“M sẽn wa n bɩtẽ wã, zu-loɛɛg a ye m sẽn da segd n mao ne n tɩ yɩɩd yaa m yamã sẽn da kẽed rap a taabã. M da tagsdame tɩ yaa bũmb sẽn na n wa looge, la ket n yaa woto hal tɩ namsd maam.”—A David, 23.

 A David yaa kiris-ned sẽn dat n ta Wẽnnaam yam. La rẽ yĩnga, a tõe n taa Wẽnnaam yam, baa a yamã sẽn kẽed rapã a taaba bɩ? Wẽnnaam tagsg yaa wãn ne rap ne rap la pagb ne pagb sẽn gãe taabã?

•  Bõe la Biiblã yeta?

•  Rat n yeelame tɩ . . . ?

•  La . . . ?

 Nebã tagsg sẽn yaa to-to rap ne rap la pagb ne pagb sẽn gãe taabã wɛɛngẽ wã yaa toor-toore la toeemdẽ me. Bee ne buudã la wakatã. La kiris-nebã pa tũud neb wʋsgã tagsa wã, bɩ n basdẽ tɩ ‘zãmsg buud fãa tar-b n kẽngd ka la ka ye.’ (Efɛɛz rãmbã 4:14) La b tagsg sẽn yaa a soab rap ne rap la pagb ne pagb sẽn gãe taabã (la manesem a taabã) tika Biiblã noyã la a saglsã zugu.

 Biiblã sẽn yet bũmb ning rap ne rap la pagb ne pagb sẽn gãe taabã wɛɛngẽ wã yaa vẽenega. Wẽnnaam Gomdã yetame yaa:

•  “Fo pa segd n kẽ ne rao wa f sẽn kẽed ne pag to-to wã ye.”—Maan-kʋʋre 18:22.

•  “Rẽ n so tɩ b sẽn dat n tũ b sũyã ratmã yĩnga, Wẽnnaam bas-b lame, . . . tɩ yoobã tʋlsem sẽn loog nug soog-bã. Bala b pagbã teka pag ne rao lageng ning sẽn zemsã ne sẽn pa zems baa-baa.”—Rom dãmbã 1:24, 26.

•  “Da belg-y y mens ye. Sẽn tʋmd-b raglem tʋʋma, bõn-naands pʋʋsdba, yoaadba, rap sẽn sakd tɩ rap gãe-ba, rap sẽn gãe rapa, wagda, yão-be-neba, rã-yũud-kãase, nin-tʋʋdba, la fãadb pa na n paam Wẽnnaam Rĩungã ye.”—1 Korẽnt rãmbã 6:9, 10.

 Yaa vẽeneg tɩ Wẽnnaam noyã la a saglsã yaa nebã fãa yĩnga, tɩ b tara rap sẽn gãe taab tʋlsem bɩ pagb sẽn gãe taab tʋlsem, pa rẽ bɩ yaa rao ne pag lagem tʋlsmã. Togs sɩda, ned buud fãa segd n yõka a menga, a sã n wa rat n maan bũmb sẽn pa tat Wẽnnaam yam.—Kolos rãmbã 3:5.

 Rat n yeelame tɩ Biiblã sagenda tõnd tɩ d kisg rap sẽn gãe taaba, la pagb sẽn gãe taabã bɩ?

 Ayo. Sɩd me, Biiblã pa sagend tõnd tɩ d kisg ned ye. A yaa rao sẽn gãe rao bɩ pag sẽn gãe pag t’a pa woto me. Biiblã pʋd n yeta tõnd tɩ d “bao laafɩ ne nebã fãa,” baa b manesmã sẽn yaa to-to. (Ebre-rãmbã 12:14) Dẽnd d sã n bugsd rap sẽn gãe taaba, bɩ pagb sẽn gãe taabã, n maand-b bũmb toor-toor sẽn wilgd tɩ d kis-b lame wall n namsd-ba, yaa wẽnga.

 Rat n yeelame tɩ kiris-nebã segd n kɩɩsa laloa nins sẽn kõt rap ne rap bɩ pagb ne pagb sor tɩ b tõe n kẽ kãadmã bɩ?

 Biiblã wilgdame tɩ Wẽnnaam nifẽ, yaa rao ne pag bal n segd n kẽ kãadem. (Matiye 19:4-6) La ninsaalbã laloa nins b sẽn yiis rap ne rap bɩ pagb ne pagb kãadmã wɛɛngẽ wã yaa politik yɛla, pa ninsaalbã vɩɩm na yɩ neer yĩng ye. Biiblã yeta kiris-nebã tɩ b ra kẽes b toog politikã yɛlẽ ye. (Zã 18:36) Rẽ n so tɩ d pa teend bɩ n kɩɩsd goosneem-dãmbã laloa nins b sẽn yiis rap ne rap bɩ pagb ne pagb kãadmã wɛɛngẽ wã ye.

 La rao sẽn gãe rapa, bɩ pag sẽn gãe pagb tõe n toeemame bɩ?

 N-ye. Sɩd me, pipi kiris-nebã wakatẽ, neb kẽer n tõog n toeeme! Biiblã sẽn yeel tɩ rap sẽn gãe rapã la pagb sẽn gãe pagbã pa na n paam Wẽnnaam Rĩungã poore, a paasame yaa: “Yãmb neb kẽer yaool n da yaa woto.”—1 Korẽnt rãmbã 6:11.

 Rat n yeelame tɩ neb nins sẽn da tʋmd tʋʋm-kãensa wã pa le tar tagsg a woto buud bɩ? Ayo. Biiblã yetame yaa: ‘Yeelg-y nin-paalgã b sẽn tũnugd ne bãngr hakɩɩkã n kɩtdẽ t’a lebgd paalga.’ (Kolos rãmbã 3:10) Yaa bilf-bilfu tɩ ned wa toeemẽ.

 La ned sẽn dat n tũ Wẽnnaam noyã sã n ket n tar rap sẽn gãe taab bɩ pagb sẽn gãe taab tʋlsem?

 Wa sẽn yaa to-to ne tʋlsem buud fãa wã, yaa a soabã n yãkd a sã n na n talla tʋlsem a woto, bɩ a sã n na n pids-a lame. Wãn to? Biiblã yetame yaa: ‘Kẽn-y wa vʋʋsem sõngã sẽn wilgd yãmb sor to-to wã, tɩ rẽ la y pa na n sak yĩngã ratem baa bilfu.’—Galat-rãmbã 5:16.

 Tẽeg-y tɩ vɛrse wã pa yeel t’a soabã pa na n le tall yĩngã ratem tʋlsem baa bilf ye. La a soabã sã n wɩngd ne Biiblã zãmsg la pʋʋsgo, a na n paama pãng n tõog n zãag a meng ne tʋlsem a woto buudã.

 A David ning yell d sẽn gom sɩngrẽ wã yãame tɩ rẽ yaa sɩda. Sẽn yɩɩd fãa, a sẽn vẽneg a zu-loɛɛgã n togs a roagdbã sẽn yaa kiris-nebã poore. A yeelame yaa: “Yɩɩ zɩɩb kãseng meng la m sẽn sik m bãgdẽ wã. M sã n da togsẽ-la pĩnda, yaa vẽeneg tɩ m da na n paama sũ-noog m bi-bɩɩlmã wakate.”

 D sã n tũud Wẽnnaam noyã la a saglsã, d paamda sũ-noog wakat fãa. Tõnd kɩsa sɩd tɩ no-kãens yaa “yaa tɩrse, n kõt sũ-noogo.” Sẽn paase, “ned sã n sak-ba, a paamda keoor wʋsgo.”—Yɩɩn-sõamyã 19:8, 11.