“Engani na kʼépani japka, úkua jukanchaspka jimbokani tsitiasïreenga máteru tatakeechani. Ji eratsesïreenga eskani ma tiempujkusïni ísï pʼikuarherapiringa, peru ménisï útasïni ísï pʼikuarherasïnga” (David, enga 23 jatiriika).

 David kristianu máesti ka uékasïndi kurhajchani Tata Diosïni. Nema enga májkueni pʼikuarherajka eska David, ¿uaa úni ambe enga Tata Diosï kurhakujka? ¿Ambe uandasïni Tata Diosï omoseksualidadiiri ambe?

•  ¿Ambe uandasïni Biblia?

•  ¿Arhikuekasïni inde ambe eska...?

•  ¿Joperu enga...?

 Tiempu jingoni ka ístu na engaksï pʼindeka irekani kʼuiripuecha, ísïksï exesïndi omoseksualidadini. Peru kristianuechachi no májkueni eratsesïnga eska sáno iámindu kʼuiripuecha. Ísï eska na arhijka Efesu 4:14, jucha no uékasïnga “ísku jatini jámani jakajkuni ambe engaksï ima kʼuiripuecha jorhentpijka”. Na engachi eratsejka omoseksualidadiiri ambe ka ístu máteru ambeeri, jindeesti indeni ambe jimbo enga Biblia jorhentpijka.

 Biblia uandasïndi na engachi jatsika para exeni omoseksualidadini. Ju je exeni ambe enga uandajka.

•  “Asï jáma apondini tataka ma jingoni ísï eskari na újka nanaka ma jingoni” (Levítico 18:22).

•  “Eskaksï imeecha na tsitijka mintsitarhu, [...] Tata Diosï jurajkua[s]ti paraksï kʼuratsekua tsïtani ka ísku jándikua ambeksï niátani jimbokaksï nanakeecha nóteru ísï jatsisïngia relasioni seksuali eska Tata Diosï na kuerauaka” (Roma 1:24, 26).

•  “Asï tontu úkuarhi je. Ima kʼuiripuecha engaksï ísku jándikua ambe niátajka, engaksï diosï úkateechani kómarhiajka, temungurhiriicha engaksï enganiarperajka, tatakeecha engaksï jurajkutakuarhejka paraksï máteru tatakeecha ísku jándikua ambe niátani imeechani jingoni, ka ístu tatakeecha engaksï ísku jándikua ambe niátajka máteru tatakeechani jingoni, imeecha engaksï sïpani jámajka, engaksï tsititspeni jámajka, engaksï kauini jámajka, imeecha engaksï uandakua ambe jauatatspejka ka imeecha engaksï euakuarpijka ambe ma, nóksï pʼiuati Tata Diosïiri Reinuni” (1 Korintu 6:9, 10).

 Tata Diosïiri juramukuechaksï jindeesti para iámindu kʼuiripuecha. No arhiparini enga nema tatakani o nanakani ma tsitiaka, iáminduechachi jatsiska para pʼíngukuarhini parachi no jurajkuni eska ima ambe engachi tsitijka uaaka eskachi imani ambe uaaka enga Tata Diosï no jaiapanhentajka (Kolosasi 3:5).

 ¿Arhikuekasïni inde ambe eska Biblia jorhentpisïnga eskachi kurhunhiauaka omoseksualiichani?

 Nómbe. Bibliajtsïni jorhendasïndi eskachi no nemani jatsiska para kurhunhini ka ístujtsïni jorhendasïndi “sési pájperani iáminduecha jingoni”, no arhiparini na engaksï irekaaka kʼuiripuecha (Ebreu 12:14). Ísï jimbo, no sési jarhasti teresmarhuani ka no sési kaani omoseksualiichani.

 ¿Arhikuekasïni i ambe eskachi kristianuecha jatsiska para no sési exeani indeni leiichani engaksï jurajkujka eskaksï omoseksualiicha tembuperaaka?

 Biblia uandasïndi eska Tata Diosï juramusïnga eska tataka ma, nanaka ma jingontkusï jatsika para tembuchani (Mateu 19:4-6). Peru kristianuechachi no apoiariuasïnga nijtu no sési exeani imani leiichani engaksï uandajka omoseksualiicheeri tembuperakueri ambe. Jiókuarhiani o nómbe indeni leiichani engaksï omoseksualiicheeri ambe uandajka, politikeeri ambeesti. Ka Biblia uandasïndi eskachi no jatsiska para politikarhisï inchamukuni (Juanu 18:36).

 ¿Joperu enga nema omoseksualijkia? ¿Uaa nóteru ísï jámania?

 Jo, uaati mójtakukuarhini. Biblia uandasïndi eskaksï máru kʼuiripuecha engaksï primeru siglurhu irekapka, úspkaksï mójtakukuarhini. Imani karta jimbo enga apostoli Pablu axakuapka Korintu anapuechani, uandaspti eskaksï imeecha engaksï omoseksualiika no pʼiuaka Tata Diosïiri Reinuni ka tátsekua arhiaspti: “Chájtsï máru ióntki indeni ambe niátasïreenga” (1 Korintu 6:11).

 ¿Arhikuekasïni inde ambe eska imeecha engaksï nóteru omoseksualipkia nóteruksï méni tsitispkia indeni ambe? Nómbe. Tata Diosïiri Karakata arhisïndi: “Jatsiskajtsï para jimbanhi kʼuiripu máeni, [...] engajtsï sánhani arini jauaka sánderu sési míteni Tata Diosïni, seguiriini jauakajtsï sánderu jimbanhintani” (Kolosasi 3:10). Ísïisti, para jimbanhi kʼuiripu máeni, uétarhisïndi méntku jánguarhintani jarhani.

 Peru ¿ambe úkuarhisïni enga nema uéjka kurhajchani Tata Diosïiri juramukuechani peru útasï tsitini jarhani omoseksualidadiiri ambe?

 Inde kʼuiripu úsïndi erakuni nóteru indeni ambe eratseni jarhania o pʼíngukuarhini para no no sési ambe niátani, ísï eska na úkuarhijka imani ambe jingoni enga ma tsitijka. ¿Ka néna uaa pʼíngukuarhini? Biblia uandasïndi: “Seguirii je ísï jámani eska espiritu santu na uéjka, ka engajtsï jánguarhintaaka ísï úni, méntkujtsï no uaaka ambe enga kuerpu tsitijka” (Galasia 5:16).

 Exeskiri eska i bersikulu no uandasïnga eska ima kʼuiripu nóteru tsitiakia no sési jásï ambe. Sánderu sési, uandasïndi eska engachi pʼindeaka Biblieri ambe jorhenguarhini ka méntku kómarhini jarhani Tata Diosïni, uaakachi uinhapikua jatsini parachi úni pʼíngukuarhini ka no no sési ambe niátani.

 David engachi ueenakuarhu uandaka, úspti exeni eska i ambe meru ísïiska ka sánderia enga aianguapka imeeri taati jémbeechani na enga pʼikuarhereenga. Ima uandantasïndi: “Iásï kánikua sési pʼikuarherasïngia, ka engani antesi aianguapiringa juchiiti taatiichani indeni ambe, jamberini sánderu agustu jámapiringa jiáni engani sánderu sapichuepka”.

 Sánderuchi tsípikua jingoni irekasïnga engachi kurhajchaajka Tata Diosï Jeobaeri juramukuechani. Ka uaakachi seguru jarhani eskaksï i ʻjuramukuecha ambakitiiskaʼ ka eskaksï úsïnga eska “mintsita sési pʼikuarheraaka”, ka engachi kurhajchauaka kʼérati kóntperateechanchi jatsiauaka (Salmo 19:8, 11).