23 watanpi kashaq David waynan nirqan: “Wiñashasqayman jinan reparakurqani juj waynakunawan kayta munasqayta. Tiempoq pasasqanman jinaqa qonqapusaqchá niqmi kani, ichaqa kunankaman chayta munashallani”, nispa.

 Davidqa Diosta serviq waynan, chaymi Diostaqa kasukuytapuni munan. ¿Atinmanchu David Diospa kamachikuyninkunata junt’ayta? ¿Ima ninmi Dios qharipura otaq warmipura warmi-qhari jina puñuymanta?

•  ¿Ima ninmi Biblia?

•  Chhaynaqa, ¿Biblia yachachishanchu...?

•  ¿Sichus pipas...?

 Qharipura otaq warmipura warmi-qhari jina puñuymanta runakunaq piensasqankuqa tiempoq pasasqanman jina costumbrenkuman jinan cambiashallan. Ichaqa Diosta serviqkunaqa manan runakunaq piensasqankutachu qatikunchis. Manan Efesios 4:14 textopi nisqan jina “lamarqochapi wayraq apakachasqan bote jinachu kanchis”. Qharipura otaq warmipura puñuymanta, juj ruwaykunamantapas piensasqanchisqa Bibliaq yachachisqanman jinan.

 Qharipura otaq warmipura puñuyta imaynatas Dios qhawarin chaymantaqa Biblian sut’ita willashan. Chaymanta yachasunchis.

•  “Aman qharipura t’inkikunkichu, chayqa sinchi millay huchan” (Levítico 18:22, Diospa Simin Qelqa).

•  “Sonqonkuq munasqanman jina [...] Diosqa paykunata saqerpariran cuerponkuq sinchi munapayasqan qhelli ruwaykunaman. Chhaynapin warmikunapas mana ruwanata ruwaspanku manaña qhariwan puñuyta munarankuchu, aswanmi warmipurallaña puñuranku” (Romanos 1:24, 26).

•  “Ama engañakuychischu: Qhelli juchapi puriqkunapas, ídolo adoraqkunapas, jujwan pantaqkunapas, warmiman tukuqkunapas, qharipura puñuqkunapas, suwakunapas, sinchita munapayaqkunapas, machaqkunapas, millayta k’amiqkunapas, engañowan suwaqkunapas manan Diospa gobiernonmanqa jaykunqakuchu” (1 Corintios 6:9, 10).

 Diospa kamachikuyninkunaqa llapanchispaqmi. Imaynataña qharipura otaq warmipura warmi-qhari jina puñuyta qhawarinchis chaypas llapanchismi cuerponchista controlakunanchis, chhaynapi Diospa kamachikuyninkuna contra ama imatapas ruwananchispaq (Colosenses 3:5).

 Chhaynaqa, ¿Biblia yachachishanchu qharipura otaq warmipura warmi-qhari jina puñuqkunata cheqnikunanchispaq?

 Manan. Bibliaqa yachachiwanchismi ama pitapas cheqnikunanchispaq. Aswanpas kallpachawanchismi “lliu runawan thajpi kananchispaq”, imayna kausayniyoqña kankuman chaypas (Hebreos 12:14). Chhaynaqa qharipura otaq warmipura warmi-qhari jina puñuqkunamanta burlakuypas, mana allinkunata paykunata ruwaypas manapunin allinchu.

 Chhaynaqa, ¿Qharipura otaq warmipura casarakunankupaq churakamusqan leykuna contrachu cristianokuna kananchis?

 Bibliaq yachachisqanman jina, Diosqa munan qhariwan warmiwan casarakunallankutan (Mateo 19:4-6). Diosta serviqkunaqa manan qharipura otaq warmipura casarakunankupaq leykuna contrachu kashanchis, nitaqmi allinpaqchu qhawarinchis chay leykunataqa. Politicawan chajrusqan kashan qharipura otaq warmipura casarakuyta atinankupaqpas mana atinankupaqpas autoridadkunaq churamusqanku leykunaqa. Biblian kamachiwanchis Diosta serviqkunaqa ama politicapi chajrukunanchispaq (Juan 18:36).

 ¿Sichus pipas qharipura otaq warmipura puñuypi kashan chayri? ¿Saqeyta atinmanchu chay ruwayta?

 Arí, atinmanmi saqeyta. Biblian willashan ñaupa tiempopi wakin runakunapas qharipura otaq warmipura warmi-qhari jina puñusqankuta, ichaqa saqepurqankun chay ruwasqankuta. Apóstol Pabloqa Corintios qelqapin sut’ita willarqan qharipura otaq warmipura warmi-qhari jina puñuqkunaqa Diospa gobiernonman mana jaykunankuta, chaymantan nillarqantaq: “Chhaynan wakinniykichisqa karankichis”, nispa (1 Corintios 6:11).

 Chhaynaqa ¿Qharipura otaq warmipura puñuyta saqepuqkuna manañachu jayk’aqpas chay ruwayta munarqanku? Munashallarqankun. Diospa siminmi nin: “Mosoq runa kaywan p’achawan jina churakuychis, arí, allin yachaywan imayna runa kasqaykichista mosoqman tukuchiychis”, nispa (Colosenses 3:10). Arí, imayna runa kasqanchista cambiananchispaqqa sapa kutin kallpachakushanallanchis.

 ¿Sichus pipas Diospa kamachikuyninkunata kasukuyta munashaspa qharipura otaq warmipura puñuyta munashallanman chayri?

 Imataña sonqonchis munanman chaypas sapankanchismantan kanqa chayman jinachus ruwasun icha manachus chayqa. ¿Imaynatan sonqonchispa munasqanta controlasunman? Biblian nin: “Diospa espiritunman jinallapuni purishaychis, chhaynapin mana aychaq ima munaynintapas ruwankichischu”, nispa (Gálatas 5:16).

 Kay versiculopiqa manan pipas manaña chay mana allinkunata munapayananmantachu rimashan. Aswanpas chay mana allin munapayaykunata controlananchispaqqa sapa p’unchaymi Bibliata estudiananchis, Diosmantapas sapa kutin mañakunanchis.

 Qallariypi yachamusqanchis David waynapas kallpachakurqanmi qharipura warmi-qhari jina puñuy munasqanta controlakunanpaq astawanqa tayta-mamanman willakusqan qhepaman. Paymi nin: “Sinchi llasa q’epitapas saqepuyman jinan sientekurqani, ñaupaqmantaña tayta-mamayman willakuyman karqan chayqa aswan kusisqachá adolescente kashaspa kausayman karqan”, nispa.

 Jehová Diospa kamachikuyninkunata kasukuspaqa kusisqan kasunchis. Kamachikuyninkunaqa “chaninpunin, sonqotan kusichin”, kasukushallasun chayqa allin premiotan chaskisun (Salmos 19:8, 11).