“Kan nagdadakula ako, an saro sa pinakamasakit na kaipuhan kong paglabanan iyo an pagkagusto sa kapareho kong sekso. Paghuna ko malihis lang an panahon na idto, pero sagkod ngunyan yaon pa man giraray an pagmating iyan.”—David, 23.

 Si David sarong Kristiyano na gustong paugmahon an Diyos. Pero magigibo niya daw iyan kun nagkakagusto siya sa saro na kapareho niya nin sekso? Ano daw talaga an namamatian nin Diyos manungod sa homoseksuwalidad?

•  Ano an sinasabi kan Bibliya?

•  Buot sabihon daw kaiyan . . . ?

•  Pero paano kun . . . ?

 An sabuot kan mga tawo manungod sa homoseksuwalidad iba-iba sa lambang kultura o peryodo nin panahon. Pero an mga Kristiyano dai nagpapaimpluwensiya sa opinyon kan kadaklan o dai “pigpapadpad kun sain-sain kan lambang duros nin katukduan.” (Efeso 4:14) Imbes, ibinabase ninda an pagmansay ninda sa homoseksuwal na paggawi (asin sa iba pang klase nin paggawi) sa mga pamantayan na yaon sa Bibliya.

 Malinaw an pamantayan kan Bibliya sa homoseksuwal na mga gibo. An Tataramon nin Diyos nagsasabi:

•  “Dai ka makidurog sa lalaki siring sa pakikidurog mo sa babayi.”—Levitico 18:22.

•  “Huling gusto nindang sunudon an mga pagmawot kan saindang puso, . . . pinabayaan sinda nin Diyos sa saindang makasusupog na seksuwal na pagmawot, mala ta habo na kan mga babayi an normal na pakikidurog asin mas pinili ninda an bakong normal.”—Roma 1:24, 26.

•  “Dai kamo magpadaya. An mga tawong imoral, mga parasamba sa idolo, mga parasambay, mga lalaking nagpapagamit sa kapwa lalaki, mga lalaking nagdudurog sa kapwa lalaki, mga parahabon, mga mahanab, mga buratsero, mga paralait, asin mga parakikil dai magmamana kan Kahadian nin Diyos.”—1 Corinto 6:9, 10.

 An totoo, aplikado an mga pamantayan nin Diyos sa gabos na tawo, nagkakagusto man sinda sa kapareho ninda nin sekso o sa bako nindang kasekso. Sa katunayan, an gabos kaipuhan na magkaigwa nin pagpupugol sa sadiri kun manungod sa pagmawot na gumibo nin mga bagay na dai ikinakaugma nin Diyos.—Colosas 3:5.

 Buot sabihon daw kaiyan sinasabi kan Bibliya na dapat kitang maanggot sa mga homoseksuwal?

 Dai. An totoo, dai sinasabi kan Bibliya na dapat kitang maanggot sa siisay man—homoseksuwal man siya o bako. Imbes, sinasabi kaiyan sato na ‘makipagkatuninungan sa gabos na tawo,’ ano man an saindang istilo nin pamumuhay. (Hebreo 12:14) Kaya sala na mam-bully sa mga homoseksuwal, gumibo nin krimen huli sa pagkaungis sa sainda, o maltratuhon sinda sa ano man na paagi.

 Buot sabihon daw kaiyan dapat na kontrahon kan mga Kristiyano an mga ley na nagtutugot sa pag-aguman nin magkapareho nin sekso?

 Ipinapahiling kan Bibliya na an pamantayan nin Diyos sa pag-aguman iyo na sarong lalaki saka sarong babayi an mag-iibanan. (Mateo 19:4-6) Alagad, an mga pinag-uurulayan sa mga ley nin tawo manungod sa pag-aguman nin magkapareho nin sekso sarong pulitikal na isyu, bakong isyu may koneksiyon sa mga pamantayan sa moral. Sinasabi kan Bibliya na an mga Kristiyano dapat na magdanay na neutral sa pulitika. (Juan 18:36) Kaya dai ninda sinusuportaran o kinokontra an mga ley kan gobyerno may koneksiyon sa pag-aguman nin magkapareho nin sekso o sa homoseksuwal na paggawi.

 Pero paano kun may saro na nagsasagibo nin homoseksuwalidad ngunyan? Puwede pa daw magbago an tawong iyan?

 Iyo. Sa katunayan, nagibo iyan kan nagkapira kan inot na siglo! Pagkatapos na sabihon na an mga nagsasagibo nin homoseksuwalidad dai magmamana kan Kahadian nin Diyos, sinasabi kan Bibliya: “Arog kaiyan dati an nagkapira sa saindo.”—1 Corinto 6:11.

 Nangangahulugan daw iyan na idtong mga dai na nagsasagibo nin homoseksuwalidad dai na nakakamati nin ano man na pagmawot na bumalik sa dati nindang pamumuhay? Dai man. Sinasabi kan Bibliya: “Isulot nindo an bagong personalidad, na paagi sa tamang kaaraman [ginigibo iyan na] bago.” (Colosas 3:10) An pagbago sarong nagpapadagos na proseso.

 Pero paano kun an saro na gustong sunudon an pamantayan nin Diyos igwa pa man giraray nin homoseksuwal na mga pagmawot?

 Arog nin ibang pagmawot, puwedeng pilion nin saro na kontrulon o dai paggibuhon an mga pagmawot na iyan. Paano? Sinasabi kan Bibliya: “Padagos kamong maglakaw sigun sa espiritu asin dai nindo nuarin man maisasagibo an ano man na makalaman na pagmawot.”—Galacia 5:16.

 Mangnuhon na dai sinasabi kan bersikulong iyan na dai na magkakaigwa nin makalaman na pagmawot an sarong tawo. Imbes, paagi sa pagkaigwa nin marahay na rutina nin pag-adal sa Bibliya saka pagpamibi, magkakaigwa siya nin kusog na labanan an mga pagmawot na iyan.

 Napatunayan ni David, na nasambitan sa inutan, na totoo iyan—lalo na kan sabihon na niya sa Kristiyanong mga magurang niya an manungod sa mga piglalabanan niya. “Garo nahali su magabaton kong pasan,” an sabi niya, “saka siguro mas na-enjoy ko su buhay ko kan tin-edyer ako kun ipinakipag-ulay ko tulos idto sainda.”

 An totoo, mas maugma kita pag sinusunod ta an mga pamantayan ni Jehova. Kumbinsido kita na an mga iyan “matanos, nakakapaugma sa puso,” asin na “sa pag-utob sa mga iyan, igwang dakulang balos.”—Salmo 19:8, 11.