“Ka hun upat tikah ka caah a har bikmi pakhat cu pa pawl cung lawngah ka lungthin a ummi kha a si. Mah lungthin cu chikkhat lawng a si lai, a hnuah a tlau te ko lai tiah ka rak ruah nain atu tiang a um rih.”​—David, 23.

 David cu Pathian duhnak tuah a duhmi Khrihfa pakhat a si. Asinain ngeih-khat pawl cung lawngah a lungthin a um buin Pathian duhnak a tuah kho hnga maw? Ngeih-khat umṭinak he aa tlaiin Pathian hmuhnak cu zeidah a si?

•  Baibal nih zeidah a chim?

•  Baibal nih mah hi a chim duhmi a si maw?

•  Mah thil sining ah tah zeitin?

 Ngeih-khat umṭinak he aa tlaimi hmuh ning cu nunphung pakhat le pakhat aa lawh lai lo bantukin chan khat hnu chan khat zong aa lo men lai lo. Asinain Khrihfa a simi nih mi tampi an cohlanmi paoh kha kan cohlang lo asiloah “thlichia bantuk a simi nih a kenkip ah a choihmi” kan si lo. (Efesa 4:​14) Ngeih-khat umṭinak (le a dang tuahsernak) cung i kan hmuh ning cu Baibal phunglam cungah hram aa bunh.

 Ngeih-khat umṭinak he aa tlaimi Baibal phunglam cu a fiang tuk. Baibal nih hitin a ti:

•  “Nu he ihṭi bantukin pa he na itṭi lai lo; mah cucu fihnung a si.”​—Levitikas 18:22.

•  “Pathian nih khan, an lungthin nih tuah a duhmi, . . . pumsa duhnak ah khan a thlah hna. Nu hmanh nih khan ningcang tein hman awk a simi an nu sinak cu ningcang lo piin an hman.”​—Rom 1:​24, 26.

•  “Nanmah le nanmah kha i hleng len hlah u; misual mi le siasal a biami le vacung pa duhmi le nu nih nu he sualnak, pa nih pa he sualnak a tuahmi le, mi thil a chutmi le hak a kaumi le zu a rimi le mi congawih a hmangmi le mifir a simi hna nih cun Pathian pennak cu an co lai lo.”​—1 Korin 6:​9, 10.

 A tak ti ahcun Pathian phunglam cu ngeih-khat he umṭi a duhmi an si ah, ngeih-dang he umṭi a duhmi an si ah kan dihlak he aa pehtlai. Mikip nih Pathian huatmi thil hna tuah duhnak lungput kan hun ngeih tikah kan lungthin i uk cu a biapi tukmi a si.​—Kolose 3:5.

 Ngeih-khat he umṭi duhnak lungthin a ngeimi hna kha huat awkah Baibal nih a chim duhmi a si maw?

 A si lo. Baibal nih ngeih-khat he umṭi a duhmi asiloah ngeih-dang he umṭi a duhmi paoh kha nan huat hna lai tiah a ti lo. An nunning cu zeiti a si hmanhah ‘mikip he rem i zuam u’ tiah Baibal nih a kan forh. (Hebru 12:14) Cucaah ngeih-khat he umṭi a duhmi pawl va nehsawh, va doh le a ding loin pehtlaih ti bantuk tuahsernak vialte cu a palhmi an si.

 Khrihfa hna nih ngeih-khat i ṭhitumnak upadi kha kan ralchanh tinak a si maw?

 Ṭhitumnak he aa tlaiin Pathian phunglam cu pa pakhat le nu pakhat i fonh kha a si tiah Baibal nih a ti. (Matthai 19:​4-6) Asinain ngeih-khat i ṭhitumnak he aa tlaimi upadi kong i ruahceihnak cu ramkhel lei kongkau he aa pehtlaimi a si. Khrihfa hna cu ramkhel lei ah i tel lo dingin Baibal ah a langhter. (Johan 18:36) Cucaah ngeih-khat umṭinak le i ṭhitumnak he aa tlaimi cozahlei upadi hna cohlan le ralchanh ti bantuk kha Khrihfa nih kan tuah lo.

 Asinain mi pakhat cu ngeih-khat he a umṭimi a si ah tah zeitin? Anih cu aa thleng kho maw?

 Aa thleng kho. Kumzabu pakhatnak lioah mi cheukhat zong cu bantuk mi an rak si! Pa nih pa he, nu nih nu he sualnak a tuahmi hna cu Pathian pennak an co lai lo tiah a ti hnuah “a cheu cu, cu bantuk cu nan rak si” tiah a ti.​—1 Korin 6:​11.

 Ngeih-khat umṭinak a ngol cangmi pakhat cu, cu bantuk duhnak a ngei kho ti lai lo tinak a si maw? A si lo. Baibal nih hitin a ti: “Mithar cu nan i hruk cang . . . Hi mithar hi a Sertu Pathian nih . . . a thar chuah lengmangmi cu a si i cucu amah hngalhnak kha tlamtling tein nan ngeih khawh nakhnga caah a si.” (Kolose 3:​10) Cu bantuk duhnak hna cu doh peng a hau.

 Pathian phunglam ningin nun na duh ko nain ngeih-khat he umṭi duhnak lungthin na ngeih ah tah zeitin?

 Mi pakhat cu a lung duhnak ningin tuah lo awkah aa thim kho. Zeiti lam in dah? Baibal nih hitin a ti: “Thlarau nih nan nunning kha lamhruai sehlaw nan minung sinak duhning kha zul hlah u.”​—Galati 5:​16.

 Mi pakhat cu sual duhnak lungthin a ngei lai lo tiah a ti lo. Hmaan tein Baibal a rel i thla a cam ahcun a ṭha lomi a duhnak hna kha a tei khawh lai.

 A hmasa ah langhtermi David nih a nu le a pa sinah a intuarnak kong a phuan hnuah a lung duhnak kha a tei khawh. “Atu lawngah lungdaihnak ka hmu, tuan deuh tein rak chim hna ning law a ṭha tuk hnga” tiah a ti.

 Jehovah phunglam a zulmi hna cu an i nuam deuh. Pathian phunglam hna cu “a hmaanmi an si, cu phunglam a zulmi cu an lung aa lawm” timi bia kha Jehovah Tehte hna nih kan zumh.​—Salm 19:​8, 11.