Akory ty Fahintàni-Vavolombeloni-Jehovah ty Fisaraham-panambalea?
Manaraky mariny ty raha volanini-Baiboly mikasiky fisaraha noho fisintaha zahay. Namoro ty fanambalea Ndranahary amy zay afaky miaraky mipetraky maharitsy ty lahilahy raiky noho ty ampela raiky. Ty fijangajangà avao ro antony ara-Baiboly azo isaraham-panambalea.—Matio 19:5, 6, 9.
Manampy ty mpivaly hiatriky raha sarotsy amy fanambalea va ty Vavolombelo?
Eka, sady amy fomba sankarazany:
Boky noho Gazety. Afaky manampy ty mpivaly hifankatea soa fitaova miboaky tsy tampaky reo, ndre atao raha fa tsy azo areny aza ty fahità ty fanambalean-drozy. Azonao hentea, ohatsy, lahatsoratsy retoa: “Aoka Ianao Hitana ny Voady Nifanaovanareo,” “Mahaiza Mifamela” noho “Mbola Hifampatoky Indray ve Izahay?”
Fivoria. Miresaky fomba azo ampihara ty toro-hevitsini-Baiboly mikasiky fanambalea zahay lafa any. Samby anaova ani-zay iaby ndre amy fivoria sankerinandro rey, ndre amy fivoriambe rey.
Anti-panahy. Manome toro-hevitsy mpivaly koa ty anti-panahy amy fiangona eo. Mampiasa andinin-teny amy Baiboly ao rozy lafa manao raha zay, manahaky hoe Efesianina 5:22-25.
Mana fahefà hampisaraky ty mpivaly Vavolombelo va ty anti-panahy amy fiangona eo?
Aha. Marina fa afaky manampy ty mpivaly hiatriky raha sarotsy amy fanambalean-drozy ty anti-panahy. Fe tsy mana fahefà hiresaky amy mpivaly rey rozy hoe zao ty tokony hataonareo. (Galatianina 6:5) Ze olo misara-baly tsy mifanaraky amy Soratsy masy, le tsy mahafeno fepetra hahazo tombotsoa manoka amy fiangona eo sady tsy afaky manambaly olo hafa laha ty Soratsy Masy ro hentea.—1 Timoty 3:1, 5, 12.
Akory ty fahitàni-Vavolombelo ty fisintaha?
Ampirisihini-Baiboly mba hipetraky miaraky amy valiny avao ty olo manambaly, ndre somary fa tsy de soa azy ty fifandrambesan-drozy. (1 Korintianina 7:10-16) Maro amy raha manahira an-trano ao rey ro milamy, lafa miezaky mivavaky, manoriky ty torolalani- Baiboly noho mampiseho fitiava ty mpivaly.—1 Korintianina 13:4-8; Galatianina 5:22.
Fe ndre zay, afaky manampa-kevitsy ty hisintaky amy valiny ty Kristiana laha miseho antony manaraky retoa:
Tsy mahefa mamelo azy ty valiny.—1 Timoty 5:8.
Satà marè ty valiny ka atahora hamono azy.—Salamo 11:5.
Tsy afaky manompo ani-Jehovah ie vokatsy ty raha ataoni-valiny. Mety manao forsè azy, ohatsy, ty valiny mba tsy hanaraky ty fitsipiki-Ndranahary sasy. Mety hanapa-kevitsy hisintaky ie amy zay satria zay avao ty hahafahany ‘manoriky ty safà-Ndranahary, fa tsy ty safàn’olo’—Asan’ny apostoly 5:29.