“Ka ṭhan len chhoh zêl ruala ka do ngai thil harsa ber chu ka mipatpuite îtna ka nei hi a ni a. Chu chu reh leh mai tûrah ka ngai a, mahse min la tibuai reng a ni.”—David-a, 23.

 David-a hi Pathian tilâwm duhtu Kristian a ni a. A mipatpui îtna nei reng chungin chu chu a ti thei ang em? Engtin nge Pathianin neih inang inkawpna hi a ngaih?

•  Bible-in eng nge a sawi?

•  Chu chu . . . tihna a ni em?

•  Mahse, . . . engtin nge ni ang?

 Neih inang inkawp chungchânga ngaih dân chu hnam dân, a nih loh leh a hun azirin a danglam thei a. Mahse, Kristiante chu mite ngaih dân lâr tak emaw, “zirtîrna thli tirênga lehlam lehlama vawrh leh len len” emawin an awm lo. (Ephesi 4:14) Chu aiin, neih inang inkawp (leh nungchang dangte) chungchânga an thlîr dân chu Bible tehnaah a innghat zâwk a ni.

 Neih inang inkawp chungchânga Bible tehna chu a chiang hle. Pathian Thu chuan:

•  “Hmeichhia angin mipa i pâwl tûr a ni lo,” tiin a sawi.—Leviticus 18:22.

•  “An thinlung châkzâwng anga . . . tih phalin . . . Pathianin zahthlâk taka hur phalin a hawisan a; an hmeichhiate meuh pawhin an awm dân pianpui chu dân lo anga awm tûrin an intidanglam si a.”—Rom 1:24, 26.

•  “Bumin awm suh u; inngaih hmangte emaw, milem betute emaw, uirête emaw, mi hurte emaw, mawngkawhurte emaw, rûk hmangte emaw, mi duhâmte emaw, zu ruih hmangte emaw, mi hau hmangte emaw, hlêprute emawin Pathian ram an luah lo vang.”—1 Korinth 6:9, 10.

 A nihna takah chuan, Pathian tehnate chu neih inang kawp châkna neite an ni emaw, mahni anpui lo kawp châkna nei an ni emaw pawh ni se, mi zawng zawng tân a ni vek a ni. Mi tinte chuan Pathian tilâwm lotu thiltih châkna an neih hunah insûmtheihna an nei tûr a ni.—Kolossa 3:5.

 Chu chu Bible-in neih inang inkawpte huatna a chawilâr tihna a ni em?

 Ni lo. Bible-in neih inang inkawpte emaw, mahni anpui lo kawpte emaw atu amah huatna a chawi lâr lo. Chu aiin, an nun dân chu eng pawh ni se, “mi zawng zawng nêna inremna . . . ûm” tûrin min hrilh zâwk a. (Hebrai 12:14) Chuvângin, insawisakna te, inhuatna avânga dân bawhchhiatna te, a nih loh leh dik lo taka neih inang inkawpte cheibâwl chu thil dik a ni lo.

 Chu chu neih inangte inneih phalna dân Kristiante’n an dodâl tûr a ni tihna a ni em?

 Bible chuan inneihna atâna Pathian tehna chu mipa pakhat leh hmeichhe pakhat phuar khâwm a ni tih a târ lang a. (Matthaia 19:4-6) Mahse, neih inang inneihna chungchânga mihringte dân zam chu politics lam thil a ni a, nungchang lam nên a inkûngkaih lo. Bible-in Kristiante chu politics-a tualdâwih reng tûrin a hrilh a. (Johana 18:36) Chuvângin, neih inang inneih, a nih loh leh inkawpna nêna inkûngkaiha sawrkâr dânte chu an pawmpui lo va, an dodâl hek lo.

 Mahse, tuemaw chuan a anpui la kawp reng ta se, engtin nge ni ang? Ani chu a inthlâk danglam thei em?

 Thei e. Kum zabi khatnaa mi ṭhenkhat pawhin chutiang chuan an ti! Bible chuan neih inang inkawp chîngte’n Pathian Ram an luah lo vang tia a sawi hnuah: “Nangni ṭhenkhat chutiang mi in nih ṭhin kha,” tiin a sawi a ni.—1 Korinth 6:11.

 Chu chu neih inang inkawp bânsantute’n an tûn hma nuna kîr leh châkna an nei tawh lo hulhual tihna a ni em? Ni lo. Bible chuan: “Mihring thar chuan in inthuam tawh si a, chu mihring thar chu . . . siam tharin a awm mêk a ni,” tiin a sawi. (Kolossa 3:10) Inthlâk danglamna chu thil tih zawm reng ngai a ni.

 Mahse, Pathian tehna zâwm duh tuemaw chuan neih inang inkawp châkna la nei reng ta se, engtin nge ni ang?

 Mi chuan a rilrua awm châkna anga thilti lo tûrin duh a thlang thei a. Engtin nge? Bible chuan: “Thlarauvah awm rawh u, tichuan tisa châkna chu in zâwm dâwn lo nia,” tiin a sawi a ni.—Galatia 5:16.

 Bible châng khân, miin tisa châkna a nei dâwn lo tiin a sawi lo va. Chu aiin, Bible chhiar leh ṭawngṭaina thlarau lam hun duan ṭha tak a nei a nih chuan, chûng châknate chu do tûrin chakna a nei ang.

 A tîra kan sawi tâk David-a chuan a nu leh pate hnêna a hrilh hnuah a châknate chu a do hneh thei a. Ani chuan, “Ka dâr aṭanga phurrit tak hlân thlâk ang mai a ni, a hma aṭang khân lo hrilh daih tawh ila a ṭha tûr,” tiin a sawi a ni.

 Jehova tehnate kan zawm hian kan hlim lehzual a. Chûngte chu “a dik a, thinlung a tilâwm ṭhîn,” tih leh “chûng zawm chu lâwmman nasa tak neihna a ni ṭhîn,” tih kan ring tlat a ni.—Sâm 19:8, 11.