“E diambu diampasi yanuana diau tuka muna kileke, i zola wan’a makala. Yayindulanga vo kuna kulanda e ngindu zazi se zavioka kwandi, kansi yamu wau zakinu.”—David, 23.

 Wau vo Davidi Nkristu, ozolele yangidika Nzambi. Nga olenda yangidika Nzambi kanele vo wan’a makala kezolanga? Aweyi Nzambi kemwenanga e fu kia vukana yakala yo yakala yovo nkento yo nkento?

•  Adieyi Bibila kivovanga?

•  Nga ediadi disongele vo . . . ?

•  Kansi, avo . . . ?

 E ngindu za wantu mu kuma kia fu kiaki zaswaswana mun’owu wa kisi nsi kiau yovo kolo kina bezingilanga. Kansi, Akristu ke bevukumunuanga muna ngindu za ndonga ko yovo “tungianiswa kwa tembwa yawonso ya malongi ma luvunu.” (Efeso 4:14) Kansi, e ngindu zau mu kuma kia fu kia vukana yakala yo yakala yovo nkento yo nkento (ye muna mambu mawonso ma zingu kiau) ngwizani zina ye malongi ma Bibila.

 Dina Bibila kivovanga mu kuma kia fu kiaki diatoma kia. Bibila kivovanga vo:

•  “Kufwete vukana yo yakala ko wauna ovukanenanga yo nkento. Ediadi vangu diangemi.”—Levitiku 18:22.

•  ‘Nzambi ubayekwele muna usafu, mun’owu wa zolela ya ntima miau, . . . ubayambwidi muna zinu diau diasaka dia vukana, kadi akento au basobanese e mvukana zansongi muna zina za usafu.’—Roma 1:24, 26.

•  “Ke nuvunginikwa ko. Awana bekukivananga muna mavangu ma zumba, asambidi a teke, minta-zumba, akala beyambulanga vo balekwa nze akento, akala belekananga ye akwau akala, mivi, akwa loko, nduvu za malavu, akwa luvezo ye mindia-nzimbu zangani ke bevua Kintinu kia Nzambi ko.”—1 Korinto 6:9, 10.

 Dina Nzambi keyindulanga mu kuma kia fu kiaki, ditadidi wantu awonso, diakala ana bena ye fu kia vukana akala ye akala, akento ye akento yovo ve. Yeto awonso tufwete kala ye volo vava tumonanga e nsatu za vanga diambu dina Nzambi kemenganga.—Kolosai 3:5.

 Nga Bibila kivovanga vo tufwete menga awana bena ye fu kiaki?

 Ve. Bibila kivovanga vo ke tufwete menga muntu ko, diakala awana bena ye fu kiaki yovo ve. Kansi, kivovanga vo tufwete tatidilanga luvuvamu yo wantu awonso diakala nkia mpila zingu benatanga. (Ayibere 12:14) Muna kuma kiaki, diambi mu sakenena, bangika yovo vanga mambu mankaka mambi kwa awana bena ye fu kiaki.

 Nga diadi disongele vo Akristu bafwete telamena e nsiku mivananga nswa kwa wantu awaya bakazala?

 Bibila kisonganga vo Nzambi wasikisa vo longo lufwete kala kaka yakala yo nkento. (Matai 19:4-6) Kansi, e nsiku ayadi besikidisanga mu kuma kia lukazalu lwa yakala yo yakala yovo nkento yo nkento, i diambu ditadidi mambu ma luyalu. Bibila kivovanga vo Akristu bafwete kuyivambula, ke bafwete yikama mambu ma luyalu ko. (Yoane 18:36) Muna kuma kiaki, Akristu ke beyikamanga ko ngatu kolamena nsiku wau yovo konso vangu dia awana bevukananga yakala yo yakala yovo nkento yo nkento.

 Kansi, adieyi tuvova mu kuma kia awana bakala kala ye fu kiaki, nga balenda soba?

 Elo. Kana nkutu awana bakala ye fu kiaki kuna nza nkulu balenda soba. Vava Bibila kivovanga vo akala beyambulanga vo balekwa nze akento, akala belekananga ye akwau akala ke bevua Kintinu kia Nzambi ko, kikudikilanga mpe vo: “Akaka muna yeno i wau nuakala.”—1 Korinto 6:11.

 Nga ediadi disongele vo awana bayambula vukana ye akwau akala yovo akwau akento, ke bemonanga diaka nsatu zazi ko? Ve. Bibila kivovanga vo: “Nuvuata kiwuntu kiampa, kina kivangululwanga muna zayi wasikila.” (Kolosai 3:10) E nsobani zazi malembe-malembe zivangamenanga.

 Adieyi tuvova avo muntu ozolele vanga luzolo lwa Nzambi, kansi wakinu mona e nsatu zazi?

 Nze una divangamanga muna konso nsatu, o muntu olenda baka nzengo za lungisa e nsatu zandi yovo ve. Mu nkia mpila? Bibila kivovanga vo: “Nukwamanana kangalela muna mwanda, ozevo ke nulunganisa nkutu e zolela ya nitu ko.”—Ngalatia 5:16.

 E sono ke kivovele ko vo muntu ke kala diaka ye zolela ya nitu ko, nze fu kia vukana yakala yo yakala yovo nkento yo nkento. Kansi e sono kisongele vo avo muntu olongokanga Bibila yo samba kwa Nzambi, okala ye ngolo zafwana mu zizidila zolela yayi.

 David ona tuvovele kala, wamona e ziku kia diambu diadi, musungula vava kamokena yo mase mandi bena vo Akristu. Kuna mfoko a moko yo mase mandi wavova vo: “Diakala nze mono yakatula zitu diampwena vana mavembo mame. Yadi kala ye kiese muna kileke kiame kele vo yamokenena diambu diadi ye mase mame tuka ntangwa yayina.”

 E ludi i kiaki, tukala kaka ye kiese muna zingu avo tuzingidi ngwizani ye luzolo lwa Yave. Tuna ye ziku vo ‘malongi ma Yave mansongi, memwesanga ntima e kiese. . . . Olunda mo, nsendo ayingi ditwasanga.’—Nkunga 19:8, 11.