«Tobi de ca cosa guca nagana para naa ra ziniiseʼ nga guyuuladxeʼ xcaadxi hombrehuiiniʼ. Naa rabeʼ ti tiempu si ñuneʼ sentir zaqué peru qué ganda gusaanaʼ ni» (David, 23 iza).

 David naca xpinni Cristu ne racaláʼdxibe guzuubabe stiidxaʼ Dios. ¿Ñee zanda guni tuuxa binni casi laabe ca ni ná Dios la? ¿Xi riníʼ ique Dios de ca muxeʼ o de ca gunaa nguiuʼ yaʼ?

•  ¿Xi rusiidiʼ Biblia?

•  ¿Ñee riníʼ nga . . . ?

•  Peru ¿pa . . . ?

 Ruchaa cani riníʼ ique binni de ca muxeʼ o de ca gunaa nguiuʼ ra zidiʼdiʼ iza ne pur ca costumbre ni napa cada lugar. Peru laanu, ca xpinni Cristu qué rinándanu ni runi cré binni. Qué racaláʼdxinu chinándanu «intiica nacubi ni canausiidi binni, casi runi xcuidi, ti dxi rarí, sti dxi raricaʼ», casi ná Efesios 4:14. Ni riníʼ íquenu de ca muxeʼ o de ca gunaa nguiuʼ o de xcaadxi cosa runi binni, zeeda cani lu Biblia.

 Nabé nayaʼniʼ modo rusiene Biblia ora ruzeeteʼ de ca muxeʼ o de ca gunaa nguiuʼ. Guidúʼyanu xi rusiidiʼ ni.

•  «Cadi gátaneluʼ ti hombre cásica rataneluʼ ti gunaa» (Levítico 18:22).

•  «Bisaana Dios laacabe guni cabe enda nayuudxu ni cá ique cabe que [...] bisaana Dios laacabe aca yuudxu cabe modo gapa cabe gana. Gunaa ma qué ñuni casi runi gunaa sínuque uyuu né ca laca gunaa» (Romanos 1:24, 26).

•  «Cadi quite ique tu laatu, purti nin cani napa jnadxii, nin cani runi cre bidóʼ, nin cani riuu né xheela stobi, nin ca muxeʼ, nin cani riuu né muxeʼ, nin ca gubaanaʼ, nin cani rucaa ique puru si gapa bidxichi, nin ca binni güeʼ, nin cani riguu dí, nin cani ruxhii pobre, nin tobi de ca nga qué ziuu ra runi mandar Dios» (1 Corintios 6:9, 10).

 Ni dxandíʼ la? ca ley stiʼ Dios riʼ para guiráʼ binni cani. Modo tiica nácanu, guiranu naquiiñeʼ gucueezanu laanu para cadi gudiʼnu lugar gucaa ca deseu stinu laanu gúninu xiixa cosa ni qué riuulaʼdxiʼ Dios (Colosenses 3:5).

 ¿Ñee riníʼ nga rusiidiʼ Biblia gaca nanaláʼdxinu ca muxeʼ o ca gunaa nguiuʼ la?

 Coʼ. Biblia peʼ rusiidiʼ laanu cadi naquiiñeʼ gaca nanaláʼdxinu guirutiʼ. Ne riguu ni gana laanu «cadi chuʼ dinde né tu irutiʼ», modo tiica nabánicabe (Hebreos 12:14). Nga runi, cadi jneza diʼ nga guni búrlanu o guninanu laacabe pur ni guininu o pur ni gúninu.

 ¿Ñee riníʼ nga naquiiñeʼ chuʼ ca xpinni Cristu en contra de ley ni ná zanda guichaganáʼ hombre né hombre ne gunaa né gunaa la?

 Biblia ná, guendaxheelaʼ si ra richaganáʼ ti hombre né ti gunaa nga riuulaʼdxiʼ Dios (Mateo 19:4-6). Nga runi, laanu ca xpinni Cristu cadi nuudinu en contra o a favor de guichaganáʼ hombre né hombre ne gunaa né gunaa. Pa chuʼnu en contra o a favor de ley ca, zeeda gaca ni casi ora ñuʼnu lu política. Ne Biblia ná cadi naquiiñeʼ chuʼnu lu política (Juan 18:36).

 Peru ¿pa maʼ runi practicar tuuxa ni runi ca muxeʼ o ni runi ca gunaa nguiuʼ ca yaʼ? ¿Zanda guchaabe la?

 Zanda. Biblia ná, caadxi binni de primé siglu que bichaacaʼ modo laacaʼ. Lu carta ni bicaa Pablo ra nuu ca binni de Corinto, bisiénebe qué ziuu cani runi practicar ni runi ca muxeʼ ne ca gunaa nguiuʼ ca lu Reinu stiʼ Dios, ne laaca ná ni: «Zacaca guca caadxi de laatu chiqué» (1 Corintios 6:11).

 Ora maʼ bisaanacabe práctica riʼ, ¿ñee riníʼ nga maʼ qué ziuuruʼ dxi gápacabe deseu ca la? Coʼ. Stiidxaʼ Dios ná: «Ma adxé laatu yanna. Ma bichaa Dios laatu, ne ze dxi jma rusi ziuchaa laatu» (Colosenses 3:10). Zacá ni, qué ziaanadxinu de guchaʼnu modo laanu.

 Peru ¿pa tuuxa ni racalaʼdxiʼ chinanda ca ley stiʼ Dios qué ganda gusaana ca deseu stiʼ yaʼ?

 Cásica raca né xcaadxi deseu, binni riʼ naquiiñeʼ guni decidir pa zudii lugar guiroobaʼ ca deseu stiʼ o pa ziaba lúcani. ¿Ximodo rucueezacabe laacabe yaʼ? Sicaríʼ ricabi Biblia ni: «Lasá modo rusiidi Espíritu Santu laatu, ne óraque ma qué zinanda tu ni na ique tu» (Gálatas 5:16).

 Pa cudiiluʼ cuenta, cadi caníʼ diʼ versículo riʼ maʼ qué ziuu dxi gapa binni deseu inmoral. Ni ná ni nga pa gápanu costumbre de guni estudiarnu Biblia siempre ne guni orarnu gatigá la? zápanu stipa para gucueezanu ca deseu ca ne cadi guiábanu lúcani.

 David, ni bizéʼtenu ra bizulunu que, gúpabe stipa ca óraruʼ gúdxibe bixhózebe ne jñaabe ni cazaacabe. Laabe nabe: «Guizáʼ galán bineʼ sentir, pa ñabeʼ laacabe dede ante xii ngue cazaacaʼ la? ñuneʼ sentir jma nayecheʼ dxi gucaʼ adolescente».

 Ne dxandíʼ jma nayecheʼ riuʼnu ora rinándanu ca ley stiʼ Dios. Nánnanu «qué ruchee» ne «riguixhedxí ni ladxidóʼ binni», ne pa chinándanu cani zacaanu stale ndaayaʼ (Salmo 19:8, 11).