“Aber a mirinyin no, nna ɔyɛ a metse nka dɛ menye me nyɛnko banyin nda. Nna ɔyɛ me dɛ dɛm atsenka no bɛtsew akɔ, naaso ɔkɔ do haw me.”​—David, oedzi mfe 23.

 David yɛ Christiannyi a ɔpɛ dɛ ɔyɛ dza Nyankopɔn pɛ. Aso obotum ayɛ dɛm aber a ɔtse nka dɛ ɔnye ne nyɛnko banyin nda no? Nyankopɔn tse nka dɛn wɔ ɔbarimba a ɔnye ɔbarimba da, anaa ɔbaa a ɔnye ɔbaa da ho?

•  Ebɛnadze na Bible no ka fa ho?

•  Aso iyi kyerɛ dɛ . . . ?

•  Naaso sɛ . . . ?

 Adwen a nkorɔfo wɔ ɔbarimba a ɔnye ɔbarimba da, anaa ɔbaa a ɔnye ɔbaa da ho no, ɔsor beebiara na mbrɛ wosi bu no. Mfe bi a wɔabɛsen kɔ no, nna mbrɛ wosi bu no no yɛ soronko fi ndɛ dze ho. Naaso Christianfo dze, nnyɛ dza nyimpa dodow gye to mu no na wɔgye to mu, na wɔnnyɛ nyimpa a ‘nkyerɛkyerɛ mframa biara yɛ hɔn begyabegya dze hɔn dzi akɔnaaba.’ (Ephesusfo 4:14) Mbom no, dza Bible no ka fa ɔbarimba na ɔbarimba nda, anaa ɔbaa na ɔbaa nda ho (nye abrabɔ ho biribi fofor biara) no, ɔno na wɔgye to mu na wɔdze bɔ hɔn bra.

 Dza Bible no ka fa ɔbarimba na ɔbarimba nda, anaa ɔbaa na ɔbaa nda ho no, no mu da hɔ na ɔtɔ aso mu. Nyankopɔn n’Asɛm no ka dɛ:

•  “Mma nnye banyin nnda dɛ mbrɛ enye ɔbaa da.”​—Leviticus 18:22.

•  “Dɛm ntsi Nyankopɔn yii hɔn maa efifidze wɔ hɔn akoma akɔndɔ mu, . . . yii hɔn maa enyimguase akɔndɔ nhyɛdo mu: na hɔn mbaa dze hɔn nyɛbea a ɔsɛ hɔn suban sesae gyee dza otsia hɔn suban.”​—Romefo 1:24, 26.

•  “Mma wɔnndaadaa hom: ndwaman, nye abosonsɔrfo, nye awartofo, nye mbaakowaa, nye mbarimba a wɔnye hɔnho da, nye ewifo, nye enyiberfo, nye asabokwafo, nye abɔndzekoofo, nye apempensifo rinnya Nyankopɔn ahenman no.”​—1 Corinthfo 6:9, 10.

 Asɛm no ara nye dɛ, Nyankopɔn ne mbra a ɔfa nda ho no, ɔkɔ ma obiara a mbarimba a wɔnye mbarimba da anaa mbaa a wɔnye mbaa da anaa mbarimba a wonya mbaa ho akɔndɔ so ka ho. Sɛ obi nya akɔndɔ bi dɛ ɔnyɛ adze bi a Nyankopɔn kyir a, ɔsɛ dɛ ɔhyɛ noho do.

 Aso iyi kyerɛ dɛ Bible no pɛ dɛ yɛtan mbarimba a wɔwar mbarimba nye mbaa a wɔwar mbaa anaa?

 Oho. Nokwasɛm nye dɛ, Bible no nnka dɛ yɛntan obiara. Mbarimba a wɔwar mbarimba o, mbaa a wɔwar mbaa o, anaa mbarimba a wɔwar mbaa o, Nyankopɔn mmpɛ dɛ yɛtan hɔn mu biara. Mbom no, n’Asɛm no ka kyerɛ hɛn dɛ, yɛnye nyimpa nyina ntsena asomdwee mu ɔmmfa ho mbrɛ nyimpa no n’abrabɔ tse biara. (Hebrewfo 12:14) Ntsi ɔnnyɛ papa dɛ yebesisi mbarimba a wɔnye mbarimba da anaa mbaa a wɔnye mbaa da. Na ɔmmfata so dɛ yebedzi hɔn bɔn biara anaa dɛ yɛbɛtseetsee hɔn.

 Aso iyi kyerɛ dɛ ɔsɛ dɛ Christianfo kasa tsia mbra a ɔma kwan ma ɔbarimba war ɔbarimba na ɔbaa war ɔbaa no anaa?

 Bible no ma yehu dɛ nhyehyɛɛ a Nyankopɔn yɛe maa awar nye dɛ, ɔsɛ dɛ awar yɛ nkabɔmu a ɔda ɔbarimba kor nye ɔbaa kor ntamu. (Matthew 19:4-6) Mbra a wɔhyɛ fa ɔbarimba na ɔbarimba anaa ɔbaa na ɔbaa awar ho no, wɔdze yɛ amanyɛsɛm. Naaso dɛ ɔyɛ papa anaadɛ bɔn no, nnyɛ hɔ na wɔhwɛ. Bible no tu Christianfo fo dɛ onnyi dɛ wogyina ɔfa biara wɔ amanyɛsɛm mu. (John 18:36) Dɛm ntsi, aban ne mbra a ɔfa ɔbarimba na ɔbarimba awar, anaa ɔbaa na ɔbaa awar ho no, yɛnnsoɛr nntsia, na dɛmara so na yɛnnhyɛ afofor nkuran dɛ wɔngye nto mu.

 Naaso sɛ sesei ɔbarimba bi nye ne nyɛnko barimba da, anaa ɔbaa bi nye ne nyɛnko ɔbaa da so ɛ? Aso dɛm nyimpa no botum asesa?

 Nyew. Nokwasɛm nye dɛ nyimpa binom a nna wɔwɔ Christianfo a wodzi kan no hɔn ber do no yɛɛ nsesa! Aber a Bible no kaa dɛ mbarimba a wɔnye mbarimba da no rinnya Nyankopɔn n’Ahenman no, ɔdze toaa do dɛ: “Na nkyɛ mbrɛ hom mu bi tse nye no.”​—1 Corinthfo 6:11.

 Aso iyi kyerɛ dɛ hɔn a wɔyɛɛ dɛm ndzɛyɛɛ bɔn yi mber bi a woetwa mu naaso woegyaa no, akɔndɔ bɔn yi remmba hɔn adwen mu bio anaa? Ɔnntse dɛm koraa. Bible no ka dɛ: ‘Hom nhyɛ nyimpa fofor a wɔayɛ no fofor aba nyimdzee mu no.’ (Colossaefo 3:10) Nsesa dze ɔmmba ewiei, ɔkɔ do aber nyina.

 Naaso sɛ obi pɛ dɛ ɔdze Nyankopɔn ne mbra bɔ ne bra, naaso ɔda ho ara nya akɔndɔ dɛ ɔnye ne nyɛnko ɔbarimba anaa ne nyɛnko ɔbaa bi nda so ɛ?

 Akɔndɔ biara a obi benya no, ɔpɛ a ɔronnsosɔw do na orinndzi ekyir nnkɛyɛ bɔn. Dɛmara so na ɔtse aber a obi enya akɔndɔ dɛ ɔnye ne nyɛnko ɔbarimba anaa ɔbaa nda no. Ebɛnadze ntsi a? Bible no ka dɛ: ‘Hom nnantsew sunsum mu, na ɔremma hom nndzi honam akɔndɔ ekyir.’​—Galatiafo 5:16.

 Hyɛ no nsew dɛ kyerɛwsɛm no annka dɛ nyimpa no rinnya honam akɔndɔ biara. Mbom no, sɛ nyimpa no yɛ nhyehyɛɛ pa sua Bible no na ɔbɔ mpaa a, obenya ahoɔdzen dze ako etsia dɛm honam akɔndɔ no.

 David a yeedzi kan aka noho asɛm no hun dɛ asɛm yi yɛ nokwar nkanka aber a ɔdze ne haw no too n’awofo enyim no. Ɔkaa dɛ: “Muhun dɛ woeyi adzesoa bi efi mo do. Sɛ mekaa ho asɛm ntsɛm a, nkyɛ m’enyi gyee me mbabun ber mu paa.”

 Dza yɛreka ekesi ara nye dɛ, sɛ yɛdze Jehovah ne mbra bɔ hɛn bra a, hɛn enyi bɛgye paa. Yɛgye dzi paa dɛ Jehovah “n’ahyɛdze tsen, ɔma akoma tɔ yamu,” na sɛ obi dzi do a onya “akatua kɛse.”​—Ndwom 19:8, 11.