“Chize mu wanuke, napwile ni kupinda chinji mumu te nakuzanga kulisumbakenya ni malunga-ni-akwetu. Namwene ngwe manyonga jacho kali a shimbu likehe wika mba te mapalika, alioze nakupinda no ndo musono.”—David, 23.

 David kali mukwa-Kristu yoze unazange kuvwisa Zambi kuwaha. Shina iye mahasa lume kuvwisa Zambi kuwaha chipwe ngwe kakwete usolo wa kulisumbakenya ni malunga-ni-akwo? Yika Zambi akunyonga ha utumwa?

•  Yika Mbimbiliya yakwamba?

•  Shina chino chinalumbunuka ngwo . . . ?

•  Mba nyi ngwe . . . ?

 Manyonga ja atu hakutwala ku utumwa kakulisa kulita ni chako cho hanji mashimbu jo. Alioze, akwa-Kristu keshi kukaula nyonga lia mbunga hanji ngwetu, “kuhungumioka kweka ni kweka ni fuji yeswe ya longeso.” (A-Efwesu 4:14) Alioze nyonga lio hakutwala ku utumwa (ni ha yuma yikwo ya ku mwono) liakukatuka mu Mbimbiliya.

 Shimbi ja Mbimbiliya hakutwala ku utumwa japwa zwalala. Yinambe ngwo:

•  “Kanda upomba ni lunga ukamutenge pwo. Acho chuma cha kuvwisa lwaji.”—Ulevi 18:22.

•  “Zambi waechelele ku usolo wa mbunge jo, . . . waechelele ku luchisa wa mbunge jo: mumu mapwo jo alumwine chize chinalite ni chisemewa, akalinge chize kuchalitele.”—A-Roma 1:24, 26.

•  “Kanda nulionga: chipwe mapangala, chipwe akwa kukombelela mahamba, chipwe yitanji, chipwe akwa luchisa, chipwe akwa utumwa, chipwe eji, chipwe akwa kwivwa kuzo, chipwe akwa kuzengewa, chipwe akwa kutukana, chipwe akwa kuhianyisa ndando, kechi kahinga wanangana wa Zambi.”—1 A-Korindu 6:9, 10.

 Nyonga lia Zambi ha chikuma chino linakwate hali atu eswe, chipwe ngwe atu jacho kakulizanga mapwo ni mapwo, malunga ni malunga hanji ka. Umwenemwene uli ngwo, mutu ni mutu katamba kusa tachi hanga ehuke yuma yize muyivwisa Zambi chinyengo.—A-Kolosu 3:5.

 Shina Mbimbiliya yinambe ngwo twatamba kuvwila kole atu jacho?

 Ka. Kwamba umwenemwene, Mbimbiliya yakwamba ngwo, kutwatambile kuvwila kole mutu niumwe—chipwe ngwe mutu wacho kalinga mukwa utumwa. Alioze yakwamba ngwo, twatamba kununga ni kufupa sambukila ni atu eswe, chipwe ngwe atu kakumbata mwono mu mulali wo. (A-Hepreu 12:14) Kashika chili chipi kuyenga-yenga, kuvwila kole, hanji kumwesa lamba atu waze ambata mwono wa utumwa.

 Shina chino chinalumbunuka ngwo akwa-Kristu katamba kulimika ni shimbi jize jakuhakwila umbachiso wa pwo ni pwo hanji lunga ni lunga?

 Mbimbiliya yakulongesa ngwo, Zambi katangile umbachiso hanga upwe hakachi ka lunga ni pwo. (Mateu 19:4-6) Alioze, shimbi jize manguvulu akutunga hanga pwo ni pwo hanji lunga ni lunga alimbate, jinatale ha yuma ya mafwefwe. Kashika, Mbimbiliya yakwamba ngwo, akwa-Kristu katamba kwehuka yuma ya mafwefwe. (Yoano 18:36) Chocho, akwa-Kristu keshi kukwasa hanji kulimika ni shimbi jize jakutayiza umbachiso wa pwo ni pwo hanji lunga ni lunga. Chino chinakwate nawa ha chuma cheswacho chize chinatale ha utumwa.

 Mba nyi ngwe mutu umwe hanalingi utumwa? Shina mahasa kwalumuka?

 Ewa. Chipwe ku mashimbu a kunyima kwapwile atu waze te akulinga utumwa, alioze kahashile kwalumuka! Hanyima lia kwamba ngwo, waze akulinga yuma ya utumwa kechi kahinga Wanangana wa Zambi, Mbimbiliya yinambe ngwo: “Nyi yenu chocho nwapwile.”—1 A-Korindu 6:11.

 Shina chino chinalumbunuka ngwo, atu waze echele mwono wa utumwa kechi kwivwa nawa usolo wacho? Ka. Mbimbiliya yakwamba ngwo, twatamba ‘kuzala utu waha, uze anamupwisa waha ha yinyingi yeswe, nikulita ni kulifwa cha yoze wautangile.’ (A-Kolosu 3:10) Kwalumuka chacho hi chuma ko chize chakulingiwa chisuho chimuwika, ka.

 Mba yika mutu atamba kulinga nyi ngwe kanazange kulingila Zambi alioze uchili ni manyonga a utumwa?

 Chizechene ngwe chakulingiwa ni manyonga akwo, mutu mahasa kusakula kwehuka kuzalisa mbunge yenyi ni manyonga jacho ni kusa tachi hanga achine kufwa nawa mu muheto wacho. Kuchi mahasa kuchilinga? Mbimbiliya yakwamba ngwo: “Endenu muli spiritu, mba kunuchi kamanununa usolo wa musunya.”—A-Ngalashia 5:16.

 Twamona ngwetu, chisoneko kuchambile ngwo, mutu kechi kupwa nawa ni manyonga a musunya ngwe manyonga a utumwa. Alioze, chinambe ngwo, nyi mutu malilongesa Mbimbiliya mashimbu eswe ni kulemba kuli Zambi, mapwa ni tachi ja kukumba manyonga api.

 David, yoze twatongolanga ku uputukilo, kakuhasa kuchilinga—chipi-chipi hanyima lia kuhanjika ni yisemi jenyi akwa-Kristu hakutwala ku kapinda wacho. Hanyima lia kuhanjika ni yisemi jenyi, iye yamba ngwenyi: “Chapwile ngwe nachiza yilemu ha yipaya. Nyi naliangile kuhanjika ni yisemi jami mu wanuke, kachi chapemene chinji.”

 Kwamba umwenemwene, mutuwahilila wika nyi twatwama kulita ni shimbi ja Yehova. Tuli ni shindakenyo ngwetu, “shimbi ja Yehova japwa jamwenemwene, jakuwahisa mbunge,” kashika, mutuwahilila chinji nyi mutujononokena.—Samu 19:8, 11.