“El uno na maga dificil problema que ya enfrenta yo amo que ta quierre yo con otro hombre. Pensaba yo hay perde lang se pasa el tiempo pero ansina siempre el cosa yo ta sinti.”​—David, 23.

 Un Cristiano si David quien quierre hace alegre con Dios. Puede ba le se hace maskin ta quierre le con otro hombre? Cosa el mirada del Dios na homosexualidad?

•  Cosa el Biblia ta habla?

•  Ese ba quierre decir . . . ?

•  Pero quetal si . . . ?

 Otro-otro el mirada del maga gente na homosexualidad depende na cultura y ta cambia tambien se mientras ta pasa el tiempo. Pero, el maga Cristiano gendeh ta acepta con ese mirada o “ta sigui na viento de maskin cosa clase de doctrina.” (Efeso 4:14, El Nuevo Testamento na Chavacano) Sino, ta mira sila con el maga trabajo de homosexualidad (y con el otro pa maga conducta que tiene que hace con ese) asegun na maga principio na Biblia.

 Claro si cosa el principio del Biblia acerca na maga trabajo de homosexualidad. El Palabra del Dios ta habla:

•  “No man sexo na igual hombre igual si paquemodo tu tan sexo na un mujer.”​—Levitico 18:22.

•  “El Dios ya entrega canila na maga mal deseo del diila corazon . . . ya entrega canila na maga maca-huya vicio: cay el diila maga mujer ya cambia el uso natural del diila cuerpo con el uso gendeh natural.”​—Roma 1:24, 26.

•  “No ustedes hace loco con el de ustedes mismo cuerpo, cay aquellos ta hace cosa immoralidad, o ta adora con el maga dios-dios, o ta comete adulterio, el maga hombre que ta hace cosa immoral con otro maga hombre, el maga ladron, el maga hambre, el maga borachon, el maga chismoso, y el maga engañador gendeh gayot ay hereda el Reino del Dios.”​—1 Corinto 6:9, 10.

 El maga principio del Dios aplicable na todo gente, tiene man sila deseo de homosexual o heterosexual. Todo kita debe controla con el diaton mismo cuerpo para evita hace maga cosas que gendeh aceptable con Dios.​—Colosa 3:5.

 Ese ba quierre decir que el Biblia ta enseña kanaton que odia con el maga homosexual?

 Gendeh. Gane, el Biblia gendeh ta enseña que odia con maskin quien​—homosexual man sila o gendeh. Sino, ta habla este kanaton que “precura tene paz con todo el maga gente,” maskin cosa pa man el diila background. (Maga Hebreo 12:14) Poreso gendeh justo que man bully, odia o maltrata na maskin cosa manera con el maga homosexual.

 Ese ba quierre decir que el maga Cristiano debe man contra con el maga ley que ta permiti con el same-sex marriage?

 El principio del Dios na Biblia ta dale mira que el matrimonio amo un relacion entre na un hombre y un mujer. (Mateo 19:4-6) Pero, el maga ley que ya hace el gobierno acerca na same-sex marriage amo base na maga opinion del gente y gendeh na Palabra del Dios. El Biblia ta habla que el maga Cristiano debe esta neutral na politica. (Juan 18:36) Poreso, gendeh sila ta recomenda o tan contra con el maga ley del gobierno que tiene que hace na same-sex marriage o na maga trabajo de homosexual.

 Pero quetal si el un persona ta practica homosexualidad? Puede ba le cambia?

 Si. Gane, ansina el cosa ya hace el cuanto del primer siglo! Despues menciona que aquellos quien ta practica homosexualidad gendeh hereda con el Reino del Dios, el Biblia ya habla: “Tiene de ustedes ansina tamen estaba.”​—1 Corinto 6:11.

 Ese ba quierre decir que aquellos quien ya descanza practica homosexualidad nuay mas inclinacion bira na diila manera de vida de antes? Gendeh. El Biblia ta habla: “Visti el camisa del nuevo naturaleza [“personalidad,” NWT] que ta sigui crici firmi na deverasan saber.” (Colosa 3:10) Debe kita continua hace maga cambio na diaton personalidad.

 Pero quetal si el un persona quien quierre sigui con el maga principio del Dios tiene siempre deseo de homosexualidad?

 Igual na otro deseo, el un persona puede iscuji que no hace con ese o continua pensa acerca con ese. Paquemodo? El Biblia ya habla: “Si ay vivi ustedes asegun con el Espiritu, gendeh ustedes ay sigui el maga mal deseo del cuerpo.”​—Galacia 5:16.

 Nota que nuay menciona na versiculo que el un persona gendeh hay tene mal deseo del cuerpo. Sino, por medio na ayuda del estudiada del Biblia y rezo, puede le tene el fuerza para resisti con ese maga deseo.

 Si David que ya menciona na principio ya puede experiencia que deverasan ese especialmente despues ele puede converza con el de suyu Cristiano mayores acerca con ese dificultad. “Ya tiene gayot yo alivio,” ya habla ele, “y posible nuay yo man enjoy el de mio vida cuando teenager si nuay yo se habla dayun kanila.”

 Hay queda kita pirmi alegre si hay vivi kita harmonia na maga principio de Jehova. Convincido kita que el maga ley del Dios “recto, ta hace alegre con el corazon” diaton y “si sigui con este, tiene grande premio.”​—Salmo 19:8, 11.