UI TE AU MAPU E
E Tarevake Ainei te Oraanga Homosexual?
“Iaku e maata maira, ko tetai mea ngata roa atu iaku i te akaruke ko toku inangaro i te piri ki te tane. Manako au e ka kore te reira, inara te vai ua nei rai teia au manako.”—David, 23.
E Kerititiano a David e te inangaro ra i te akamareka i te Atua. Ka rauka ainei iaia i te akamareka i te Atua noatu tona inangaro i te piri ki te tane? Eaa tikai to te Atua manako no runga i te oraanga homosexual?
Eaa ta te Pipiria e karanga ra?
Tukeke te manako no runga i te oraanga homosexual mei tetai peu ki tetai me kore tetai tuatau ki tetai tuatau. Kare te au Kerititiano e tuku i te manako o te katoatoa kia akaaere ia ratou me kore kia “akapeke aereia e te matangi ra, i tera tuatua i tera tuatua.” (Ephesia 4:14) Mari ra, ka akatumu ratou i to ratou manako no runga i te pirianga homosexual (e tetai atu au tu pirianga) ki te au turanga tei akanooia i roto i te Pipiria.
Taka meitaki te au turanga a te Pipiria no te au peu homosexual. Karanga ra te Tuatua a te Atua:
“Auraka koe e moe i te tane, mei te moe i te vaine ra: e mea viivii roa ïa.”—Levitiku 18:22.
“I akaruke ei te Atua ia ratou, kia rave ua i te ravenga viivii i te anoano i to ratou uaorai ngakau, . . . i tuku uaʼi ia ratou ki te anoano viivii ra; na ta ratou au vaine oki i ruri ke i te mea tika ra i te mea tika kore.”—Roma 1:24, 26.
“Auraka e vavare: kare te kanga, e te akamori idolo, e te akaturi, e te akavaine, e te aronga sodoma, E te keia, e te noinoi apinga, e te konā kava, e te akakino, e te āru, kare anake ïa e noo i te basileia o te Atua.”—1 Korinetia 6:9, 10.
Ko te tika, ka tau teia au turanga a te Atua ki te au tangata ravarai, me e inangaro to ratou i te tane e te tane, vaine e te vaine me kore tane e te vaine. Tika rai, ka tauta pakari te katoatoa i te akaari i te tu akakoromaki me tupu mai te inangaro kare te Atua e mareka ana.—Kolosa 3:5.
Ko te aiteanga ainei e . . . ?
Ko te aiteanga ainei e te apii ra te Pipiria e kia makitakitaia te aronga homosexual?
Kare. Kare te Pipiria e apii ana e kia makitakitaia tetai ua atu—me e aronga homosexual me e kare. Tera ra, te akakite maira te Pipiria kia tatou e kia “umuumu i te au i te tangata katoa nei,” noatu eaa te tu o to ratou oraanga. (Ebera 12:14) No reira, kare e tau kia rave i te tu kino, tu makitakita, me kore tetai ua atu tu takinokino anga ki te aronga homosexual.
Ko te aiteanga ainei e ka patoi atu te au Kerititiano i te au ture te akatika ra kia akaipoipo te tane e te tane, vaine e te vaine?
Te akaari maira te Pipiria e te umuumu ra ta te Atua turanga i te akaipoipo ei pirianga tane okotai e te vaine okotai. (Mataio 19:4-6) Inara, e ravenga poritiki te au manako no te au ture a te tangata no te pirianga akaipoipo tane e te tane, vaine e te vaine, kare i te tu manako tau. Te akakite maira te Pipiria ki te au Kerititiano e kia vai takake ua ratou mei te angaanga porotiki. (Ioane 18:36) No reira, kare ratou e māro me kore e patoi i te au ture a te kavamani no runga i te akaipoipo tane e te tane, vaine e te vaine me kore i te tu homosexual.
Akapeea ra me . . . ?
Akapeea ra me te rave nei tetai tangata i te tu homosexual? Ka rauka ainei i taua tangata ra i te taui i tona tu?
Ae. No te mea, kua akaruke tetai papaki o te anere mataiti mua i te reira tu! I muri ake te akakite mai anga e kare te aronga tei aru i te oraanga homosexual e noo i te Patireia o te Atua, te karanga ra te Pipiria: “Mei te reira oki tetai papaki o kotou na.”—1 Korinetia 6:11.
Ko te aiteanga ainei e ko te aronga tei akamutu i te rave i te tu oraanga homosexual kare e inangaro i te oki akaou atu ki to ratou oraanga o mua ana? Kare. Karanga ra te Pipiria: “E kua akatangata ou, ko tei akaouia i te kite.” (Kolosa 3:10) Ka anoanoia te tauianga i roto i te oraanga i te au taime ravarai.
Akapeea me te inangaro ra tetai tangata i te akono i ta te Atua turanga e te vai ra rai te anoano no te oraanga homosexual?
No runga i tetai ua atu anoano, ka iki te reira tangata e kare aia e akatupu me kore e rave i te reira au anoano. Ka akapeea ra? Karanga ra te Pipiria: “E akono i ta te Vaerua ra, e auraka e akatupu i to te kopapa ra inangaro.”—Galatia 5:16.
Akamanako ana e kare te irava e karanga ra e kare o te tangata inangaro i te pae kopapa. Kareka ra, na roto i tetai akapapaanga meitaki i te apii i te Pipiria e te pure, tei runga iaia te maroiroi i te akaruke i taua au inangaro ra.
Ko ta David teia i kite mai, tei taikuia i te akamataanga—i muri ake te akakite anga aia ki tona nga metua Kerititiano i tona manamanata. “Pumaana tikai au no taku i rave,” i karanga ai aia, “e naringa au i akakite takere i te reira kia raua papu e kua mataora au i toku mapu anga mai.”
I te openga, ka mataora tatou me aru tatou i ta Iehova turanga i akanoo. Papu ia tatou e “e mea tika ïa, e rekarekaʼi te ngakau,” e “tei te akono i te reira te tutaki maata.”—Salamo 19:8, 11.
