“Otja tjee kuru, otjiṋa tjimwe tji tja ri otjizeu okutjinda ya ri okunanukirwa i yovarumendu ovakwetu. Ami ee ripura kutja oviṋa vyoruveze ndwo uriri nu mavi kapita, posi ya ouzeu mbwo ngamba u kayenda komurungu.”—David, 23.

 David Omukriste ngu vanga okutjata ku Mukuru. Hapo mape ya eye a tjiti nao ngunda e nanukirwa i yovarumendu ovakwao? Mukuru u noumune uṋe ohunga nomahakaeneno womonyama pokati kovarumendu vevari novakazendu vevari?

•  Hapo Ombeibela i tja vi?

•  Iho matji hee kutja . . . ?

•  Posi ya tjike indu . . . ?

 Oumune wovandu ohunga nomahakaeneno womonyama pokati kovarumendu vevari novakazendu vevari, wa panguka otja kozombazu pekepeke poo oruveze ovandu mu ve hupa. Posi ya Ovakriste kave kongorere oumune wovandu ovengi poo ‘okuhingwa i ombepo ngamwa aihe yomahongero omapukise.’ (Ovaefese 4:14) Nungwari oumune wawo ohunga nomeritjindiro ngwo (poo omeritjindiro warwe kaaṋi) wa zikamena komirari mbi ri mOmbeibela.

 Omirari vyOmbeibela ohunga nomahakaeneno womonyama pokati kovarumendu vevari poo ovakazendu vevari omikahu. Embo ra Mukuru ri tja:

•  “O rara pomurumendu omukweṋu tjimuna pomukazendu.”—Levitikus 18:22.

•  “Ndjambi opa za okuveesa kutja ve tjite oviyaukise, omitima vyawo mbi vi zera, . . . okuveyandja kozonḓuma zoviṋa vyohoṋi. Mokutjitasana oviṋa vyonyama ovakazendu vawo ve rundurura omuhingo mbu sokukara po momuhingo mbu he ri wo.”—Ovaroma 1:24, 26.

•  “Amu riwovisa oveni. Ovandu mbe vakirasana poo mbe rikotamena koomukuru vovisenginina poo mbe katuka otukupo poo mbe nanukirasana mokutjita ouhakohoke, poo mbe vaka poo ozongopo poo mba ṱomeva wamururu poo mbe yamburura ovakwao poo mbe punda oviṋa - ovandu avehe mba kamaave kara norupa mouhona waNdjambi.”—1 Ovakorinte 6:9, 10.

 Ouatjiri owombwi wokutja, omirari vya Mukuru vi ṱuna kovandu avehe, kutja ovarumendu vevari mbu mave nanukirasana poo ovakazendu vevari. Na wina omananukiro pokati komurumendu nomukazendu. Omundu auhe ma sokukara nomeritjaerero indu tji pe ya pokutjita otjiṋa Mukuru tja tonda.—Ovakolose 3:5.

 Iho matji hee kutja Ombeibela i tunduuza ovandu okuraisa onyengo kovarumendu poo ovakazendu mbe nanukirwa i yovakwao?

 Kako. Ombeibela kai tunduuza ovandu okuraisa onyengo komundu ngamwa auhe, kutja omurumendu ngu ma nanukirwa i yomurumendu omukwao poo omukazendu ngu ma nanukirwa i yomukazendu omukwao. Nu nandarire omurumendu ngu ma nanukirwa i yomukazendu. Nungwari, oyo i tu raera “okukara nohange novandu avehe,” kainatja kutja ve hupa vi. (Ovaheberi 12:14) Ku nao onavi okutatumisa poo okutjinda navi omurumendu ngu nanukirwa i yomurumendu omukwao poo omukazendu ngu nanukirwa i yomukazendu omukwao.

 Iho matji hee kutja Ovakriste ve sokupirukira ozoveta nḓu maze yandjere ovarumendu vevari poo ovakazendu vevari okukupasana?

 Ombeibela i raisa kutja Mukuru wa zikamisa orukupo ru rire oupanga pokati komurumendu umwe nomukazendu umwe. (Mateus 19:4-6) Posi yokutja ohoromende i twa po ozoveta ohunga norukupo nḓa zikamena komeripura wovandu, nu ka kEmbo ra Mukuru. Ombeibela i raera Ovakriste okuhinokukara nomunda moviṋa vyopolotika. (Johanes 18:36) Ku nao, owo kave yandja oruvara nu kave pirukire ozoveta zohoromende nḓe kamburira mo orukupo pokati komurumendu nomurumendu poo omukazendu nomukazendu poo omahakaeneno womonyama pokati kawo.

 Posi ya tjike indu omundu tje kara nomahakaeneno womonyama pu nomurumendu poo omukazendu omukwao? Omundu ngo ma yenene okuisa okutjita nao?

 Ii. Ovakriste tjiva veserewondo etenga va yenena okutjita omarundurukiro ngo. Kombunda yaindu Ombeibela tji ya za nokutja imba mbe nanukirasana mokutjita ouhakohoke kamaave kara norupa mOuhona wa Ndjambi, oyo ya tja: “Tjiva veṋu wina va ri ohamukwa novandu mba.”—1 Ovakorinte 6:11.

 Hapo ihi matji hee kutja imba mba isa okuhakaena ku novarumendu poo ovakazendu ovakwao monyama kave nanukirwa i yovakwao rukwao? Kako. Ombeibela i tja: “Rihuikikeje omundu omupe, ngu ma jarurua koupe okumuna ondjiviro.” (Ovakolose 3:10, EEP) Eṱe matu sokukayenda komurungu okutjita omarundurukiro mongaro yetu yomeritjindiro.

 Posi ya tjike indu tji pe nomundu ngu vanga okukongorera omirari vya Mukuru posi ya ngamba u nanukirwa i yovarumendu poo ovakazendu ovakwao?

 Tjimuna omundu ngamwa auhe ngu kondja nozonḓuma ozombi, omundu ngu nozonḓuma zokunanukirwa i yovakwao, eye ma yenene okutoorora okuhinokuripurira ku zo poo okuzekovisa. Omomuano uṋe? Ombeibela i tja: “Ryangeye mOmbepo yaNdjambi, notji mu hi nakukovisa ozonḓuma zongaro youndu.”—Ovagalate 5:16.

 Ezeva ka ritjere omundu kamaa kara nozonḓuma zoundu oparukaze. Posi ya, indu tji ma konḓonona Ombeibela nokukumba, eye ma yenene okukara nomasa okunakaura ozonḓuma nḓo.

 David, ngwa tamunwa rukuru wa muna kutja imbwo ouatjiri, indu tja za nokuhungira ku novanene ve Ovakriste ohunga nouzeu mbwa kondjo nawo. Eye wa tja: “I ri tjimuna omutwaro omuzeu mbwa isakewa kotjiṱuve tjandje, nu andakuzu mba hungira rukuru etje yorokera oumutanda wandje nawa.”

 Korusenina, eṱe matu kara nondjoroka indu tji matu kongorere omatwako wa Jehova. Eṱe tu nongamburiro kutja ‘owo omasemba, ye nyandisa omutima’ nu ‘mokuyeṱakamisa omu mu nondjambi onene.’—Epsalme 19:8, 11.