Ie pa Die te uni luech? Iel pa uniprejënt?

SCUTËDE SU TE

La resposta dla Bibia

Die po’ udëi dut y dloncora possel fé chël che l se tol dant (Proverbs 15:3, NM; Ebrei 4:13). Ma la Bibia ne nsënia nia che Die ie uniprejënt o cun d’autra paroles, che l ie prejënt te uni luech y te uni cossa. La dij de contra che ël ie na persona y che l viv te n luech spezifich.

Co ie pa Die? Die ie n spirt (Giuani 4:24). N ne po’ nia l udëi (Giuani 1:18). Tla vijions dla Bibia, vën Die mustrà te n luech spezifich. Ël ne vën mei reprejentà coche sce l fossa prejënt te uni luech (Isaia 6:1, 2; Revelazion 4:2, 3, 8).
Ula viv pa Die? Si “abitazion” ie “tl ciel”, te na realtà spirituela che ie defrënta dal univiers ulache vivon (1 Rëiesc 8:30). A desmustrazion che Die viv te n luech spezifich, vëniel nunzià tla Bibia na ucajion ulache i angiuli “s’à prejentà n di dan l Seniëur” (Giobe 1:6).

Sce Die ne n’ie nia uniprejënt, possel pa mpo se nteressé de mé persunalmënter?

Sci. A Die ti sta a cuer uniun de nëus. Nce sce l viv te na realtà spirituela, Die vëija chëla persones sun la tiera che uel senziermënter ti plajëi y ël se tol sëura de chëstes (1 Rëiesc 8:39, NM; 2 Cronica 16:9, NM). Co desmostra pa Die de se cruzië de nëus?

Canche prion: Iehova a scota su nosta prieres tl mumënt che les dijon (2 Cronica 18:31, NM).
Canche son ju de corda: “L Seniëur ti sta dlongia a chëi dal cuer ferì, ël juda su chi che defin ie ju de corda” (Salm 34:19 [34:18, NM]).
Canche on de bujën de cunsëies: Iehova uel “te nstruì y te mustré la streda che t’es da jì” tres si Parola, la Bibia (Salm 32:8).

Ideies fauzes n cont dl’uniprejënza de Die

Suvënz auden dì: Die ie prejënt te uni luech dla criazion.

L’aurità ie: Die ne n’abitea no sun la tiera no te degun auter luech dl univiers (1 Rëiesc 8:27). L ie vëira che la Bibia dij che la stëiles y l’autra opres dla criazion “cunedësc la gloria de Die”, ma chësc ne uel nia dì che Die viv te chël che ël à cria, avisa sciche n artist ne viv nia te si opra d’ert (Salm 19:1). Purempò possa n’opra d’ert nes dì zeche n cont dl artist. Ala medema maniera possen cuntemplé tla criazion “chël che ne n’ie nia da udëi” de Die, cualiteies sciche si putënza, sapienza y amor (Romans 1:20).

Suvënz auden dì: Per cunëscer duta la cosses y vester uniputënt, muessa Die vester uniprejënt.

L’aurità ie: L spirt sant ie la putënza de Die al’opra, si forza ativa. Tres si spirt sant possa Die savëi dut chël che suzed y fé uni cossa te uni luech y te uni mumënt zënza vester prejënt de persona (Salm 139:7).

Suvënz auden dì: Salm 139:8 nsënia che Die ie te uni luech, ajache l dij: “Sce vede su tl ciel, po’ ies tu iló; sce me ponde tl rëni dla mort, iló ies tu ënghe!”

L’aurità ie: Chësc fers ne fej nia referimënt a luesc ulache Die viv. Plutosc vëniel ndicà tres na forma poetica che Die po’ nes judé, unfat ulache son.

a Iehova ie l inuem de Die aldò dla Bibia.