VAKULIKONSHA ACHILUMBWANA
Kansi kuyonana kwa analume olo anakazi ŵeka-ŵeka n’kophoniyeka?
David—wamene ali na vyaka 23, enena kuti: “Penenzekula, nenzelimbana na vuto yokopeka na analume ayangu. Nenzewona kuti payakine vizachinje nikazakula koma nulimbana na vuto yamene iyi mpaka pano.”
David ni nkhilisitu wamene ofuna kuchita vinthu vukondwelesha Mulungu. Koma kansi angakwanishe kukondwelesha Mulungu uku ali na chilako-lako chofuna analume ayake? Kansi Mulungu akumvwa tyani akawona ŵanthu amene oyonana na analume olo anakazi ayawo?
Kansi Baibolo yunena votyani?
Maganizo a ŵanthu osiyana-siyana pa nkhani ya kuyonana kwa analume olo anakazi ŵeka-ŵeka, mokatijana na chinkhalidwe komasoti n’vyalo vakufumila. Komasoti mwakuwonela nkhani yamene iyi achikulile na alumbwana, vusiyana ngako soti. Akhilisitu okonkheja lini vinthu viyakine, chifukwa ŵanthu anyinji ali monga ni mphepo yamene ‘yutengeka kuluta uku na uku na mphepo iliyonse ya chiphunziso.’ (Aefeso 4:14) Koma owona nkhani iliyonse olo nkhani ya kuyonana kwa analume olo anakazi ŵek-ŵeka, mokatijana na mfundo za Baibolo.
Baibolo yufotokoza momvwika luweme za nkhalidwe yamene iyi. Yunena kuti:
“Osayona na mwanalume mwawuyonela na mwanakazi.”—Levitiko 18:22.
“Molingana na vilako-lako va mintima yawo, . . . Mulungu eŵasiya kuti akonkheje vilako-lako vochitishansoni vakuyonana, pa kuti anakazi pakati pawo esiya njila yachibadwa ya miŵili yawo nochita visakatijana na chibadwa.”—Aroma 1:24, 26.
“Osaluŵilishiwa. Adama, olambila mafano, achigolo, analume oyonewa na analume ayawo, analume oyona analume ayawo, akawalala, achigololo, achakolwa, otolola, olonda ayawo, onse amene aŵa azalowelini mu Ufumu wa Mulungu.”—1 Akorinto 6:9, 10.
Mfundo zechipeleka Mulungu zamene izi, n’zofunika kuli munthu aliyense. Keno munthu muyakine oyonana na mwanalume olo na mwanakazi muyake, payakine oyonana na munthu wamene ni mwanalume wake lini olo na mwanakazi muyake, ofunika kukonkheja mfundo zamene izi. Mfundo ni yakuti, aliyense ofunika kunkhala wolilesha kuti osati akokopeka na chilakola-lako chofuna kuchita vinthu vakuzondana navo Mulungu.—Akolose 3:5.
Kansi vamene ivi vutanthuza kuti . . . ?
Kansi vamene ivi vutanthauza kuti Baibolo yulimbikisa kuzondana na ŵanthu amene oyonana na analume olo na anakazi ayawo?
Yayi. Baibolo yulimbikisa lini kuzondana na aliyense—olo munthu wamene uyo oyonana na analume olo anakazi ayake olo yayi. Koma yulimbikisa “kunkhala pa ntendele na ŵanthu onse,” keno ŵanthu amene awo ankhale na nkhalidwe yotyani. (Aheberi 12:14) Tetyo vingankhale lini bwino kuniyatana, kutukila olo kuchitila nkhanza ŵanthu oyonana na analume olo anakazi ayawo.
Kansi vamene ivi vutanthauza kuti Akhilisitu akoshusha malamulo ovomekeja ukwati wa analume olo anakazi ŵeka-ŵeka?
Baibolo yuwonesha kuti Mulungu ekonza kuti ukwati ukonkhala wa mwanalume mmozi na mwanakazi mmozi. (Mateyu 19:4-6) Koma kukambilana za malamulo aboma pa nkhani yolaŵila za ukwati wa analume olo anakazi ŵeka-ŵeka, kukatijana na nkhani za ndale osati kulimbikisa minkhalidwe iweme. Baibolo yulimbikisa Akhilisitu kusaloŵelela nawo mu nkhani za ndale. (Yohane 18:36) Tetyo Akhilisitu amene aŵa, olimbikisa lini olo kushusha malamulo aboma olaŵila za ukwati olo kuyonana kwa analume, olo anakazi ŵeka-ŵeka.
Koma tyani keno . . . ?
Koma tyani keno munthu muyakine oyonana na mwanalume olo na mwanakazi muyake, kansi munthu wamene uyu angachinje?
Eye. Ŵanthu ayakine m’nthawe ya atumwi enzechita soti vamene ivo! Baibolo yufotokoza kuti analume [olo anakazi] oyonana na analume [olo anakazi] ayawo azaloŵe lini mu Ufumu wa Mulungu, yunena soti kuti: “Ayakine amwewo mwenze tetyo.”—1 Akorinto 6:11.
Kansi vamene ivi vutanthauza kuti ŵanthu eleka minkhalidwe yamene iyi olaka-laka lini soti kuyonana na analume olo na anakazi ayawo? Yayi. Baibolo yunena kuti: “Soti muvwale umunthu wanyowani wamene wakutwala Mulungu, kutanthauza kuti mwakuziŵa vinthu mokonkheja, muchitishe umunthu wanu kunkhala unyowani.” (Akolose 3:10) Kuchinja kusila lini ndipo kutola nthawe.
Koma tyani keno munthu ofuna kukonkheja vakufuna Mulungu, uku olimbana mphela na chilako-lako chofuna kuyonana na mwanalume olo mwanakazi muyake?
Monga ni mwavunkhalila na chilako-lako chilichonse, munthu osankha kukhutilisha chilako-lako chamene icho olo kuchisulako. Kansi angachite tyani vamene ivi? Baibolo yunena kuti: “Pitilijani kuyenda mwanzimu, ndipo mungakonkhe lini chilako-lako cha muŵili olo patontho.”—Agalatiya 5:16.
Keno mwawoneshesha, lemba yamene iyi yunena lini kuti munthu wamene uyo angankhale lini soti na chilako-lako cha muŵili. Koma yuwonesha kuti angakwanishe kulimbana na chilako-lako chamene ichi. Komasoti angakwanishe kuchita vamene ivi keno angankhale na pulogilamu yophunzila Baibolo komasoti kupemphela.
David watatomola kumayambilila kwa nkhani yamene iyi—evomekeja soti vamene ivi. David efotokoza kuti ekwanisha kulimbana na vuto yamene iyi pechisenga makolo ŵake amene ni Akhilisitu, kuti amuyavye. Yove enena kuti “Nukumvwa monga netula chintolo cholema. Ndipo nuwona kuti vinthu sembe viniyendela luweme kuti nenze niuja makolo ŵangu za vuto yamene iyi mokulumija.”
Vinthu vutiyendela luweme tikoyeja-yeja kukonkheja malamulo a Yehova. Tuwona kuti malamulo ŵake ni “olungama okondwelesha ntima” komasoti ‘munthu oŵasunga ofwana pindu ikulu.”—Salimo 19:8, 11.
