiri co ku co kunoke mon ku mon, kunoke niyenyo i ayi moko ci ninyayu peko i kumgi.

 Nyo eno ubenyutho nia Jukristu gicikiri nijai i kum cik m’uyiyo gamiri co ku co man mon ku mon?

 Biblia unyutho nia cik ma Mungu uketho iwi gamiri utie nia gamiri ubed i kind nico acel ku dhaku de acel. (Matayo 19:4-6) Ento cik ma dhanu ubeketho iwi gamiri co ku co man mon ku mon ucungo iwi lemgamba, enre ungo iwi lembe mi kurajo. Biblia uwacu nia Jukristu kud gimond i lemgamba. (Yohana 18:36) Pieno, gicwaku ngo, kadi giceriri de ngo i kum cik moko ma gavmenti uketho iwi gamiri co ku co kunoke mon ku mon, kadi iwi lembe mi ribiri co ku co man mon ku mon.

 Ento ka ng’atu moko tin eni ucuku betimo ribiri co ku co kunoke mon ku mon, nyo ng’atu maeno copo lokere?

 Eyo. Kadok dhanu moko mi rundi ma kwong’a bende gigam gilokiri! I ng’ei ma Biblia uyero nia dhanu ma timo ribiri co ku co kunoke mon ku mon gibicamu Ker pa Mungu ngo, emedo kumae: “Yang’ jumoko m’i kindwu gibino kumeno.”​—1 Jukorintho 6:11.

 Nyo eno nyutho nia dhanu ma gibed gitimo ribiri co ku co man mon ku mon, dong’ gibedo mbe kud ava mi lembe ma gibed gitimone nyanok de? Ungo. Biblia uwacu kumae: “Wurony ng’atu ma nyen, ma ni kum ng’eyong’ec ma tap ebemedere nidoko nyen.” (Jukolosai 3:10) Alokaloka utie ngo gin ma timere pi nindo acel kende.

 Ento ka paru mi timo ribiri co ku co kunoke mon ku mon ucuku sendo asu wi ng’atu moko m’ubemito lubo cik pa Mungu ke?

 Rom rom kud awanya moko ci, ng’atini copo ng’iyo nibeparu ngo nakanaka i wiye kunoke ecopo ng’iyo nikabe cen. Nenedi? Biblia uyero kumae: “Wumeduru niwotho nimakere ku tipo, e wubipong’o ngo awanya mi kum nyanok de.”​—Jugalatia 5:16.

 Nen nia giragora maeni uyero ngo nia ng’atini bibedo mbe kud awanya mi kum. Ento kan etie ku ng’iyo mi ponjo Biblia man ebed erwo, ebinwang’u tego mi cerere ni awanya mi kume.

 David ma waweco pire i acaki, ugam unwang’u nia eno tie lemandha, asagane i ng’ei m’ekoro lembe m’ebenyego ko ni junyodo pare ma gitie Jukristu. Eyero kumae: “Ebino ter moko ma pek mandha m’ubino nura, man anwang’u nia ka nang’u alar akoro igi lembene i wang’e, nwang’u akwo kud anyong’a lee i aradu para.”

 M’usagu zoo, ka wakwo nimakere ku cik pa Yehova, wabibedo kud anyong’a. Wayiyo ku cwinywa ceke nia cik pare tie “atira, m’enyayu anyong’a i adunde,” man nia “sukulia ma dit nuti kum worogi.”​—Zaburi 19:8, 11.