E FESILI MAI A TALAVOU
E Mata, e Ma‵sei a Amioga Fakasotoma?
“I taku tupuakaga, e tasi te mea telā ne faigata malosi ki a au ko te fiafai ki nisi tāgata. E masani o mafaufau au me se vaega o te olaga tupu aka, kae ne fakalavelave mai faeloa a lagonaga konā ke oko mai eiloa ki te taimi nei.”—David, 23.
A David se Kelisiano telā e manako o fakafiafia te Atua. E mata, e mafai o fai a ia penā kae fiafai foki ki nisi tāgata? Ne a lagonaga ‵tonu o te Atua e uiga ki amioga fakasotoma?
Ne a pati i te Tusi Tapu?
E mafai o kese‵kese a kilokiloga ki amioga fakasotoma i tuu mo aganuu io me ko taimi kese‵kese. Kae e se talia ne Kelisiano ke pule latou ne manatu masani o tino io me “agi valevale ne matagi o akoakoga a tino.” (Efeso 4:14) I lō te fai penā, e fakavae te lotou kilokiloga ki amioga fakasotoma (mo so se vaegā amioga penā) ki tulaga i te Tusi Tapu.
E manino ‵lei te tulaga i te Tusi Tapu e uiga ki amioga fakasotoma. E fai mai te Muna a te Atua:
“E se ‵tau mo koe o ‵moe fakatasi mo se tagata e pelā loa mo koe ma ‵moe mo se fafine.”—Levitiko 18:22.
“E ‵tusa mo manakoga o olotou loto, . . . ne tuku atu ei ne te Atua a latou ke fina ki manakoga fakatauavaga, me ko ‵fuli ne olotou fāfine a te fakaaogaga ‵tonu o olotou foitino ki faifaiga e se masani ki ei.”—Loma 1:24, 26.
“Ke se fakaloiloigina koutou. A tino kolā e fina ki amioga fakatauavaga sē ‵tau, tino ifo ki tupua, tino mulilua, tāgata e amio fakasotoma, tāgata kolā e ‵moe mo tāgata, tino kai‵soa, tino kaima‵nako, tino ko‵nā, tino fatu‵fatu, tino ‵fao mea ka se maua ne latou a te Malo o te Atua.”—1 Kolinito 6:9, 10.
A te ‵tonuga loa, e fakasino atu a tulaga o te Atua ki tino katoa, faitalia me maua ne koe a manakoga fakasotoma io me ikai. E tonu, e ‵tau mo tino katoa o loto pulea māfai ko ‵sae aka a manakoga ke aofia i amioga kolā e se fiafia ki ei te Atua.—Kolose 3:5.
E mata, e fakauiga i ei . . . ?
E mata, e fakauiga i ei me i te Tusi Tapu e fakamalosi ne ia a te takalialia ki tāgata kolā e fia‵fai ki tāgata?
Ikai. E se fakamalosi aka i te Tusi Tapu a te takalialia ki so se tino—tino amio fakasotoma io me ikai. Kae e fai mai i ei ke “kausaki atu ke maua te filemu mo tino katoa,” faitalia te vaegā olaga e ola latou i ei. (Epelu 12:14) Tela la, e sē se mea ‵lei ma aofia koe i te ta tamaliki, amioga solitulafono kolā e fakamalosi ei te takalialia, io me ko so se faifaiga telā e fai fakamasei ei a tino amio fakasotoma.
E mata, e fakauiga i ei me ‵tau o ‵teke a Kelisiano ki tulafono kolā e talia ei ke avaga a tino amio fakasotoma?
E fakaasi mai i te Tusi Tapu me i te tulaga o te Atua ki te fakaipoipoga ko te tuku fakatasi o te tagata e tokotasi mo te fafine e tokotasi. (Mataio 19:4-6) Kae ko tulafono a tāgata e uiga ki te fakaipoipo o tino amio fakasotoma ne fai ona ko kinauga fakapolitiki kae e se ko mea tau amioga. E fai mai te Tusi Tapu ki Kelisiano ke mo a eiloa ma ‵kau ki se feitu i mea fakapolitiki. (Ioane 18:36) Tela la, e se fakamalosi io me ‵teke latou ki tulafono a te malo e uiga ki te fakaipoipoga o tino amio fakasotoma io me ko faifaiga fakasotoma.
Kae e a māfai . . . ?
Kae e a māfai e fai nei ne se tino a amioga fakasotoma? E mata, e mafai o ‵fuli te tino tenā?
Ao. A te ‵tonuga loa, e isi ne tino i te senitenali muamua ne fai penā! I te otiga ne fai ne ia ana pati e uiga ki a latou kolā e amio fakasotoma me ka se ulu atu latou ki te Malo o te Atua, e fai mai te Tusi Tapu: “Kae ne fai eiloa penā a nisi tino i a koutou.”—1 Kolinito 6:11.
E mata, e fakauiga i ei me i a latou kolā ko se fai nei ne latou a amioga fakasotoma ka se toe maua eiloa ne latou so se lagonaga penā mai i olotou olaga mua? Ikai. E fai mai te Tusi Tapu: “Fakapei ki luga i a koutou a uiga ‵fou, kolā ne faka‵fou e auala i te iloaga tonu.” (Kolose 3:10) A te faiga o fakama‵fuliga se mea telā e ‵tau o galue faeloa ki ei.
Kae e a māfai ko manako se tino o tautali ki tulaga o te Atua kae koi isi eiloa ne manakoga o amioga fakasotoma i a ia?
E pelā eiloa mo nisi manakoga, e mafai eiloa ne se tino o filifili aka ke mo a ma fakamalosi io me fai ne ia a manakoga konā. E pefea la? E fai mai te Tusi Tapu: “Tumau i te sa‵sale i te agaga kae ka se fai lele eiloa ne koutou a manakoga faka-te-foitino.”—Kalatia 5:16.
Onoono la, me seki fai mai te fuaiupu me ka seai eiloa ne manakoga faka-te-foitino o se tino. I lō te fai penā, ka maua ne te tino te malosi o ‵teke a manakoga konā e auala i ana polokalame faka-te-agaga ‵lei ko te sukesuke ki te Tusi Tapu mo ‵talo.
Ne iloa ne David, telā ne taku muamua mai a te ‵tonu o te mea tenā—maise i te taimi ne fakaasi atu ne ia ki ana mātua Kelisiano a tena fakalavelave. “Ne fai eiloa pelā me se amoga ‵mafa ne tapale kea‵tea mai oku tuauma,” ko ana pati, “kae kāti ne mafai o fiafia malosi atu au ki toku olaga fakatalavou moi ko leva ne faipati atu au ki a lāua.”
I te fakaotiga, e sili atu te ‵tou fia‵fia māfai e tau‵tali tatou ki tulaga o Ieova. E tali‵tonu tatou me “e amiotonu, e fai ne ia te loto ke fiafia,” kae “mai te tausi ki ei, ka maua ne [tatou] se taui lasi.”—Salamo 19:8, 11.
